Jôsuê 6:1-5
“Nơ̆r Ih pơkă wă wei tơdrong arih inh. ‘Nâu boih tơdrong mă pơlung inh lăm năr pơmat-tat.” (Hơriso 119:50)
Nơ̆r jet tơchĕng pơwao:
– Dur pơlei Jêrikô kơ jăp thoi yơ?
– Kră Yang pơkă kơ Jôsuê păng lu kon pơlei Israel kăl kơ pơm tơdrong kiơ hơdrol kơ wă blah pơlei Jê-ri-cô?
– Lu bơ̆n kăl kơ pơm tơdrong kiơ wă kơ blah kĕ jei lăm tơdrong gah bơhngol?
Bơngai lăm pơlei Jêrikô tah lê̆ ‘măng dur bơih, lu sư dan linh wei kơjăp, bơngai ưh kơ gơh mơ̆t lĕch yua kơ hli kơ bơngai Israel. Kiơ̆ kơ lu bơngai đei hơlei tơdrong mă hlôi đunh bơih, Dur Jêricô kơjăp tơpă, đei lơ hơtăl. Tuch luch kơ dur tơ ala noh jơ̆ hăm hơbong teh, đơ̆ng rŏng kơ’noh dur đei man kơ jung hăm tơ mo tih kơ jung truh tơ 4 dah 5 met. Tơ kơpal noh pơm păng teh lân hơ’bơ̆l dang 2 met, kơjung dang truh kơ 6-8 met. ‘bar hơtăl âu jô̆ pơđĭ dur kơjung dang 10-12 met. Tuch luch đĭ đăng lăm dur noh jơ̆ pơm păng gach lân. Pơ ma kiơ̆ kơ kon bơngai kon pơlei Israel ưh kơ gơh wă blah hlôi kơ pêng hơtăl dur âu.
‘Bok Jôsuê hăm kon pơlei mơ̆ng tơdrong đơ̆ng Kră Yang ‘Bok Kei-Dei bơtho khan păng pơm kiơ̆ kơ jơnăr mă trŏ thoi ‘Bok Kei-Dei pơkă. Gah jơhgơ̆m lu sư ưh kơ gơh hli păng bơ̆l hăl mă lei kăl kơ băt Kră Yang đei ba ăn tơdrong blah jei lu sư hơdrol bơih. Kră Yang đei khan lê̆ Kră Yang pơjao pơtao Jêrikô hăm lu bơngai nuih pran lăm tơdrong kĕ jei ăn kơ Jôsuê bơih. Gah tơdrong wă pơm, Kră Yang athei lu năm jơ̆ng hoh yak tăp dăr kơ pơlei Jêrikô, minh năr minh wơ̆t lăm tơdrâu năr. Tơ pơh ‘nu ‘bok soi tung Hom Pơgơ̆p, păng hlôm tơgiĕp, tơgiĕp đei pơm păng hơke ưh kơ đei pơm hăm maih. Tơgiĕp âu đei tơ’bôh kơ Kră Yang ‘Bok Kei-Dei oei hơdai (Lĕch đơ̆ng Êyiptơ 19:16) păng tơdrong kơkuh kơ ‘Bok Kei-Dei (Lêwi 25:9). Truh tơnăr mă tơpơh, lu kon pơlei athei yak tơpơh ‘măng păng lu ‘bok soi athei hlôm mă đunh, mơ̆ng nơ̆r tơgiĕp âu lu kon pơlei athei ôr mă re. Kră Yang pơkă dur gô pơchah. Kon pơlei gô mơ̆t lăm pơlei noh.
‘Bok Jôsuê păng kon pơlei lu sư hoei hơ hli krê, dah đei tơdrong kơdŭn kơplah đei tơdrong hơnat âu mă lei lu sư đei mơ̆ng nơ̆r Kră Yang bơtho păng đei tơdrong pơchŭt dih băl wă kơ pơm kiơ̆. Khul Bơngai Lui kư̆m nhen thoi linh Kră Yang. Lu bơ̆n đei tơdrong tơ’blah hăm teh đak âu, hăm tơdrong ‘maih wă gah sĕch akar hăm lu yang kơnê̆ (Êphêsô 2:1-3). Pêng tơdrong âu đei pơ pôi băl kư̆m nhen thoi pêng hơtăl dur Jêrikô. Lu bơ̆n ưh kơ gơh lăng dur kơjung na hli tơrơ, dah kơdŭn. Kơplah đei tơdrong yoch, tơdrong juăt kơ pơm mă ưh kơ ‘lơ̆ng, dah đei tơdrong kơnê̆, tơdrong ưh kơ ngeh dah đei tơdrong pơgăn, tơdrong hơnat noh jơ̆ nhen thoi dur đei pơgăn kăl kơ yak hlôi, hơdrol hloh athei mơ̆ng nơ̆r Kră Yang păng krao khan apinh tơdrong tơ’bôh đơ̆ng Kră Yang. Kră Yang pơkă gô ăn tơdrong kĕ jei (Bơtho Khôi Juăt 20:4). Lu bơ̆n kăl kơ yak năm hăm đon lui ưh kơ yak năm hăm ‘măt ‘bôh. Athei chă Kră Yang rim năr lăm tơdrong đŏk hŏk pơhrăm Nơ̆r Sư wă kơ băt dôm tơdrong mă Kră Yang đei pơkă, đei nơ̆r pơchŭt, păng bơtho tơ’bôh păng kĕ jei.
Ơ Kră Yang, apinh Ih ăn kơ inh hoei kơ hli krê, păng đei tơdrong kơdŭn kơplah đei tơdrong hơnat păng lui kơ Kră Yang gô blah tơplih kơ inh. Apinh Ih pơih mă inh, pơih đon inh wă kơ băt Ih đei pơ ma khan kơ inh tơdrong kiơ kơplah inh đei hơnat hăm Nơ̆r Ih. Yua anăn Kră Yang Yêsu Krist. Amen
Lu bơ̆n oei chơ chă Kră Yang rim năr hăm tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sôphôni 3
Kênh Youtube BHKTHN:
