Tơdrong Pơđơ̆k 27:22
“Mă ih iŏk hơdrei peh hrol lu bơngai kơhlôh kơwao lăm tơpăl, hăm ‘ba. Tơdrong kơhlôh kơwao sư oei ưh kơ tơkloh đơ̆ng sư ôh.” (Tơdrong Pơđơ̆k 27:22)
Nơ̆r jet tơchĕng pơwao:
– Pơtao Sôlômôn yua rup ayơ roi pơdah gah tơdrong bơngai kơwao arăng kơ̆l?
– Tơdrong kiơ pơm kơ kon bơngai ưh kơ băt kơnăl tơdrong glăi bơ̆n păng jing ưh kơ gơh bơtho?
– Pơm thoi wă gơh tơplih?
– Lu bơ̆n pơhrăm iŏk ‘bai âu thoi yơ?
Nơ̆r pơđơ̆k yua minh pôm rup wă roi tơ’bôh tơdrong arăng kơ̆l kon bơngai: Rup ‘ba mă ih iŏk hơdrei peh hrol đei tơbăt pơm kơ bơngai noh gleh lap dêh păng hơmet trăp tơpă mă khañ lei ră, mă khan đei hlôi đơ̆ng hơdrei peh hrol thoi noh, tơdrong kơhlôh kơwao lu sư oei oei đech ưh kơ tơklah đơ̆ng lu sư ôh. Lăm chư đe chih hơgei dêh lăm sơ̆p hla bơar nơ̆r Kră Yang “bơngai kơwao” ưh kơ trŏ roi kơ minh ‘nu bơngai kơwao đĕch ôh, mălei minh ‘nu bơngai kơ tơdrong hơgei, pơjăm tơdrong bơtho đơ̆ng Kră Yang ‘Bok Kei-Dei, păng pơjĭp kiơ̆ trong kơdih. Nơ̆r Kră Yang tơ’blŏk kơ lu bơ̆n kơplah kon bơngai sơngah kơ tơdrong ‘lơ̆ng tơpăt, tơdrong kơwao oei lăm jơhngơ̆m lu sư ưh kơ tơklah.
Nơ̆r “Tơdrong kơtul lu sư ưh kơ tơ klah đơ̆ng lu sư” pơma hơđăl bơih mă kơđoh kam tơpleh đơ̆ng găr ‘ba, lei na bơngai kơhlôh kơwao ưh kơ layơ tơklah đơ̆ng tơdrong kơnê̆ lu sư, păng lu sư kư̆m sơngah đơ̆ng đe bơtho. Lăm chăl arih Kră Yang ‘Bok Kei-Dei yua nơ̆r Sư, bơngai pơgơ̆r gah bơhngol, hnam dơnŏ, buăl juăt, mơ’nah mă chăl arih pơmat tat wă chông anhăk păng bơtho tơ’bôh kơ lu bơ̆n. Tơdrong bơtho tơ’bôh noh bơih wă kơ lu bơ̆n wơ̆ ‘lŏ păng tơplih. Mă khan lei ră, mưh đei minh ‘nu bơngai ưh kơ wă mơ̆ng păng oei arăng kơ̆l đĕch, lei na mă khan đei tơdrong bơtho pơjĭ pơlơ̆k pơle ră mălei ưh kơ đe ba tơdrong tơplih. Tơdrong pơang pơm kơ kon bơngai ưh kơ ‘bôh kơdih pơm glăi păng ưh pă gơh bơtho pơjĭ sư dơ̆ng.
Bruce Walfke đei chih: “Tơdrong ‘mêm ăn đĕch đơ̆ng Kră Yang wă tơpŭ ming ‘nao kơ hlôh kơwao jơ̆ tơdrong hơmĕng minh đĕch wă kơ tơplih jing bơngai đei yua”. Tơdrong tơplih tơpă lĕch đơ̆ng jơhngơ̆m. Tơdrong kiơ trăp gah ‘nguaih dah tơdrong pơtơ̆p pơjuăt kơnê̆ dêh kư̆m ưh kơ jing gơh hơgei tơpă. Minh Kră Yang ‘Bok Kei-Dei đĕch tơplih jơhngơ̆m bơ̆n. Kơplah lu bơ̆n chu iŏk đon ala ‘bơ̆t anăp Kră Yang păng chu kiơ̆ nơ̆r Sư, Sư tơplih đon tơchĕng bơ̆n păng hơmet ming gah tơdrong pơma sa lu bơ̆n. Thoi noh, bơngai hơgei jơ̆ bơngai ling lang đei jơhngơ̆m iơ̆m dim, adrin mơ̆ng păng sơng iŏk tơdrong đe bơtho. Tơplih kơ tơdrong pơm tơplơ̆ tơdrong đe bơtho, athei sơng iŏk tơdrong tơplih đơ̆ng Kră Yang ‘Bok Kei-Dei lăm chăl arih bơ̆n.
Apinh Yang Bơhngol ‘Lơ̆ng tơ’blŏk kơ lu bơ̆n lăng lăng kơdih akâu. Tơplih kơ lăng ‘bôh tơdrong kơwao bơngai nai, lu bơ̆n kăl kơ apinh jet kơdih hăm trŏ kơ bơ̆n adrin sơng iŏk tơdrong bơtho đơ̆ng Kră Yang ‘Bok Kei-Dei dah ưh. Minh jơhngơ̆m iơ̆m dim păng ‘bônh kơ bơtho gô tơgŭm tơdrong hơgei đơ̆ng Kră Yang chăt rơh kơjăp wă kơ lu bơ̆n wơ̆ ‘lŏ lăm bơhngol.
Ơ Kră Yang, apinh bơwei jơhngơ̆m inh iơ̆m dim wă kơ hlôh băt lăm tơdrong pơmat lăm chăl păng đei tơdrong tơplih. Apinh Ih ăn kơ jơhngơ̆m adrin sơng iŏk tơdrong bơtho păng tơdrong tơchĕng ling lang chơchă tơdrong hơgei đơ̆ng Kră Yang. Krao khan yua Anăn Kră Yang Yêsu Krist, Amen.
Lu bơ̆n kăl kơ pơm kiơ wă kơ jơhngơ̆m iơ̆m dim, adrin achăng tŭk dôm tơdrong yoch kơnê̆?
Đŏk Sơ̆p hla bơar Nơ̆r ‘Bok Kei-Dei lăm pêng sơnăm: II Kôrintô 3
Kênh Youtube BHKTHN:
