I Timôthê 6:11-16
“Ơ Timôthê, ih bơngai kiơ̆ ‘Bok Kei-Dei, ih athei weh ataih đơ̆ng tơdrong kơnê̆ ‘noh, ih adrin pơm đon ‘lơ̆ng tơpăt, lui mă kơjăp, ‘mêm kơ ‘Bok Kei-Dei păng pơm jơhngơ̆m dim ‘mêm kơ bôl buăl mơ̆n. Đei tơdrong gleh truh tơ ih ră, mă-lei ih athei adrin pơm kiơ̆ ‘Bok Kei-Dei khŏm khŏm.” (I Timôthê 6:11)
Nơ̆r jet tơchĕng pơwao:
– ‘Bok Pôl bơtho kơ Timôthê lăm dôm tơdrong kiơ wă kơ kĕ hlôi đơ̆ng tơdrong ham kơ jên tơmam?
– Yua kơ kiơ đei lơ anăn krao gah Kră Yang lăm dôm nơ̆r ‘bok Pôl bơtho khan?
– Pơm thoi yơ wă kơ bơ̆n huay kơ kơdâu kiơ̆ kơ jên tơmam na kĕ jei đơ̆ng tơdrong noh?
Lăm chăl tuch luch pơtôch kơthơ chih ăn kơ Timôthê, ‘bok Pôl tơbăt ăn kơ Timôthê dang kon lăm đon lui ‘bôh đei ‘bar Khul bơngai bơ̆jang: Lu bơngai bơ̆jang “hăt kơ chă jên tơmam” (I Timôthê 6:6-10), păng lu bơngai bơ̆jang “adrin tơblah kĕ jei” yua kơ đei đon kơjăp păng pơm dôm tơdrong ‘lơ̆ng (trong 11-12). Tŭk tơdrong ưh kơ ‘lơ̆ng đĕch lei ưh tam mă tôm ôh dah ưh kơ lui tơpă hăm đĭ jơhngơ̆m, yua kơ bơ̆n ‘bônh dêh chă dôm tơdrong ưh kơ ‘lơ̆ng nai, phŏ kơnê̆ hloh dơ̆ng, wă kơ đei. Thoi noh, ‘bok Pôl krao pơtơm Timôthê bơngai bơtho oei moh hăm ‘bar tơdrong “Athei” păng minh tơdrong “pơm” Athei chơ chă, dah mă khŏm kiơ̆ Ih “adrin pơm đon ‘lơ̆ng tơpăt, lui mă kơjăp, ‘mêm kơ ‘Bok Kei-Dei păng pơm jơhngơ̆m dim ‘mêm kơ bôl buăl mơ̆n. Đei tơdrong gleh truh tơ ih ră mălei athei adrin pơm kiơ̆ ‘Bok Kei-Dei khŏm khŏm” (trong 11). Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai ‘noh sư gô đei apah. Mă ih kư̆m lei lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling lang” (trong 12). “ Ih athei kơchăng pơm kiơ̆ dôm tơdrong Sư pơkă kơ bơ̆n. ‘Nĕ ăn đe tơplih tơdrong Sư pơkă kơ bơ̆n noh” (trong 14). “Tơblah kĕ jei” wă khan oei adrin tơblah, adrin tôch bơneh wă kơ kĕ jei. Tuch luch, kơnhăm bơ̆n tơplih kơ tơdrong hăt kơ chă mơdrŏng dang ei noh bơ̆n athei adrin tơblah yua kơ đon lui păng pơhrăm tơdrong arih ‘lơ̆ng tơpăt, tơ’bôh đơ̆ng lăm jơhngơ̆m tơplih ‘nao hăm tơdrong pơm kiơ̆ dôm tơdrong Sư pơkă kơ bơ̆n.
Đei lăm dôm nơ̆r bơtho noh jơ̆ lơ anăn krao gah Kră Yang. “Đĭ đăng khul arih tơ ala teh đơ̆ng ‘Bok Kei-Dei ăn arih ngăl” “Yêsu Krist pơma ‘lơ̆ng tơpăt ‘bơ̆t anăp ‘bok Pơtao Pilat”. “trŏ năr ‘Bok Kei-Dei ăn kơ Kon Sư Yêsu Krist jur tơ ala teh âu ning mônh. ‘Bok Kei-Dei bơih hiôk hia tơpă, pôm Sư bơih pơgơ̆r tôm tơdrong” “Sư pơm ‘bok Pơtao Sư tih hloh kơ đĭ đăng lu Pơtao nai.” “Sư ưh kơ layơ lôch, Sư oei tơ anih rang mơnhal, ưh kơ đei bu gơh năm jê̆ Sư. Đơ̆ng sơ̆ khơ̆ ning mônh kon bơngai ala teh ưh kơ đei bu ‘bôh Sư Na bĕ bơ̆n pơư pơang ‘Bok Kei-Dei mă pơgơ̆r ling lang” (trong 13-16). Yak năm lăm đon lui păng tơdrong arih lui kơjăp băt tơpă gah tơdrong Kră Yang jơ̆ Tơ’ngla wei lăng păng pơgơ̆r tôm tơdrong, ăn kơ bơ̆n tơdrong hơđơ̆ng kơjăp tơpă hloh kơ tơdrong hơđơ̆ng yua đơ̆ng mŭk tơmam ba ăn kơ bơ̆n.
Lăng kơdih akâu hăm dôm tơdrong ‘bok Pôl bơtho kơ Timôthê athei pơm kiơ̆, rim ‘nu lu bơ̆n pơ’lơ̆ng tơchĕng lăng lăm akâu bơ̆n kơdih wă hơmet dôm tơdrong kiơ ưh tam mă ‘lơ̆ng. Kư̆m athei pơhrăm pơjuăt tơdrong arih hli yom hăm tơdrong hŏk pơhrăm băt kơ Kră Yang rai hloh wă kơ bơ̆n ling lang oei kơjăp lăm Kră Yang. Tơ’ngla chĕp tơdrong arih lu bơ̆n, jơ̆ tơm tơdrong pơdrŭt tơgŭm bơ̆n huay kơ druh kiơ̆ kơ jên tơmam, mălei adrin tơblah yua kơ đei đon lui na kĕ jei. Apinh Kră Yang ăn kơ bơ̆n gơh pơma hăm Kră Yang thoi ‘bok Pôl khan: “Na bĕ bơ̆n pơư pơang ‘Bok Kei-Dei mă pơgơ̆r ling lang! Amen (trong 16).
Ơ Kră Yang, tu tơm tơdrong pŭn hiôk, Tơ’ngla ăn tơdrong arih kơ đĭ đăng khul arih tơ ala teh âu. Pơtao kơ đĭ đăng pơtao, yŏng kơ đĭ đăng yŏng, apinh Ih tơgŭm inh lăng tơdrong tơblah yua kơ đon lui păng tơplih lăm jơhngơ̆m inh thoi Kră Yang jơ̆ tơdrong kơnhăm khŏm kiơ̆ lăm chăl arih inh, ưh kơ trŏ yua kơ jên tơmam, krao khan yua anăn Kră Yang Yêsu Krist, Amen.
Lăm năr ‘nâu lu bơ̆n hăm đei pơkă kiơ hăm Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Esơra 8
Kênh Youtube BHKTHN:
