Klei Aê Diê Blŭ: I Y-Timôthê 6:11-16
Êlan kliăng: “Ƀiădah bi ih, ơ mnuih Aê Diê, đuĕ mơ̆ng jih klei anăn; leh anăn tui duah klei kpă ênô, klei mpŭ kơ Aê Diê, klei đăo, klei khăp, klei gĭr, klei êdu êun.” (I Y-Timôthê 6:11)
Klei êmuh ksiêm mĭn: Khua ƀĭng kna Y-Pôl mtă kơ Khua pô mtô hlăk ai Y-Timôthê hlăm ya klei čiăng, čiăng tlaih mơ̆ng bruă khăp kơ prăk mah? Ya ngă mâo lu anăn iêo kơ Aê Diê hlăm klei ñu mtă? Si ngă čiăng kơ drei amâo tui duah prăk mah ôh ƀiădah bi blah jăk?
Hlăm kdrêč knhal tuč ruĕ hră mơĭt kơ Khua pô mtô Y-Timôthê, Khua ƀĭng kna Y-Pôl brei anak hlăm klei đăo ƀuh dua mta mnuih mă bruă: Mnuih mă bruă “khăp kơ prăk” (I Y-Timôthê 6:6-10), leh anăn mnuih mă bruă tui tiŏ bruă “bi blah jăk” kyua klei đăo, leh anăn mđĭ kyar knuih jăk (êlan 11-12). Lui klei amâo jăk đuč snăn ka djăp ôh tơdah amâo hrô hŏng klei huĭ mpŭ, kyua drei ênưih duah klei amâo jăk mkăn, boh nik jhat hĭn, čiăng hrô kơ klei anăn. Kyua anăn, Khua ƀĭng kna Y-Pôl iêô mthưr Khua pô mtô hlăk ai Y-Timôthê hŏng dua klei “ngă bĕ” leh anăn “brei”: Brei tui duah bĕ, amâodah tui duah “klei kpă ênô, klei mpŭ kơ Aê Diê, klei đăo, klei khăp, klei gĭr, klei êdu êun” (êlan 11); “Bi blah bĕ klei bi blah jăk kyua klei đăo. Djă păn kjăp klei hdĭp hlŏng lar” (êlan 12). “Djă pioh bĕ klei mtă hŏng klei doh jăk leh anăn hŏng klei arăng amâo dưi ƀuah ôh” (êlan 14). “Bi blah jăk” jing lŏ dơ̆ng bi blah, gĭr jih hnơ̆ng čiăng mâo klei dưi. Klah čŭn, klei kñăm hrô kơ bruă tui tiŏ klei mdrŏng sah jing klei gĭr bi blah kyua klei đăo leh anăn hriăm mjuăt knuih hdĭp, bi êdah hlăm knuih dưi bi mlih hlăm lam wăt bruă kriê pioh klei bhiăn nah êngao.
Mbĭt hŏng klei mtă anăn jing lu boh blŭ iêô anăn Aê Diê. “Pô brei klei hdĭp kơ jih jang mnơ̆ng”, “Pô hưn jăk kơ klei đăo ti anăp Pôns Pilat”, “Pô Kiă Kriê mâo klei jăk jĭn, Mtao kơ phung mtao”, “Mtao kơ phung mtao”, “Khua Yang kơ phung khua yang”, “knŏng hjăn Ñu yơh mâo klei amâo thâo djiê, leh anăn dôk hlăm klei mngač arăng amâo dưi nao giăm, Pô mnuih amâo tuôm ƀuh ôh, kăn dưi ƀuh rei. Kơ Ñu yơh brei klei mpŭ leh anăn klei myang hlŏng lar” (êlan 13-16). Tui duah klei đăo leh anăn knuih hdĭp huĭ mpŭ hŏng klei thâo săng kơ bruă Aê Diê jing Pô kiă kriê leh anăn mâo klei dưi hlăm djăp mta klei, brei drei mâo klei rơ̆ng kjăp hlăm jih jang klei rơ̆ng kyua prăk mah ba brei.
Mtrang drei pô hŏng ya klei Khua ƀĭng kna Y-Pôl mtô kơ Khua pô mtô Y-Timôthê tui duah, grăp čô drei brei thâo răng ksiêm dlăng pô čiăng hriăm mbŏ ya klei ngă ka jăk. Ăt brei hriăm mjuăt knuih hdĭp huĭ mpŭ hŏng bruă hriăm kơ Khua Yang lu hĭn čiăng kơ drei đăo kjăp kơ Khua Yang, Pô kiă kriê klei hdĭp drei mgi dih, jing phŭn mđĭ ai drei amâo tui duah prăk mah, ƀiădah hrô hŏng bruă bi blah kyua klei đăo bi blah jăk. Akâo kơ Khua Yang đru drei srăng akâo kơ Khua Yang msĕ si Khua ƀĭng kna Y-Pôl snei: “Kơ Ñu yơh brei klei mpŭ leh anăn klei myang hlŏng lar. Amen.” (êlan 16).
Hruê anei, ya klei drei ƀuăn rơ̆ng hŏng Khua Yang?
Wah lač: Ơ Khua Yang, phŭn kơ jih jang klei jăk mơak, Pô brei klei hdĭp kơ jih jang mnơ̆ng, jing Mtao kơ jih jang mtao, jing Khua Yang kơ jih jang khua yang, akâo kơ đru kâo dlăng bruă bi blah kyua klei đăo leh anăn klei bi mlih hlăm knuih hdĭp msĕ si Ih jing klei kñăm tui duah hlăm klei hdĭp, amâo djŏ jing prăk mah ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
