II Pêtrôs 1:5-9
“Dah iĕm adrin pơm kiơ̆ dôm tơdrong noh tơpă, iĕm gô hlôh tơpă dôm tơdrong Kră Yang bơ̆n Yêsu Krist. ‘Noh iĕm jing bơngai yua kơ tơdrong jang Sư boih.” (II Pêtrôs 1:8)
Nơ̆r jet tơchĕng pơwao:
– Wă kơ arih đei yua kơ Kră Yang păng ưh kơ ngôi đĕch, bơngai lui kăl kơ adrin tơdrong kiơ wă kơ rai ‘lơ̆ng hloh?
– Dah ưh kơ đei tơdrong pŭn hiôk ‘nâu liơ?
– Bơ̆n kăl adrin dơ̆ng tơdrong kiơ wă kơ arih huay kơ đei ưh kơ yua kiơ mălei arih đei yua kơ Kră Yang?
Yua kơ Kră Yang ăn “Sư pơkă wă tơgŭm bơ̆n tih tơpă” păng ăn “kơ bơ̆n gơh arih ‘lơ̆ng tơpăt thoi Sư”. Kơ bơngai lui kơ Kră Yang (II Pêtrôs1:3-5), thoi noh Pêtrôs pơtrŭt kơ lu bơngai lui athei adrin wă kơ wơ̆ ‘lŏ rai hloh, wă kơ “Dah iĕm adrin pơm kiơ̆ dôm tơdrong noh tơpă, iĕm gô hlôh tơpă dôm tơdrong Kră Yang bơ̆n Yêsu Krist. ‘Noh iĕm jing bơngai yua kơ tơdrong jang Sư boih.” (trong 8)
Adrol hloh, lu bơngai lui mă băt kơ Kră Yang bơih lei na “Iĕm athei adrin pơm ‘lơ̆ng” (trong 5a). Minh ‘nu bơngai đei đon lui lei athei đĭ jơhngơ̆m pơhrăm iŏk ‘mêm thoi Kră Yang Yêsu jơ̆ Yang ‘mêm mơnat păng jơhngơ̆m ‘mêm thoi Kră Yang ‘noh đơ̆ng tơdrong hlôh băt jrŭ nơ̆r Kră Yang, thoi noh athei “pơhrăm dôm tơdrong ‘Bok Kei-Dei..” (trong 5b). Mălei tơdrong hlôh băt gah nơ̆r Kră Yang kăl kơ đei tơdrong băt tơpă, wă kơ đei tơdrong hơlĕnh gô jing pơang gah bơhngol, jing bơngai bơtho hơlĕnh, dah mă lăp đon tơdrong arih kư̆ kă. Druh kiơ̆ tơdrong gơh gơ̆t ‘noh jơhngơ̆m kĕ chơ̆n wă kơ kĕ ĕnh adrin druh kiơ̆ tơdrong pơthi gah bơhngol mă ‘bĕnh kơ jơla pơmat păng athei đei jơhngơ̆m lui yom Kră Yang hơmet lê̆ kơ lu đe bu mă băt kơ Kră Yang (II Pêtrôs 1:3). Mălei sơ’ngon dêh dah ưh kơ đei tơdrong ‘mêm lăm ‘nhŏng mŏ oh bơ̆n lăm đon lui gĭt kăl ‘nâu. Đơ̆ng noh, ba truh tơdrong tih hloh lăm tơdrong ‘mêm ‘nhŏng oh, wă chu lôch yua kơ tơdrong lơi yua kơ đe nai, yua kơ ‘noh “bơ̆n gô ‘bôh dôm tơdrong bơ̆n pơm ‘lơ̆ng” (Kôlôssê 3:14).
Pêtrôs ưh kơ đei wă pơma khan kơ lu bơngai athei pơm rai ‘lơ̆ng hloh kiơ̆ dôm tơdrong đei tơlĕch wă kơ pơm mă tôm đĕch ôh. Mălei dôm lu tơdrong ‘noh kăl kơ adrin pơm rai ‘lơ̆ng hăm dih băl wă kơ “Dah iĕm adrin pơm kiơ̆ dôm tơdrong noh tơpă, iĕm gô hlôh tơpă dôm tơdrong Kră Yang bơ̆n Yêsu Krist. ‘Noh iĕm jing bơngai yua kơ tơdrong jang Sư boih.” (trong 8).
Bơngai kăl kơ hŏk pơhrăm nơ̆r Kră Yang wă kơ wơ̆ pran gah bơhngol hơnơ̆ng na jing đei tơdrong arih ‘bĕnh kơ plei Yang Bơhngol ‘Lơ̆ng (Galati 5:22).’Bok Kei-Dei pơjao kơ bơ̆n tơdrong hiơ̆k pŭ iŏk noh athei hŏk pơhrăm păng wơ̆ ‘lŏ. Dah mă bơ̆n ưh kơ lăng tơdrong tơpăt sĭt, ưh kơ tơplih gah bơhngol gô ba truh “Mă-lei bu ưh kơ pơm kiơ̆ dôm tơdrong noh, bơngai noh sư thoi bơngai măt bơbul, ưh kơ ‘bôh hơdah; păng sư thoi bơngai hiơt kơ ‘Bok Kei-Dei dŏng pơklaih bơ̆n đơ̆ng tơdrong yoch.” (trong 9). Păng thoi ei, bơ̆ñ ‘bônh dêh wih brŏk pơm hăm dôm tơdrong yoch so.
Ơ Kră Yang, inh ưang kơ Ih jơ̆ ‘Bă lăm chăl inh, đei ăn kơ inh dôm tơdrong pŭn hiôk. Apinh tơgŭm inh đĭ jơhngơ̆m pơm rai ‘lơ̆ng hloh hăm dih băl dôm tơdrong lăm bơngai lui, păng ăn thim kơ inh jơnăr wă kơ inh arih ưh kơ đei yua kiơ mălei arih đei yua kơ Kră Yang. Krao khan yua anăn Kră Yang Yêsu Krist, Amen.
‘Bai pơhrăm ‘nâu tơ’blŏk kơ bơ̆n mă ưh tam mă đei lu tơdrong ayơ? Bơ̆n wă adrin pơm rai ‘lơ̆ng hloh thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Rutơ 3
Kênh Youtube BHKTHN:
