II Pêtrôs 3:11-14
“Mă-lei gah bơ̆n, kiơ̆ kơ nơ̆r ‘Bok Kei-Dei kơdih khan, Sư wă pơjing dơ̆ng plĕnh teh ‘nao ăn kơ lu bơngai mă ‘lơ̆ng tơpăt đĕch oei tơ noh. Tơdrong noh boih, tơdrong mă bơ̆n hưch-hanh oei chang gô dang ei.” (II Pêtrôs 3:13)
Nơ̆r jet tơchĕng pơwao:
– ‘Bok Pêtrôs tơbăt ăn đĭ dôm tơmam kơpal teh gô thoi yơ lăm năr tôch?
– Bơngai lui athei arih thoi yơ lăm kơplah chang gô plĕnh teh ‘nao?
– Tơdrong arih păng jơhngơ̆m ih thoi yơ mưh tơchĕng kơ năr Kră Yang jur dơ̆ng?
‘Bok Pêtrôs chih kơthơ âu ăn kơ lu bơngai lui oei đei tơdrong lui ưh kơ trŏ pơtuah lu sư, tơdrong kơnê̆ rai dêh, păng tơdrong lui rai rơdu, sư tơgŭm lu sư tơchĕng kơ tơdrong hơmĕng ning mônh, nơ̆r pơkă gah “Plĕnh teh ‘nao”. Lu bơngai mă ‘lơ̆ng tơpăt đĕch oei tơ noh (trong 13). ‘Noh bơih tơm anih kơjăp wă kơ lu bơngai lui hơmet tơdrong arih ‘lơ̆ng rơgoh păng băt hli yom kơ Kră Yang rim năr. Teh đak bơ̆n oei arih dang ei ‘bĕnh kơ tơdrong glăi ưh kơ trŏ, iung blah păng ưh kơ tơpăt. Thoi noh, ưh kơ jor ôh hiong răm. “đĭ dôm tơmam gô hiong răm tơpă” (trong 11). ‘Bok Kei-Dei ưh lê̆ ôh hăm tơdrong kơnê̆, păng Sư ưh kơ ăn tơdrong yoch oei pơgơ̆r ling lang ôh (Jô̆ bơngai 14:18). Gô đei minh năr dôm yoch kơnê̆ gô pơrăm đĭ păng Kră Yang ‘Bok Kei-Dei pơjing tôm tơdrong hăm tơdrong ‘lơ̆ng tơpăt Sư. Tơdrong sek tơlang năr tôch ưh kơ trŏ khan minh tơdrong wă pơrăm dơ̆ng “Plĕnh teh ‘nao” anih noh bơih tôm tơdrong pơdah tơdrong ‘lơ̆ng rơgoh, ‘lơ̆ng rŏ păng tơdrong tơpăt Sư.
‘Bok Pêtrôs krao pơtơm dôm lu bơngai lui kơ Kră Yang athei adrin pơm đon ‘lơ̆ng tơpăt păng băt hli yom kơ Kră Yang kiơ̆ thoi Sư wă. Druh kiơ̆ tơdrong ‘lơ̆ng rơgoh jơ̆ rơhing tơdrong mă Krẳ Yang rơhing. Tơdrong hli yom kơ Kră Yang lĕch đơ̆ng jơhngơ̆m pôk ưang Kră Yang, băt tơpă kơ Kră Yang Sư bu păng đĭ jơhngơ̆m kơkuh kơ Sư, lui gơnang păng chu yom. ‘Noh bơih tơdrong arih rim năr bơngai lui kăl kơ đei “lăm kơplah bơ̆n oei chang gô Sư wă pơrăm jơ̆p teh đak ei” (trong 12).
Lu bơngai lui kơ Kră Yang ưh kơ trŏ kơ lu bơngai dơ̆ng ngôi đĕch na chang gô tơdrong khan lê̆ adrol ei đĕch ôh, mălei bơ̆n athei pơm kiơ̆ tơdrong ‘Bok Kei-Dei pơkă kơ bơ̆n, noh athei đĭ jơhngơ̆m ră roi Tơdrong ‘Nao ‘Lơ̆ng Yêsu Krist, krao khan kơ dêh char Sư tĕnh truh, păng arih pơdah tơdrong ‘lơ̆ng tơpăt Kră Yang. Bơngai lui huay kơ hli tơrơ kơ năr tôch ôh, mălei hưch hanh oei chang gô năr Kră Yang tơ’bôh tơdrong ‘mêm mơnat Sư tôm mah păng tơdrong ‘lơ̆ng tơpăt Sư. ‘Bok Pêtrôs athei lu bơngai lui “bơ̆n athei adrin pơm ‘lơ̆ng ling lang hŏ, wă kơ sư ‘bôh tơdrong iĕm adrin păng ‘bôh tơdrong iĕm pơm ‘lơ̆ng huay kơ đei tơdrong yoch, oei hiôk dih băl kư̆m dang oei hiôk hăm Sư mơ̆n.” Lăm kơplah chang gô ‘Bok Kei-Dei pơjing dơ̆ng plĕnh teh ‘nao (trong 14). ‘Noh bơih minh pôm dêh char pơjing ming dơ̆ng, ưh kơ hiong răm, ưh kơ đei jĭ jăn, ưh pă đei tơdrong kơnê̆ păng ưh pă đei tơdrong lôch dơ̆ng. Thoi noh, bơ̆n athei hơmet ăn kơ dêh char wă truh tơ anăp ‘nei hăm tơdrong arih nhen thoi kon pơlei arih tơ dêh char noh kơplah bơ̆n oei arih lăm teh đak dang ei hloi. ‘Bok Kei-Dei, Tơ’ngla gô pơm ăn tôm tơdrong jing ‘nao ngăl, oei tơplih tơdrong arih kon pơlei Sư rim năr. Păng mưh đei plĕnh teh ‘nao, bơ̆n gô oei lăm dêh char mă tơdrong ‘lơ̆ng tơpăt oei oei ling lang.
Ơ Kră Yang, apinh Ih ăn kơ inh đĭ jơhngơ̆m arih ‘lơ̆ng rơgoh păng lui mă kơjăp kơplah chang gô năr Ih jur dơ̆ng. Krao khan yua anăn Kră Yang Yêsu Krist, Amen.
Lu bơ̆n pơm kiơ lăm kơplah chang gô năr Kră Yang pơjing dơ̆ng plĕnh teh ‘nao?
Đŏk Sơ̆p hla bơar ‘Bok Kei-Dei lăm pêng sơnăm: Esơra 10
Kênh Youtube BHKTHN:
