Mathiơ 12:1-8
“Lăm sơ̆p hla bơar ‘Bok Kei-Dei khan sơ̆ thoi âu: Tơdrong iĕm soi sơmah kơ Inh ưh kơ kăl ôh, Inh wă kơ iĕm ‘mêm mơnat dih băl ‘noh kăl hloh kơ tơdrong iĕm soi sơmah kơ Inh. Yêsu khan dơ̆ng: Dah iĕm hlôh tơdrong noh, lei iĕm ưh kơ đei jô̆ kơ lu bơngai ‘lơ̆ng pơm yoch ôh.” (Mathiơ 12:7)
Nơ̆r jet tơchĕng pơwao:
– Lu bơngai Pharisi chrih kơ lu bơngai pơhrăm tơdrong kiơ?
– Kră Yang tơl lu sư thoi yơ?
– Bơ̆n pơhrăm iŏk tơdrong kiơ gah tơdrong arih băt ‘mơn đơ̆ng tơdrong roi hơ’mon ‘nâu?
Bơngai Pharisi đe ưang gah tơdrong wei răk tơdrong juăt, mă kăl loi ‘noh wei răk năr pơdơh sabat. Lu sư tơlĕch kơdih dôm tơdrong ưh kơ gơh pơm thoi kơ lăm năr pơdơh Sabat ưh kơ broch găr ba, na chĕch găr ‘ba yua kơ pơm thoi noh nhen thoi peh ‘ba, pơm glăi ưh kơ gơh jang lăm năr pơdơh Sabat! Kiơ̆ kơ tơdrong juăt sơ̆ ‘noh, lu sư pơma chrih kơ lu bơngai pơhrăm păng Kră Yang, mă khan lu bơngai pơhrăm păng Sư pơm trŏ ră, (Bơtho khôi juăt 23:25).
Wă tơl nơ̆r păng wă bơtho kơ lu bơngai Pharisi, adrol hloh Kră Yang tơ’bôh tơdrong roi hơ’mon lăm pah so sơ̆: Pơtao Đawit păng lu linh oei pơngot, yua kơ pă đei ‘bĕng sa bơih lei na lu ‘bok soi ngăl asong kơ lu sư sa ‘bĕng rơgoh jơ̆ ‘bĕng đei tơplih ‘nao lăm năr pơdơh Sabat păng kiơ̆ kơ tơdrong juăt lăp lu ‘bok soi đĕch gơh sa, mălei đe ưh kơ đei pơma chrih phak lu sư ôh, (I Samuel 21:1-6). Tơdrong hơ’mon mă ‘bar ‘noh lăm năr pơdoh Sabat, lu ‘bok soi athei pơyơ̆r tơmam soi, mălei đe kư̆m ưh kơ lu sư yoch, (Jô̆ bơngai 28:9-10). Lu bơngai Pharisi đŏk nơ̆r ‘Bok Kei-Dei mălei ưh kơ đei hlôh nơ̆r ‘Bok Kei-Dei bơtho ‘noh kon bơngai gĭt hloh kơ dôm tơdrong juăt.
Tuch luch, Kră Yang Yêsu khan: “Lăm sơ̆p hla bơar ‘Bok Kei-Dei khan sơ̆ thoi âu: Tơdrong iĕm soi sơmah kơ Inh ưh kơ kăl ôh, Inh wă kơ iĕm ‘mêm mơnat dih băl ‘noh kăl hloh kơ tơdrong iĕm soi sơmah kơ Inh. Yêsu khan dơ̆ng: Dah iĕm hlôh tơdrong noh, lei iĕm ưh kơ đei jô̆ kơ lu bơngai ‘lơ̆ng pơm yoch ôh. Inh Kon Bơngai, Inh gơh tơblang ăn kơ iĕm tơdrong kơ̆m lăm năr pơdơh Sa’bat.” (Trong 7-8). Đei ăn khôi juăt wă kơ kon bơngai băt tơdrong yoch, kơdâu tơkan tơ ‘Bok Krist wă kơ goh arih păng wă kơ gơh jô̆ ‘lơ̆ng tơpăt (Rôm 3:20; Galati 3:24), ưh kơ sĭ tơdrong juăt ưh kơ đei wă kơnhăm khan jô̆ yoch. Kơplah bơ̆n yua iŏk tơdrong juăt, tơdrong mă ưh pă đei ‘mêm băl, tơdrong ‘mêm rai pă gan ‘noh tơdrong arih Kră Yang ưh pă lăp đon. Tơdrong juăt dah mă khôi juăt ưh kơ sĭ wă achăng lê̆, pơgŏ kon Kră Yang pơm đĭch kơ tơdrong giĕng, tơmam soi. Jơhngơ̆m ‘mêm mơnat gĭt hloh tơdrong giĕng thoi Kră Yang Yêsu jơ̆ tơdrong jang inh kăl hloh kơ tơdrong jang đe noh lăm hnam akŭm. Lu bơngai Pharisi wei răk lăm năr pơdoh Sabat tơnen, tơpăt dêh mălei hŭt lê̆ tơdrong mă kăl hloh lăm tơdrong juăt ‘noh jơ̆ arih ‘lơ̆ng tơpăt,mơnat, băt ‘mêm.
Tơdrong arih bơngai lui ưh kơ sĭ khan lăp wei răk khôi juăt thoi kơkuh, pơyơ̆r, v.v… na kư̆m ưh kơ gơh hŭt lê̆ tơdrong ‘mêm, mơnat. ‘Bok Pôl bơtho arih ‘mêm mơnat noh pơm kiơ̆ tôi tơdrong juăt (Rôm 13:10). Kră Yang lăng kon bơngai gĭt hloh kơ tơdrong giĕng pơm tơ’bôh. Pơm kiơ̆ tơdrong juăt mălei ưh kơ đei jơhngơ̆m‘mêm lei na tơdrong bơ̆n kơkuh jing ưh kơ đei yua. Bơ̆n kơkuh kơ Kră Yang hăm tơdrong giĕng păng kư̆m athei arih sa dih băl hăm jơhngơ̆m băt ‘mêm mơnat thoi nơ̆r Kră Yang bơtho. Dah kăl kơ rơih iŏk tơdrong juăt păng tơdrong ‘mêm, apinh Kră Yang tơgŭm bơ̆n ‘blŏk nơ̆r Kră Yang bơtho: “Inh wă kơ iĕm ‘mêm mơnat dih băl!”.
Ơ Kră Yang jơ̆ Tơ’ngla ‘lơ̆ng tơpăt păng băt ‘mêm, Apinh bơtho kơ inh arih ‘lơ̆ng tơpăt păng ‘mêm mơnat wă pơm keh ‘blep trŏ dôm tơdrong Kră Yang bơtho păng pơm hơdah Anăn ‘Bă lu bơ̆n tơplĕnh ti. Krao khan yua Anăn Kră Yang Yêsu Krist, Amen.
Bơ̆n kăl kơ pơm kiơ wă kơ tơdrong arih pơchrang tơdrong ‘mêm Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Rut 1
Kênh Youtube BHKTHN:
