Klei Aê Diê Blŭ: Y-Mathiơ 25:41-46
Êlan kliăng: “Leh anăn phung anăn srăng nao mŭt hlăm klei bi kmhal hlŏng lar, ƀiădah phung kpă srăng nao kơ klei hdĭp hlŏng lar” (Y-Mathiơ 25:46)
Klei êmuh ksiêm mĭn: Si Khua Yang phat kđi phung dôk tĭng điâo? Ya ngă diñu tŭ klei phat kđi ktrŏ msĕ snăn lĕ? Si Khua Yang čiăng phung đăo kơ Ñu hdĭp hdơ̆ng digơ̆?
Leh blŭ kơ phung dôk tĭng hnuă jing phung biăp sĭt Khua Yang. Khua Yang Yêsu wir blŭ kơ phung dôk tĭng điâo jing phung bê hơô klĭt biăp. Diñu ăt lač “Ơ Khua Yang, Ơ Khua Yang” mơh, ƀiădah diñu tŭ klei Khua Yang phat kđi ktrŏ snăk: “Ơ phung Aê Diê tăm pah leh, đuĕ bĕ mơ̆ng Kâo, nao mŭt hlăm pui ƀơ̆ng hlŏng lar mkra leh kơ yang jhat leh anăn kơ phung dĭng buăl ñu” (êlan 41). Khua Yang Yêsu brei thâo diñu tŭ klei phat kđi kyuadah diñu mâo knuih dôk dơ̆ng hŏng Khua Yang jhat snăk, amâo ngă sa mta klei kơ Khua Yang ôh. Diñu êmuh kơ Khua Yang hbĭl diñu ƀuh Khua Yang mâo klei čiăng kơ diñu đru, tơdah ƀuh diñu ngă leh. Ƀiădah Khua Yang lač: “Sĭt nik Kâo lač kơ diih, tơdah diih amâo tuôm ngă klei anăn kơ sa čô hlăm phung đơ điêt anei, jing msĕ si diih amâo tuôm ngă kơ Kâo ôh” (êlan 45).
Khua Yang Yêsu hưn klă kơ phung dôk tĭng điâo thâo ya ngă diñu tŭ hĕ klei tăm pah, diñu hdĭp amâo mâo klei khăp, amâo uêñ kơ pô mkăn ôh êngao kơ diñu pô, amâo thâo bi mbha, amâo čiăng săn asei kơ pô mkăn ôh. Diñu hdĭp hŏng klei čuôt klih, Anăn jing klei hdĭp amâo thâo uêñ pap ôh kơ phung ayŏng adei pô, wăt tơdah diñu mâo ƀiă klei uêñ mĭn đru pô mkăn, klei ngă anăn ăt jing klei ngă hŏng klei ai ngăm mơh, diñu đru kyuadah čiăng mjhua, duah klei tŭ dưn, leh anăn klei hing ang kơ diñu pô. Khua Yang ƀuh jih klei ai ngăm hlăm ai tiê diñu leh anăn Khua Yang amâo mơak ôh hŏng klei dôk dơ̆ng ƀơ̆ng huă anăn. Boh knhal tuč kơ jih jang phung dôk tĭng điâo jing diñu “srăng nao mŭt hlăm klei bi kmhal hlŏng lar” (êlan 46). Sa klei bi kmhal amâo mâo hruê ruê̆ ôh, kăn mâo mmông myun lŏ mkra rei.
Khua Yang Yêsu čiăng phung đăo kơ Ñu hdĭp hŏng klei sĭt nanao, bi êdah klei đăo hŏng bruă ngă hŏng klei khăp sĭt nik. Sa čô wăt tơdah nao bi kƀĭn ti sang Aê Diê jêñ jêñ, myơr hŏng klei kmah, tăp năng djă bruă hlăm sang Aê Diê mơh,…ƀiădah tơdah amâo mâo klei đăo sĭt ôh kơ Khua Yang, leh anăn klei đăo diñu amâo mâo ôh bruă ngă snăn ăt knŏng jing bê hơô klĭt biăp, ăt dôk hdĭp hŏng klei hdĭp hđăp ka mâo klei bi mlih ôh, thâo hdĭp knŏng kơ pô, duah klei tŭ dưn kơ pô. Amâo mâo klei dưi mdăp ôh ti anăp Pô Thâo Jih Jang Mnơ̆ng. Jih jang bruă drei ngă hŏng klei ai ngăm Ñu čih pioh leh sơăi leh anăn drei srăng dôk ti anăp Ñu hlăm hruê phat kđi. Hdĭp mă bruă kơ Khua Yang jing thâo uêñ kơ phung ayŏng amai adei drei dôk hlăm klei dleh dlan knap mñai msĕ si klei Khua ƀĭng kna Y-Pôl mtă leh snei: “Đăm brei drei jing êmăn ôh hlăm klei ngă jăk, kyuadah tơdah drei amâo êdu ai ôh drei srăng wiă tơdah truh djŏ yan. Snăn êjai hruê găl, brei drei ngă jăk kơ jih jang mnuih, boh nik nak kơ phung ayŏng adei hlăm klei đăo” (Galati 6:9-10).
Hlăm hruê knhal tuč, drei thâo kơ drei Khua Yang brei dôk tĭng hnuă hĕ amâodah tĭng điâo?
Wah lač: Ơ Khua Yang, kâo thâo amâo mâo sa mta klei dưi mdăp ti anăp Ih ôh, đru kâo đăo sĭt kơ Ih čiăng klei hdĭp kâo mâo klei bi mlih mrâo, čiăng kơ kâo amâo hdĭp hŏng klei čuôt klih ôh ƀiădah thâo khăp kơ phung ayŏng amai adei kâo djŏ tui si knuih mrâo Ih brei leh kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 129-131
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
