II Timautes 1:3-5
Nqe cim zaj kawm:
“Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg.” (II Timautes 1:5)
Lus nug xav:
– Timthawj Paulus hais txog ob yam twg ntawm Timautes txojkev ntseeg?
– Tsamthawj twg “Kev Ntseeg Raws Cajces” yog yam zoo lossis tsis zoo?
– Peb yuav ua li cas thiaj tsim tau ib cajces uas paub ntseeg thiab hwm tus Tswv hauv peb tsevneeg?
Thaum Timthawj Paulus nco txog nws tus tub sab ntsujplig thiab thov Vajtswv nrog kua muag, nws tau hais txog ob yam ntawm Timautes txojkev ntseeg: Qhov xubthawj yog “muab siab rau ntseeg” txhais hais tias Timautes muaj “txojkev ntseeg tiag, tsis dag.” Qhov ob, txojkev ntseeg ntawd muaj nyob hauv Timautes pog thiab nws niam, kuj muaj nyob hauv Timautes, Timthawj Paulus hais tias: “koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg” (nqe 5). Qhov no qhia tias Timautes yug los hauv ib tsevneeg uas ibtxwm muaj kev hwm thiab ntseeg tus Tswv. Txojkev ntseeg hauv tsevneeg tau khaws cia thiab muab qhia txuas ntxiv dhau ntau tiam neeg.
Nyob hauv Vajluskub muaj ntau zaus tus Tswv hais tias: “Kuv yog koj cov yawgkoob tus Vajtswv, yog Anplahas, Ixaj thiab Yakhauj tus Vajtswv” (Khiav Dim 3:6, 3:15; Mathais 22:32; Malakaus 12:26,…). Nyob ntawm no, Timthawj Paulus hais txog txojkev ntseeg uas nyob hauv pog, hauv niam thiab hauv Timautes tus kheej. Ob yam kev hais no puavleej siv raws lub ntsiab lus zoo, hais txog ib cajces uas ntseeg tus Tswv los ntawm txojkev ntseeg tau khaws cia thiab cob qhia txuas ntxiv dhau ntau tiam neeg. Txojkev ntseeg dhau ntau tiam hauv ib tsevneeg yog yam tsimnyog zoo siab thiab ua Vajtswv tsaug, thiab kuj yog yam uas peb yuav tsum siv zog ua kom muaj hauv peb lub neej thiab hauv peb tej menyuam xeebntxwv. Qhov tseeb qhia pom tias, cov neeg uas yug hauv tsevneeg ntseeg, thaum lawv qaug zog lossis ntsib kev kub ntxhov, lawv yuav nrhiav tau kev pab tsimnyog los pab lawv rov sawv khov kho yooj yim dua lwm tus. Kuj yog ib qho tu siab heev thaum ib tiam niamtxiv ntseeg tus Tswv, tiamsis lawv tej menyuam xeebntxwv ho tsis ntseeg lawm (xws li tus povthawj Elis, tus cev Vajtswv lus Xamuyees, thiab lwm tus). Tej xwm txheej uas tu siab no qhia peb pom tias txojkev ntseeg tiag tiag uas “nyob” hauv pog yawg thiab niamtxiv tsis yog yuav cim civ xya ntxiv lossis cia li muaj mus rau tej menyuam xeebntxwv. Yog li ntawd, Vajluskub thiaj ceebtoom ntau zaus kom peb mob siab qhia Vajtswv Txojlus rau menyuam hais tias: “Nej yuav tsum muab qhia rau nej tej menyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua haujlwm” (II Kevcai 6:7; 11:19).
Niaj hnub nimno, muaj ntau tsevneeg zoo siab rau lawv tsevneeg txojkev ntseeg, tiamsis kuj muaj qee tsevneeg uas muaj “kev ntseeg raws cajces” tiamsis cov menyuam xeebntxwv tiam ho tsis tuav kev ntseeg lawm. Kev ntseeg raws cajces yog hais tias ib tsevneeg ntau tiam sib cob qhia kom tuav ruaj txojkev ntseeg thiab hwm tus Tswv yog ib yam uas tsimnyog peb ua Vajtswv tsaug. Kev ntseeg raws cajces tsuas tsis zoo thaum txojkev ntseeg tiag tiag uas “nyob” hauv pog yawg thiab niamtxiv ho tsis “nyob” ntxiv hauv tiam menyuam xeebntxwv lawm. Ua Vajtswv tsaug uas Nws cawm peb dim thiab muab peb tso rau hauv ib tsevneeg uas ntseeg tus Tswv lossis tseem tsis tau ntseeg. Txawm yuav zoo li cas los xij, peb yuav tsum tuav rawv peb txojkev ntseeg, ua neej ua qauv zoo thiab mob siab qhia txojkev ntseeg ntawd rau tiam tomntej. Yog peb mob siab muab txojkev ntseeg cob txuas ntxiv rau tej menyuam thiab tej xeebntxwv, ces tus Tswv yuav pub ib cajces uas ntseeg tus Tswv thiab tau koob hmoov rau peb.
Thov Vajtswv,
Tus Tswv, thov Koj pab kom nyuam yaus tsim tsa txojkev ntseeg tseeb rau tsevneeg, kom txhua tus muaj txojkev ntseeg uas muaj sia, thiaj muaj peevxwm cob qhia txojkev ntseeg rau tiam tomntej. Nyuam yaus tuav Tswv Yexus Khetos lub npe thov, Amees.
Peb yuav ua dabtsi thiaj tsim tsa tau txojkev ntseeg tseeb thiab muab txojkev ntseeg ntawd cob qhia rau tiam tom ntej?
Nyeem Vajluskub hauv peb lub xyoos: Xakhaliyas 13
Kênh Youtube BHKTHN:
