Mathais 25:14-23
Nqe cim:
“Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug!” (Mathais 25:21)
Lus nug xav:
– Ua ntej yuav mus deb, tus tswv cob yam dabtsi rau cov tubtxib?
– Vim li cas tus tubtxib ua tsam tsib caug choj kuj tau qhuas ib yam li tus tubtxib ua tsam nees nkaum choj xwb?
– Peb cheemtsum ua dabtsi kom tau tus Tswv qhuas tias yog tus tubtxib zoo thiab ncaj ncees?
Tswv Yexus rov qab siv lus pivtxwv los txhawb Nws cov thwjtim lub zog kom ncaj ncees ua tus Tswv tes haujlwm tos hnub Nws rov qab los. Ib tug tswv yuav mus kev deb, hu nws cov tubtxib los thiab cob haujlwm rau lawv ua, ib tug tau txais tsib caug choj nyiaj, ib tug nees nkaus choj, lwm tus tau kaum choj. Tus nqi ib choj mas loj heev, ua ntau xyoo haujlwm mam li tau. Qhov vimchiv uas tau txais sib txawv ntawm cov tubtxib yog “muab raws li lawv lub peevxwm” (nqe 15). Tsis muaj ib tug uas tsis tau cob haujlwm, tus Tswv muab haujlwm cob rau txhua tus raws li lub peevxwm, feem xyuam ntawm cov tubtxib.
“Tus tubtxib uas tau tsib caug choj, tamsim ntawd nws txawm coj mus ua luam, thiab nws tsam tsib caug choj ntxiv. 17 Tus tubtxib uas tau nees nkaum choj, kuj coj mus ua luam tsam nees nkaum choj ntxiv” (nqe 16-17). Lo lus “tsam ntxiv” txhais tau tias tau pajlim ntau dua qub, nov yog cov tubtxib paub tus tswv lub siab thiab lub homphiaj thaum cob haujlwm rau yus. Lawv ntseeg siab tias tus tswv yeej yuav rov qab los thiab yuav txheeb tej ntaub ntawv saib seb lawv muab cov nyiaj ntawd mus ua licas lawm (nqe 19), tiamsis yam uas lawv xav tsis txog yog thaum tus tswv rov qab los txog pom qhov uas lawv mloog lus thiab ncaj ncees rau tes haujlwm tau cob ua, lawv tau tus tswv qhuas, siv ua haujlwm ntau dua thiab tau txais nqi zog, txawm yog tus uas ua tsam tsib caug choj lossis nees nkaus choj kuj puavleej tau qhuas ib yam nkaus (nqe 21-23). Tus tswv muab nqi zog los ntawm qhov mloog lus, ncaj ncees, ua tas peevxwm tsis yog ua tau ntau lossis tsawg.
Ntau tus ntseeg Yexus nimno yeej tseem zeem tsis tau txoj koob hmoov tus Tswv pub rau yus. Qee tus ces hais tias Vajtswv muab koob hmoov rau kuv tsawg heev, yog li ntawd lawv tsis siv zog ua Nws tes haujlwm, lawv hais tias muab rau cov uas tau koob hmoov ntau, muaj peevxwm ua. Peb yuav tsum zeem paub tias tus Tswv paub meej peb lub peevxwm thiab Nws tsuas xav kom peb ua haujlwm raws li peb lub peevxwm ua tau xwb, thiab txawm yog tsuas tau “ib choj nyiaj” xwb los kuj yog txaus peb lub peevxwm ua tau “tsam” rau tus Tswv lawm. Tej uas Vajtswv muab cob rau peb txhua tus tsis yog cia rau peb siv rau tus kheej, tiamsis yog kom peb “ua tsam ntxiv” rau tus Tswv, txhais tau tias yuav tsum siv tej uas tus Tswv pub rau peb xws li sijhawm, dag zog, peevxwm, nyiaj txiaj… ua Nws tes haujlwm thiab muaj nqis pub rau ntau leej. Tsis yog cov xibhwb, tub xa Moo Zoo xwb, peb txhua tus puavleej yog tus Tswv cov tubtxib. Cia li ua ib tug tubtxib zoo thiab ncaj ncees rau tus Tswv.
Thov Vajtswv,
Vajtswv tus muaj kev hlub, ua tsaug qhov Koj cawm nyuam yaus, pub koob hmoov thiab txib ua Koj tes haujlwm. Thov Koj pab kom nyuam yaus ua tas siab thiab ncaj ncees ua Koj tes haujlwm mus txog hnub tus Tswv rov qab los, nyuam yaus tau txais tej nqi zog muaj nqis ntawm Koj. Nyuam yaus tuav Tswv Yexus Khetos lub npe thov, Amees.
Tus Tswv pub rau peb cov koob hmoov twg? Peb tabtom ua kom tsam rau tus Tswv zoo li cas?
Nyeem Vajluskub hauv peb lub xyoo: Exethaws 4
Kênh Youtube BHKTHN:
