Chivkeeb 13:14-18
Nqe cim zaj kawm:
“Nimno, koj cia li sawv kev mus kom thoob plaws lub tebchaws no, rau qhov kuv yuav muab tagnrho lub tebchaws no pub rau koj.” Yog li ntawd, Anplas thiaj li tsiv tawm ntawm thaj chaw ntawd thiab mus tsa tsevntaub nyob ze tsob ntoo xeeb ntawm thaj chaw Males hauv lub nroog Henploos, thiab thaum nyob ntawd nws teeb tau ib lub thaj ua chaw fij khoom rau tus TSWV.” (Chivkeeb 13:17-18)
Lus nug xav:
– Tomqab uas cais ntawm Lauj lawm, Vajtswv coglus dabtsi rau Anplas?
– Anplas ua li cas rau Vajtswv tej lus cogtseg ntawd??
– Peb yuav qhia tshwm peb txojkev ruaj siab rau tus Tswv li cas?
Tomqab uas rov qab ntawm tebchaws Iziv los rau tebchaws Kana-as, Anplas tau cais ntawm nws tus xeebntxwv Lauj. Lauj xaiv lub tiaj nrag nplua nuj nyob sab hnub tuaj ntawm tus dej Yauladees los ua chaw nyob, hos Anplas tseem nyob twjywm ntawm qhov chaw qub. Nws ua raws li tus Tswv txojkev coj mus rau qhov chaw uas Vajtswv qhia nws lawm. Tiamsis ntau xyoo dhau mus, nws tseem tsis tau pom tej uas Vajtswv coglus rau nws muaj tiav. Lub tebchaws uas Vajtswv coglus pub tseem tsis tau yog nws li, vim twb muaj lwm haivneeg nyob lawm, muaj kev tshaib nqhis tshwmsim, thiab nimno tseem muaj kev sib cais ntawm nws thiab Lauj. Nyob rau hauv tej tsamthawj ntawd, Vajtswv rov los cuag Anplas thiab rov hais txog Nws tej lus cogtseg uas Nws twb hais rau Anplas ua ntej lawm. Tus Tswv hais tias: “Kuv yuav muab tagnrho lub tebchaws uas koj qhovmuag pom ntawd pub rau koj thiab koj cov xeebntxwv, thiab lub tebchaws ntawd yuav yog koj tug mus ibtxhis li” (nqe 15).
Vajtswv coglus tias Nws yuav muab lub tebchaws pub rau Anplas, tsis yog ib thaj chaw me xwb, tiamsis yog “tag nrho” lub tebchaws, sab hnub tuaj, sab hnub poob, sab qab teb thiab sab qaum teb uas nws pom. Vajtswv kuj coglus tias Anplas yuav muaj “xeebntxwv”, lo lus no rov hais dua ntau zaus hauv ntu Vajluskub no. Qhov no tseemceeb heev rau qhov ntawd yog lub sijhawm uas Anplas twb laus lawm, nws tus pojniam Xalais tseem tsis tau muaj menyuam, hos nws tus xeebntxwv Lauj kuj nyuam qhuav cais ntawm nws lawm. Tus Tswv kuj hais rau Anplas hais tias: “Nimno, koj cia li sawv kev mus kom thoob plaws lub tebchaws no, rau qhov kuv yuav muab tagnrho lub tebchaws no pub rau koj” (nqe 17), kom nws mus pom thiab paub qhov tseeb txog thaj av uas Vajtswv yuav pub rau nws zoo licas.
Tomqab uas hnov Vajtswv tej lus lawm, Anplas “thiaj li tsiv tawm ntawm thaj chaw ntawd thiab mus tsa tsevntaub nyob ze tsob ntoo xeeb ntawm thaj chaw Males hauv lub nroog Henploos, thiab thaum nyob ntawd nws teeb tau ib lub thaj ua chaw fij khoom rau tus Tswv” (nqe 18). Nws mus raws li Vajtswv hais, qhia tias nws ruaj siab rau Vajtswv tej lus cogtseg, txawm nws tseem tsis tau totaub tias tej lus ntawd yuav muaj tiav li cas los xij. Nws teeb lub thaj fij xyeem los qhia tias nws pehawm thiab tso siab rau Vajtswv.
Peb txojkev nrog tus Tswv mus muaj qee lub sijhawm kuj zoo li Anplas, peb mus raws Vajtswv tej lus cogtseg, tiamsis tseem tsis tau pom tej ntawd muaj tiav. Txawm li ntawd los, peb paub tseeb tias Vajtswv yog tus ncaj ncees rau Nws tej lus cogtseg, thiab lub sijhawm uas Nws pub yeej yog lub sijhawm zoo tshajplaws. Yog li ntawd, peb cia li tso siab thiab mus raws li tus Tswv lub suab, ua txhua yam uas tus Tswv xav kom peb ua. Hauv txhua qhov chaw uas peb nyob thiab ua haujlwm, peb cia li pehawm tus Tswv los ntawm peb lub neej. Cia li ua kom txojkev pehawm tus ntxhiab tsw qab nthuav mus rau txhua qhov uas peb txhais kotaw mus txog.
Thov Vajtswv,
Tus Tswv, ua Koj tsaug vim Koj nrog nraim nyuam yaus thiab rov qhia txog Koj lub siab nyiam rau nyuam yaus lub neej thaum nyuam yaus ntxhov siab thiab qaug zog. Txawm nyuam yaus tabtom ntsib xwm txheej zoo li cas los xij, nyuam yaus txiav txim siab yuav ruaj siab rau Koj tej lus cogtseg. Thov Koj pab kom nyuam yaus sawv ruaj khov thiab mus raws Koj lub suab hu. Thov cia nyuam yaus siv tag nrho cev nqaij daim tawv, ntsujplig thiab txojsia los pehawm thiab qhuas Koj. Nyuam yaus tuav Tswv Yexus Khetos lub npe thov, Amees.
Yam dabtsi qhia tias peb tseem ruaj siab rau tus Tswv tej lus cogtseg, txawm peb tabtom ntsib xwm txheej tsis zoo?
Nyeem Vajluskub hauv peb lub xyoos: Ntawv Nkauj 126-128
Kênh Youtube BHKTHN:
