Klei Aê Diê Blŭ: I Kôrantô 7:10-11
Êlan kliăng: “Snăn diñu amâo lŏ jing dua ôh, ƀiădah knŏng sa kđeh. Snăn đăm brei mnuih bi ktlah ôh ya mnơ̆ng Aê Diê bi mguôp leh mbĭt.”(Y-Mathiơ 19:6)
Klei Êmuh ksiêm mĭn: Ya klei Khua Yang mtă Khua ƀĭng kna Y-Pôl mñă kơ dŭm gŏ sang phung đăo kơ Krist? Ya klei mĭn lă lar Aê Diê čiăng hlăm klei bi dôk ung mô̆? Ya hdră msir kơ ung mô̆ drei tơdah mâo klei mneh msao, amâo thâo bi djŏ?
Mphŭn kčưm, Khua ƀĭng kna Y-Pôl mñă anei jing klei Aê Diê pô mtă kơ phung đăo mkŏ mjing leh gŏ sang hlăm Khua Yang, jing mâo sa klei bi mguôp kjăp snăk hlăm klei bi dôk ung mô̆ amâo dưi bi bi ktlah ôh, “Đăm brei mô̆ lui ung ñu ôh …đăm brei ung lui mô̆ ñu ôh” (êlan 10-11). Jing ung leh anăn mô̆ amâo dưi ôh mă ya mta phŭn čiăng akâo bi lui, êngao kơ boh klei sa hlăm dua čô tlĕ piu mâo Khua Yang Yêsu brei (Y-Mathiơ 5:31-32). Hjăn hŏng đa đa mnuih “ƀiădah tơdah ñu lui ung ñu, brei ñu dôk hliê, amâodah brei ñu lŏ wĭt dôk ung ñu” (êlan 11). Klei mtô anei lač kơ klei Khua Yang čiăng hlăm klei bi dôk ung mô̆ kluôm ênŭm, phung mô̆ brei dôk snăn čiăng mâo klei găl lŏ bi grăng hŏng ung,
Klei bi dôk ung mô̆ hlăm Khua Yang jing klei bi mguôp yuôm bhăn plah wah dua čô êkei mniê ti anăp Aê Diê. Ñu mjing leh ung mô̆ tal êlâo kơ Y-Ađam- H’Êwơ, leh anăn Ñu hưn mdah klei bhiăn bi dôk ung mô̆ kơ anak mnuih: “Kyuanăn yơh êkei srăng lui amĭ ama ñu, leh anăn srăng dôk mbĭt hŏng mô̆ ñu, leh anăn diñu srăng jing sa kđeh” (Klei Mphŭn Dơ̆ng 2:24). Hlăm ênuk Klei Bi Mguôp Hđăp, Aê Diê lač hŏng phung ƀuôn sang Ñu, “Kyuadah kâo bi êmut kơ klei bi lui ung mô̆” (Y-Malaki 2:16). Leh anăn hlăm Klei Bi Mguôp Mrâo, Khua Yang Yêsu bi mklă: “Snăn diñu amâo lŏ jing dua ôh, ƀiădah knŏng sa kđeh. Snăn đăm brei mnuih bi ktlah ôh ya mnơ̆ng Aê Diê bi mguôp leh mbĭt” (Y-Mathiơ 19:6). Klei anei brei ƀuh bi dôk ung mô̆ hlăm Khua Yang jing klei bi mguôp kjăp leh anăn sui. Tơdah mâo klei rŭng răng truh, brei hdơr ung mô̆ jing kyua Aê Diê pô bi mguôp, kyua anăn bi grăng jing hdră msir. Jih anak mnuih amâo mâo ôh hlei pô dưi bi ktlah. Bi lui, bi kruh amâo dôk hlăm klei Khua Yang čiăng ôh.
Klei hdĭp ung mô̆, gŏ sang plah wah phung mnuih soh jhat amâo dưi ñĕ ôh kơ klei rŭng răng, amâo thâo bi djŏ. Hdră msir ênưih hĭn mơ̆ng ala ƀuôn jing bi lui, ƀiădah phung ƀuôn sang Aê Diê brei lăm lui klei mĭn anei. Brei hdơr ung mô̆ drei jing kyua Aê Diê mkŏ mjing, leh anăn dŭm klei ƀuăn hŏng Aê Diê ti anăp Phung Sang Aê Diê hlăm klei bi dôk ung mô̆ brei hdơr kyua anei jing klei ƀuăn rơ̆ng yuôm bhăn snăk. Tơdah mâo klei amâo thâo bi djŏ, đăm ôh brei klei ngêñ, bi êmut, bi roh… kiă kriê. Năng ai klei anăn dleh drei lui hĕ mtam, ƀiădah đăm brei klei anăn ăt msĕ mơh hlei pô mčhur hlăm klei jing ung mô̆ kyua Aê Diê bi mguôp. Brei wah lač čiăng kơ Khua Yang leh anăn Klei Aê Diê Blŭ mtô, leh anăn klă sĭt klei Khua Yang čiăng kơ ung mô̆ drei jing sĭt suôr leh anăn bi mrâo.
Drei dôk hdơr ya klei ƀuăn hlăm klei bi kuôl pô mơ̆? Si drei hlue ngă klei ƀuăn anei?
Wah lač: Ơ Khua Yang, akâo kơ Ih hơêč hmưi kơ klei jing ung mô̆ kâo dưi kjăp nanao hlue si Khua Yang čiăng. Akâo kơ Ih đru kâo hdơr kơ klei ƀuăn leh anăn ƀuăn rơ̆ng leh hŏng Ih hlăm klei bi kuôl čiăng kơ kâo amâo tŭ kơ klei amâo jăk amâodah ya klei mtrŭt atăt gai. Akâo kơ Ih đru kơ ung mô̆ kâo bi guh kơang Anăn Ih nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 123-125
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
