Tơdrong Pơđơ̆k 27:5-6
“Kơtrơ̆m chrih hơdah tơm măt noh, ‘Lơ̆ng hloh khan ‘mêm mă-lei oei ngâm lăm to.” (Tơdrong Pơđơ̆k 27:5)
Nơ̆r jet tơchĕng pơwao:
– Pơtao Sôlômôn pơting “nơ̆r chrih hơdah” hăm “tơdrong ‘mêm hlơp” thoi yơ?
– Sư lăng ‘bar pah buăl juăt tơpă păng buăl hơlĕnh thoi yơ?
– Lu bơ̆n kăl kơ đei jơhngơ̆m thoi yơ kơplah mơ̆ng nơ̆r chrih bơtho đơ̆ng Kră Yang păng đơ̆ng lu bơngai lui yom?
‘Bar trong lăm Tơdrong Pơđơ̆k năr âu đei tơ’bưh kơjăp lăm nơ̆r đei proh hơmet tơ’bưh băl tơ’bôh hơđăl buăl juăt tơpă, “Nơ̆r chrih hơdah” hăm “tơdrong ‘mêm hlơp”; “lu rơka đơ̆ng lăm nơ̆r tơpăt” hăm “lu tơdrong chŭm hơlĕnh”.
Trong 5 noh jơ̆ tơdrong pơting “ nơ̆r chrih hơdah” hloh kơ “ tơdrong ‘mêm hlơp”. Tơdrong ‘mêm athei đei pơm tơ’bôh, păng kơplah đei pơm tơ’bôh tơdrong ‘mêm hơđăl nhen mă tơpă ‘noh jơ̆ nơ̆r chrih bơtho đơ̆ng lăm jơhngơ̆m, kư̆m đei chrih dêh tơpă. Nơ̆r chrih rơngơp păng mă tơpă hăm nơ̆r hơpơi wă tơgŭm, gô tơgŭm đei trong păng pơjing tơiung tơdrong tơ’bưh. Nơ̆r pơma chrih rơđah hơđăl , ‘bĕnh hăm tơdrong ‘mêm gơh đei yua; mă-lei tơdrong ‘mêm hlơp ưh kơ đei yua kiơ. Tơdrong ‘mêm hlơp, mă khan đei tơchĕng ‘lơ̆ng, kư̆m ưh kơ gơh bơtho tơ’bôh, bơwei tơgŭm bơngai pơm glăi wă kơ wơ̆ ‘lŏ. Kră Yang ‘Bok Kei-Dei lăng gĭt kăl tơdrong sĭt tơpăt đei pơma lăm tơdrong ‘mêm mơnat hloh kơ tơdrong ‘mêm oei hreh mă ưh kơ pơm. Tơdrong chrih bơtho tơpă gô ba ăn pŭn hiôk kơ bôl buăl mă đei tơchĕng tơgŭm.
Trong 6 lăng pơting sơlam buăl juăt tơpă păng buăl juăt hơlĕnh. Lu rơka đơ̆ng buăl juăt tơpă pơm ăn hloh kơ khan chŭm ‘mêm đơ̆ng bơngai ayăt hơlĕnh. Rơka noh juăt sư đơ̆ng bơngai ayăt pơm ăn, mălei kơplah đơ̆ng buăl juăt pơm ăn, ‘noh wă pơtih tơ’bôh tơdrong ‘mêm tơpă tôch ai đơ̆ng buăl juăt hăm bơngai mă đei tơdrong ưh kơ hiôk. Kư̆m lei-lăi thoi noh, tơdrong chŭm juăt sư tơ’bưh kơjăp hăm bơngai mă bơ̆n ‘mêm mơnat, mă-lei kơplah bơ̆n ‘bôh đơ̆ng bơngai ayăt noh bơngai hơlĕnh đĕch, tơ’bôh tơdrong blĕk klai, ưh kơ tơpă hăm bơngai mă bơ̆n chŭm (Tơdrong Pơđơ̆k 7:13; Mathiơ 26:49). Buăl juăt tơpă phŏ đei “ pơm ăn rơka” ưh kơ sĭ wă pơrăm mă-lei wă pơklaih hăm nơ̆r pơma pơjĭ ‘noh kăl kơ mơ̆ng. Lu rơka noh “ tơpăt”, ‘noh lĕch đơ̆ng jơhngơ̆m ‘mêm mơnat păng đơ̆ng lăm jơhngơ̆m tơpăt. Tơplơ̆ dơ̆ng, bơngai ayăt kư̆m đei lơ tơdrong ‘mêm chŭm, nơ̆r pơ ư, nơ̆r pơma ‘maih mơ̆ng, dah rơhâu hơlĕnh, mă-lei wă pơrăm. Lu bơ̆n pơm ‘lơ̆ng hăm lu buăl tơpăt, păng kăl kơ băt kơ lăng hơyơ mă ‘mêm mơnat tơpă, păng pơma rơngơp hơlĕnh.
Kon pơlei Kră Yang athei wơ̆ ‘lŏ lăm tơdrong arih gah bơhngol kơplah sơng iŏk tơdrong bơtho pơjĭ đơ̆ng Kră Yang lăm Nơ̆r Sư, đơ̆ng Yang Bơhngol ‘Lơ̆ng, păng đơ̆ng lu bơngai lui yom. Tơplih kơ tơdrong pơma tơgŭm, lu bơ̆n kăl kơ sơng iŏk tơdrong ‘mêm mơnat tih . Đơ̆ng noh, lu bơ̆n kư̆m krao khan apinh Kră Yang ăn tơdrong hlôh wao gơh hơgei wă kơ băt kơnăl dôm nơ̆r pơma ba lu bơ̆n năm jê̆ ‘Bok Krist, păng dôm lu nơ̆r pơma lăp đon lu bơ̆n.
Ơ Kră Yang, apinh tơgŭm inh iŏk đon ala sơng iŏk tơdrong bơtho pơjĭ păng băt pơm ‘lơ̆ng hăm bôl buăl tơpă mă Ih ăn oei hơdai inh. Kư̆m krao khan apinh Ih ăn kơ inh tơdrong gơh hơgei păng tơdrong ‘mêm wă kơ pơma tơpăt păng rơngơp hiôk. Hơpơi chăl arih inh ling-lang đei Ih chông anhăk hăm tơdrong sĭt păng ‘mêm mơnat đơ̆ng Ih. Krao khan yua anăn Kră Yang Yêsu Krist, Amen.
Lu bơ̆n pơih jơhngơ̆m sơng iŏk dôm lu nơ̆r pơma tơgŭm đĭ jơhngơ̆m tơpă hăm jơhngơ̆m đon thoi yơ?
Đŏk Sơ̆p Hla ar ‘Bok Kei-Dei lăm pêng sơnăm: Nahum 1
Kênh Youtube BHKTHN:
