II Pêtrôs 2:1-10
“…oei phak dôm lu bơngai pơm kơnê̆, truh tơ năr Sư wă sek tơlang ning-mônh.” (II Pêtrôs 2:9b)
Nơ̆r jet tơchĕng pơwao:
– Pêtrôs Jơ̆ng’bang Kră Yang, roi Kră Yang phak pêng tơdrong kiơ?
– Lu tơdrong Kră Yang phak hlôi đơ̆ng ki sơ̆ bơih noh wă tơbăt tơdrong Kră Yang hơgăt tơdrong arih lu ‘bok bơtho hơlĕnh păng lu bơngai khan lê̆ adrol hơlĕnh noh gô thoi yơ?
– Bơ̆n đei hŏk iŏk tơdrong kiơ gah tơdrong Kră Yang ‘Bok Kei-Dei tơpăt hơnơ̆ng?
Pêtrôs Jơ̆ng ‘bang Kră Yang, sư pơma phơ̆t hloi hăm lu ‘bok bơtho hơlĕnh păng lu bơngai khan lê̆ adrol hơlĕnh, dôm tơdrong lu sư bơtho glăi hăm Nơ̆r Sĭt ‘Bok Kei-Dei noh ‘bok Pêtrôs ưh kơ đei juh jun ôh mă tơdrong kiơ kiơ lăm tơdrong lu sư bơtho glăi noh. Lu bơngai noh ‘Bok Kei-Dei wă phak lu sư trăp tơpă ưh kơ jor ôh (trong 3). ‘Bok Pêtrôs roi đêl pêng tơdrong mă ‘Bok Kei-Dei phak lu bơngai kơnê̆ hơlĕnh păng sơngah kơ Sư lăm jơhnơr Pah so noh sơ̆ thoi âu:
Adrol hloh, Sư phak lu linh jang mă pơ̆k huŏng (trong 4). ’Nâu ưh kơ pơma gah Satan ôh, ’bok Pêtrôs roi gah lu linh jang pơ̆k huŏng “Sơ̆ lu linh jang ‘Bok Kei-Dei pơm yoch, ‘Bok Kei-Dei kư̆m ưh kơ ‘mêm ôh, Sư iŏk tơhuŏng hloi tơ anih măng mu, phak sư tơ noh truh tơ năr Sư wă sek tơlang ning-mônh”, kơplah Satan hăm lu yang kơnê̆ khul sư noh oei pơm kơnê̆ blah Kră Yang ‘Bok Kei-Dei (Êphêsô 2:1-2;6:12). Đơ̆ng noh, bơ̆n gơh hlôh đei minh tơdrong yoch tih nai dơ̆ng mă lu linh jang pơ̆k huŏng hlôi pơm bơih: “Gah linh jang lu mơ’nah achăng lê̆ tơdrong jang đơ̆ng ‘Bok Kei-Dei pơjao ăn pơgơ̆r, na jăk oei tơ nai, ‘Bok Kei-Dei ‘bôh, Sư rôp chô̆ phak tơ anih măng mu ling-lang truh tơ năr Sư wă sek tơlang tih-tin ning-mônh (Jut trong 6)
Mă ‘bar, Kră Yang phak “kon bơngai ala teh sơ̆” (trong 5) yua kơ lu sư pơm kơnê̆ hơlĕnh pơdăr” wă khan ưh kơ pơyom, ưh kơ kơkuh kơ ‘Bok Kei-Dei. ‘Bok Nôê pơm duk đunh truh tơ 120 sơnăm chơtăng na keh, ‘bok Nôê ‘nâu “sư thây bơtho tơdrong tơpăt” sư hlôi bơtho bơih gah tơdrong tơbral. Mă khan lei ră “kon bơngai ala teh sơ̆” ưh kơ wă mơ̆ng nơ̆r ‘bok Nôê bơtho wă kơ tơbral tơdrong yoch noh.’Noh bơih Kră Yang jô̆ “kơnê̆ dêh” ‘nei.
Mă pêng Kră Yang phak pơlei Sôđôm păng pơlei Gômôrơ (trong 6-10). Adrol kơ Kră Yang pơrăm pơtôch noh, ‘bar tŏ pơlei tih ‘nâu, teh char lu sư oei noh teh ‘lơ̆ng, teh mơ̆r (Blŭng A13:8-10), mă-lei Kră Yang pơrăm pơm kơ lu sư jing rơnok, pă đei ‘bôh đêl kơcheh kiơ kiơ wă kơ đei hơ’mon ‘biơ̆ kơ tơdrong lu sư lăm chăl arih ‘nâu, yua kơ lu sư arih hưch ham glăi răm, păng tơdrong lu sư pơm noh blah plơ̆ tơdrong ‘Bok Kei-Dei pơjing kon bơngai, Kră Yang pơjing kon bơngai bơ̆n hmă sư noh đei drŏ-nglo drŏ-kăn, jing ŭnh om, Kră Yang pơdŏ ăn, gơh tơngôi, gơh hơdai. Mă-lei pơlei Sôđôm, Gômôrơ ‘nâu, lu sư druh kiơ̆ tơdrong ‘maih wă ưh kơ hmă bơih, ‘noh kơnê̆ ‘mê̆ brư̆, drŏ-nglo ngôi kư̆-kă tơduă drŏ-nglo, drŏ-kăn ngôi kư̆-kă tơduă drŏ-kăn, tơdrong lu sư pơm ‘noh blah plơ̆ tơdrong Kră Yang pơjing ‘lơ̆ng trŏ noh.
Tơdah Kră Yang hlôi sek phak lu linh jang pơ̆k huŏng mă oei hơnơ̆ng kơ pơm yoch dơ̆ng noh, Sư hlôi sek phak kon bơngai ala teh kơnê̆ hơlĕnh pơdăr kơplah chăl Nôê sơ̆ noh, Sư hlôi sek phak ‘bar tŏ pơlei Sôđôm, Gômôrơ mă ‘bĕnh kơ tơdrong kơnê̆ ‘mê̆ brư̆ noh bơih lei sĭt ưh kơ jor Kră Yang Tơ’ngla tơpăt hơnơ̆ng ‘lơ̆ng rơgoh ‘nâu Sư kư̆m gô sek phak dôm lu bơngai blah plơ̆ Sư, sek phak lu bơngai blah plơ̆ nơ̆r Sư noh, na lăm Hla bơar Pêtrôs chih roi ‘nâu Kră Yang wă phak lu bơngai khan lê̆ adrol hơlĕnh păng lu ‘bok bơtho hơlĕnh. Mă loi, tơdrong Kră Yang phak ‘nâu ưh kơ pôm pơrăm akâu akar đĕch ôh, Sư kư̆m phak hloi bơhngol lăm dơnâu ŭnh pơmat ling-lang ling-lang tơ noh (Jut trong 7). Mă khan lu bơngai khan lê̆ adrol hơlĕnh păng lu ‘bok bơtho hơlĕnh noh phŏ kơnh lu sư jang, lu sư pơm nhen thoi keh jing “yua kơ đei lơ bơngai kiơ̆ lu sư (trong 2).Mă-lei keh jing noh keh jing hăm kon bơngai bơ̆n đĕch. ‘Bơ̆t anăp ‘Bok Kei-Dei Tơ’ngla tơpăt hơnơ̆ng ‘lơ̆ng rơgoh`, tơdrong phak lu bơngai kơnê̆ noh Sư gô phak tơpă ưh kơ jor ôh, kư̆m ưh kơ đei bơngai kơnê̆ ayơ gơh klĕnh hlôi đơ̆ng tơpang ti Kră Yang ôh. Tơdrong‘nâu tơ’blŏk kơ bơ̆n wă kơ bơ̆n arih‘lơ̆ng tơpăt kiơ̆ kơ Kră Yang bơtho wă kơ Kră Yang huay kơ phak bơ̆n ‘bơ̆t năr tôch ning-mônh.
Ơ Kră Yang ‘Bok Kei-Dei Tơ’ngla tơpăt hơnơ̆ng’lơ̆ng rơgoh,inh bơnê kơ Ih hlôi pơklaih inh hăm tơdrong ‘mêm mơnat tih Ih wă kơ đơ̆ng tơdrong Ih mơnat pơklaih noh inh weh hlôi đơ̆ng tơdrong Ih hil phak. Apinh Ih tơgŭm inh khŏm arih pơyua ăn kơ Ih. Inh krao khan yua anăn Kră Yang Yêsu Krist, Amen!
Bơ̆n hiôk chơt dah hli tơtăm kơplah bơ̆n dơ̆ng ‘bơ̆t anăp ‘Bok Kei-Dei tơpăt hơnơ̆ng ‘lơ̆ng rơgoh năr Sư sek tơlang?
Đŏk Sơ̆p Hla bơar ‘Bok Kei-Dei lăm pêng sơnăm: Nêhêmi 5
Kênh Youtube BHKTHN:
