I Kôrintô 7:10-11
“Bre sư ưh pă thoi ‘bar ‘nu bơngai boih, bre sư thoi minh ‘nu bơngai đĕch. Yua kơ thoi noh na kon bơngai bơ̆n ưh kơ gơh achăng lê̆ akăn sư ôh, yua kơ ‘Bok Kei-Dei pơgơ̆p bre sư jing klo kăn boih.” (Mathiơ 19:6)
Nơ̆r jet tơchĕng pơwao:
– ‘Bok Pôl pơma pran jăng nơ̆r tơtă ayơ Kră Yang bơtho kơ hnam dơnŏ bơngai lui?
– Pơm ling lang lăm Kră Yang gah ŭnh om noh kiơ?
– Trong ayơ lăm ŭnh om kơ plah đei tơdrong pơma dih băl, ưh kơ pôm jơ-hngơ̆m?
Pơih blŭng a, ‘bok Pôl pơma jăng ‘nâu bơih nơ̆r Kră Yang tơtă ăn kơ lu bơngai lui đei hnam dơnŏ lăm Kră Yang, khan đei minh tơdrong tơguăt băl kơjăp dêh lăm ŭnh om ưh kơ gơh tơklah băl, “akăn ưh kơ gơh achăng klo”… na klo kư̆m lei lăi ưh kơ achăng akăn” (trong 10-11). Bre klo kăn ưh kơ gơh chăng dih băl mă khan đei tơdrong thoi yơ hĭ, ăp kơ minh lăm ‘bar ‘nu noh hưch kơ bơngai nai na Kră Yang gơh ăn” (Mathiơ 5:31-32) hăm lu bơngai mơ’nah “đei tơklah dih băl, athei arih thoi noh ‘nĕ pă iŏk klo plơ̆ng; dah mă pơgơ̆p băl hăm klo so” (trong 11) Nơ̆r bơtho âu rơđah kiơ̆ thoi Kră Yang wă lăm tơdrong tơguăt ŭnh om, dah wă chă klo, sư athei yĕng kơ klo sư đĕch.
Ŭnh om đơ̆ng Kră Yang noh bơih đơ̆ng Kră Yang pơgơ̆p bơngai drŏ nglo drŏ kăn ‘bơ̆t anăp ‘Bok Kei-Dei. Tơ’ngla ‘Bok Kei-Dei pơjing tơdrong ŭnh om kơ kon bơngai bơ̆n: “Yua kơ thoi noh na bơngai drŏ-nglo gô tơklah đơ̆ng mĕ ‘bă sư na oei hơdai hăm akăn sư, na ‘bar ‘nu bre sư jing minh sĕch minh akar.” (Blŭng a 2:24). Lăm pah so sơ̆, Kră Yang khan kơ kon pơlei Sư. “Inh areh dêh kơ bơngai bu mă hrĕch achăng akăn” (Malachi 2:16). Lăm Pah ‘Nao, Kră Yang Yêsu pơma hơđăl: “Bre sư ưh pă thoi ‘bar ‘nu bơngai boih, bre sư thoi minh ‘nu bơngai đĕch. Yua kơ thoi noh na kon bơngai bơ̆n ưh kơ gơh achăng lê̆ akăn sư ôh, yua kơ ‘Bok Kei-Dei pơgơ̆p bre sư jing klo kăn boih.” (Mathiơ 19:6), tơdrong ‘nâu đei tơbăt ŭnh om lăm Kră Yang jơ̆ minh tơdrong tơguăt băl kơjăp sot đunh. Kơplah đei tơdrong rŭng răng truh. Athei ‘blŏk ŭnh om đơ̆ng Kră Yang pơgơ̆p, thoi noh athei pơma pơhyôk dih băl noh bơih tơdrong ‘lơ̆ng. Đĭ đăng kon bơngai ưh kơ đei bu gơh tơklah dih băl, achăng băl, răm rai dôm tơdrong noh Kră Yang ưh kơ lăp đon ôh, ưh kơ thoi Sư wă.
Tơdrong ŭnh om hnam dơnŏ lăm tơduă kon bơngai yoch ưh kơ wer ôh đơ̆ng tơdrong pơma dih băl, ưh kơ lăp đon dih băl. Trong kiơ̆ kơ lu bơngai ala teh âu noh hrĕch achăng băl, mă lei kon Pơlei Kră Yang athei tơchĕng ‘nĕ rok trong ‘noh. Athei tơblŏk dih băl ŭnh om âu đơ̆ng Kră Yang ‘Bok Kei-Dei pơjing, păng nơ̆r bơ̆n pơkă ‘bơ̆t anăp Kră Yang păng khŭl bơngai lui lăm năr pơkong klo kăn athei chih răk yua kơ tơdrong âu lu bơ̆n đei pơkă pơkăm gĭt tơpă. Dah đei pơma chrih băl, ‘nĕ kơ blĕk ơh dih băl, areh arĕnh dih băl… dah pơm kơ bơ̆n chhur nuih. Rŏ lăng lu tơdrong anat dêh wă achăng tŭk hloi, mă lei ‘nĕ ăn kơ lu tơdrong noh pơm kơ bơ̆n dah bơngai ayơ pơchŭt lăm tơdrong ŭnh om mă đơ̆ng Kră Yang pơgơ̆p ăn. Athei krao khan wă kơ Kră Yang păng Nơ̆r Sư chông anhăk, păng sĭt tơpă kiơ̆ Kră Yang lăm tơdrong ŭnh om lu bơ̆n tơpăt păng hơmet ming dơ̆ng.
Ơ Kră Yang, apinh Ih tuh pŭn hiôk kơ ŭnh om inh wă kơjăp kiơ̆ thoi Ih wă. Apinh tơblŏk kơ inh dôm nơ̆r pơkă păng pơkă pơkăm hăm Kră Yang lăm phĕt pơkong wă kơ inh huay kơ kiơ̆ jơhngơ̆m kơdih dah kiơ̆ đe pơchŭt. Apinh Ih tơgŭm kơ ŭnh om inh đei pơ-ư anăn Ih. Yua anăn Kră Yang Yêsu Krist. Amen
Lu bơ̆n hăm oei ‘blŏk ưh nơ̆r bơ̆n pơkă lăm năr pơkong? Lu bơ̆n pơm kiơ̆ nơ̆r pơkă âu thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 123-125
Kênh Youtube BHKTHN:
