Mathais 25:41-46
Nqe cim zaj kawm:
“Cov neeg ntawd yuav raug txim mus ibtxhis li, tiamsis cov neeg ncaj ncees yuav tau txojsia ntev dhawv mus ibtxhis tsis kawg.” (Mathais 25:46)
Lus nug xav:
– Tus Tswv foom rau cov neeg uas nyob sab laug li cas?
– Vim li cas lawv thiaj raug foom hnyav npaum ntawd?
– Tus Tswv xav kom Nws cov menyuam ib leeg ua neej nrog ib leeg li cas?
Tomqab uas hais rau cov neeg nyob sab xis, uas yog tus Tswv cov yaj tiag, Tswv Yexus tig los hais rau cov neeg uas nyob sab laug, uas yog tshis hnav tawv yaj. Lawv kuj hu tias, “Tus Tswv, tus Tswv” tiamsis lawv raug tus Tswv hais hnyav heev, hais tias: “Nej cov uas raug Vajtswv foom tsis zoo. Nej cia li khiav ntawm kuv mus rau hauv lub cubtawg uas cig tsis paub tuag mus ibtxhis uas twb npaj tseg rau dab Ntxwgnyoog thiab nws cov tubtxib mus nyob lawm!” (nqe 41). Tswv Yexus qhia tias lawv raug rau txim vim lawv tau ua phem rau Nws; lawv tsis tau ua ib yam dabtsi pab Nws li. Lawv nug tus Tswv hais tias lawv tsis tau pom tus Tswv muaj yam dabtsi cheemtsum lawv pab, yog lawv pom mas lawv yeej yuav pab lawm. Tiamsis tus Tswv teb hais tias: “Kuv qhia tseeb rau nej hais tias, qhov uas nej tsis pab cov neeg no tus uas yau dua cov, ces yog nej tsis pab kuv ntag” (nqe 45).
Tswv Yexus qhia meej rau cov neeg uas nyob sab laug paub tias vim li cas lawv thiaj raug Nws foom. Lawv tsis ua neej sib hlub, tsis quav ntsej txog leejtwg li tsuas yog xav txog lawv tus kheej xwb; lawv tsis paub pub lwm tus thiab tsis kam siv yam lawv muaj mus pab lwm tus. Lawv lub neej puv nkaus kev qia dub. Ntawd yog lub neej tsis quav ntsej thiab tsis muaj lub siab khuvleej lawv tej kwvtij nkauj muam. Txawm muaj qee zaus lawv pab lwm tus los, los kuj tsuas yog ua dag ua ntxias, kom muaj nqis rau lawv tus kheej, kom lawv tau koob meej xwb. Tus Tswv pom tseeb txhua yam kev dag ntxias uas nyob hauv lawv lub siab, thiab Nws tsis txaus siab rau lub neej zoo li ntawd. Qhov kawg ntawm cov neeg uas nyob sab laug yog “yuav raug txim mus ibtxhis li” (nqe 46), yog ib txojkev raug txim uas tsis muaj hnub kawg thiab tsis muaj sijhawm rov kho dua lawm.
Tswv Yexus yeej xav kom Vajtswv cov menyuam ua lub neej tseeb, qhia tshwm lawv txojkev ntseeg dhau ntawm kev hlub uas qhov muag pom. Ib tug neeg txawm mus pehawm Vajtswv tsis tu ncua, fij nyiaj ntau, txawm tuav haujlwm hauv Pawg Ntseeg los xij, tiamsis yog nws tsis muaj txojkev ntseeg tseeb rau tus Tswv, thiab nws txojkev ntseeg tsis muaj haujlwm zoo nrog, ces nws kuj tsuas yog tshis hnav tawv yaj xwb. Nws tseem ua lub neej qub raws li nws tus cwjpwm qub, tsuas paub nrhiav qhov zoo rau nws tus kheej xwb. Tsis muaj ib yam dabtsi yuav zais tau ntawm tus Vajtswv tus uas paub txhua yam. Txhua yam kev ua dag ua ntxias ntawm peb lub neej, Nws pom tas huv tib si, thiab muaj ib hnub peb txhua tus yuav tsum sawv ntawm Nws lub rooj txiav txim. Ua neej ua Vajtswv tes haujlwm yog paub saib xyuas thiab pab peb tej kwvtij nkauj muam uas tabtom ntsib kev nyuaj siab, raws li Timthawj Paulus qhuab ntuas hais tias: “Yog li ntawd, peb tsis txhob nkees ua tej haujlwm zoo; yog peb pheej ua tsis tso tseg, muaj ib hnub peb yeej yuav tau sau xwb. Txhua lub sijhawm uas peb pab tau lwm tus, peb yuav tsum pab, tiamsis peb yuav tsum pab cov ntseeg heev dua” (Kalatias 6:9-10).
Thov Vajtswv,
Tus Tswv, nyuam yaus paub tias tsis muaj ib yam dabtsi yuav zais tau ntawm Koj xubntiag. Thov Koj pab kom nyuam yaus muaj txojkev ntseeg tseeb rau Koj, kom nyuam yaus lub neej tau hloov dua tshiab, thiab kom nyuam yaus tsis ua neej qia dub, tiamsis paub sib hlub thiab sib pab raws li tus yamntxwv tshiab uas Koj pub rau nyuam yaus. Nyuam yaus tuav Tswv Yexus Khetos lub npe thov, Amees.
Hnub uas tus Tswv rov qab los, peb puas paub tseeb tias peb yuav sawv ntawm sab xis lossis sab laug?
Nyeem Vajluskub hauv peb lub xyoos: Ntawv Nkauj 129-131
Kênh Youtube BHKTHN:
