Klei Aê Diê Blŭ: Klei Bi Hriêng 27:22
Êlan kliăng: “Tơdah ih yua hlâo leh anăn tlê mnuih mluk hlăm êsŭng, bi lŭk hŏng braih, klei mluk ñu amâo srăng kbiă đuĕ mơ̆ng ñu ôh” (Klei Bi Hriêng 27:22)
Klei êmuh ksiêm mĭn: Ya klei bi hmô Mtao Salômôn yua čiăng bi êdah klei mnuih mluk khăng ai tiê? Ya klei ngă kơ mnuih amâo thâo kral ôh klei soh diñu pô leh anăn jing hĕ mnuih amâo dưi bi hriăm mjuăt ôh? Si ngă drei mă yua klei hriăm anei?
Êlan klei bi hriêng anei yua sa klei bi hmô jăk snăk čiăng lač kơ klei khăng ai tiê mnuih. Rup asăr braih hlăm êsŭng tlê hŏng hlâo brei ƀuh sa klei kpĭ prŏng snăk leh anăn klei bi hriăm mjuăt hŏng klei khăng. Ƀiădah lĕ, tơdah tŭ klei tlê bi ƀhĭ msĕ snăn dưn, klei mluk mnuih mluk ăt kăn srăng kbiă đuĕ rei mơ̆ng ñu. Tui si hdră yua klei blŭ hŏng klei thâo mĭn Klei Aê Diê Blŭ, boh blŭ “mnuih mluk” amâo djŏ čiăng lač kơ mnuih kƀah klei thâo săng ôh, ƀiădah čiăng lač kơ mnuih hngah kơ klei thâo mĭn, bi êmut kơ klei Aê Diê mkra mjuăt, leh anăn khăng kŏ êbat tui si êlan diñu pô čiăng. Êlan Klei Aê Diê Blŭ lŏ mñă tơdah anak mnuih hngah nanao kơ klei sĭt nik, klei mluk ƀơ̆ng êlam hlăm ai tiê diñu dleh snăk kbiă đuĕ.
Pruê̆ blŭ “klei mluk ñu amâo srăng kbiă đuĕ mơ̆ng ñu ôh” čiăng lač wăt tơdah kam kpŏk đuĕ leh mơ̆ng asăr braih, ƀiădah mnuih mluk kăn srăng kbiă đuĕ rei mơ̆ng bruă soh diñu ngă; leh anăn diñu hngah wăt kơ klei mkra mjuăt msĕ mơh. Hlăm klei hdĭp, Aê Diê khăng yua Klei Ñu Blŭ, yua phung gĭt gai klei hdĭp myang, yua gŏ sang, mah jiăng, tăp năng yua wăt klei knap mñai mơh čiăng mtô leh anăn bi hriăm mjuăt drei. Klei mkra mjuăt yơh jing mmông găl čiăng kơ drei dưi đĭ hriê kơ prŏng leh anăn mâo klei bi mlih. Ƀiădah tơdah sa čô mnuih amâo čiăng hmư̆ ôh, leh anăn bi khăng ai tiê nanao, snăn wăt tơdah mâo klei mkra mjuăt lu blư̆ dưn ăt kăn srăng mâo klei bi mlih rei. Klei mgao yơh ngă kơ mnuih amâo thâo kral ôh klei soh diñu leh anăn jing hĕ mnuih amâo dưi lŏ bi hriăm ôh.
Bruce Waltke čih leh snei, “Knŏng klei pap Aê Diê yơh jing klei čang hmăng dưi bi kkiêng mrâo mnuih mluk jing mnuih tŭ”. Klei bi mlih sĭt nik srăng kčưm mơ̆ng ai tiê. Jih jang klei mgô̆ amâodah klei mkra mjuăt hŏng klei khăng amâo dưi mjing klei thâo mĭn sĭt ôh. Knŏng hjăn Aê Diê yơh dưi bi mlih ai tiê mnuih. Tơdah drei bi luă gŭ drei pô leh anăn gưt asăp kơ Ñu, Khua Yang srăng bi mlih klei mĭn drei leh anăn ƀư̆ mkra knuih drei. Kyuanăn, mnuih thâo mĭn jing mnuih mâo ai tiê êdu êun, kăp dôk hmư̆ leh anăn mă tŭ klei bi hriăm mjuăt. Hrô kơ klei lŏ bi kdơ̆ng hŏng klei bi hriăm, mă tŭ bĕ klei Aê Diê bi mlih hlăm klei hdĭp drei.
Akâo Yang Mngăt Jăk bi hriăm drei ksiêm dlăng kơ ai tiê drei. Hrô kơ klei knŏng ƀuh klei mluk pô mkăn, brei drei êmuh kơ drei pô si ngă drei kăp mă tŭ mơ̆ klei Aê Diê mkra mjuăt amâodah hơăi. Sa čô mnuih luă gŭ leh anăn ênưih mtô lač srăng đru klei thâo mĭn Aê Diê mtrŭn agha hlăm klei hdĭp drei čiăng kơ drei đĭ hriê kơ prŏng leh anăn hriê kơ prŏng hlăm klei hdĭp myang.
Ya drei srăng ngă čiăng mâo ai tiê êdu êun, leh anăn jhŏng lui jih bruă ngă mơ̆ng klei soh?
Wah lač: Ơ Khua Yang, đru kâo djă pioh klei êdu êun čiăng kơ kâo mâo klei thâo mĭn ti anăp klei dleh dlan hlăm klei hdĭp leh anăn klei bi mlih. Brei bĕ kơ kâo ai tiê thâo kăp mă tŭ klei mkra mjuăt leh anăn klei mĭn tui duah nanao klei thâo mĭn Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
