Chivkeeb 9:18-28
Nqe cim:
“Nej tsis txhob haus cawv txiv hmab kom qaug, rau qhov tej ntawd yuav ua rau nej ua neeg tsis tsimtxiaj. Nej yuav tsum cia Vaj Ntsujplig kav nej lub siab” (Efexus 5:18)
Lus nug xav:
– Nau-es tau ua txhaum yam dabtsi?
– Nau-es cov menyuam tau ua li cas?
– Qhov uas lawv ua li ntawd ua rau lawv raug dabtsi?
– Peb kawm tau dabtsi dhau los ntawm zaj no?
Dej nyab ntiajteb twb xaus lawm, cov lus cog tseg pub kev kaj siab tau tsim tsa, ib lub neej tshiab tau chiv. Nau-es tsevneeg pib txhim tsa kev ua neej. Nau-es ua liaj ua teb, cog txiv hmab thiab noj tej uas nws txhais tes ua tawm. Tom qab uas sau txiv hmab los ntsuam ua cawv. Thiab ntawm no, Nau-es tau ua txhaum yuam kev txaus ntshai heev: “Thaum nws haus kua txiv hmab, ua rau nws qaug heev, thiab nws cia li hle ris tsho pw liabqab hauv tsevntaub” (nqe 21). Haus cawv ua rau tibneeg xyivfab, zoo siab tib pliag xwb, cawv yuav yog ib qhov kev ntxias txaus ntshai uas coj tibneeg mus txog qhov qaug, tswj tsis tau tus kheej, ua tej yam uas tsis tsimnyog ua. Vajtswv Txojlus qhia tias: “Nej tsis txhob haus cawv txiv hmab kom qaug, rau qhov tej ntawd yuav ua rau nej ua neeg tsis tsimtxiaj. Nej yuav tsum cia Vaj Ntsujplig kav nej lub siab” (Efexus 5:18).
Thaum lub ntiajteb ua phem ua qias thiab ua tej uas tsis tsimtxiaj, Nau-es yeej sawv ruaj khov tswj tau tus kheej, tiamsis thaum nws nyob ib leeg, tabmeeg rau tej uas cev nqaij daim tawv ntshaw, nws tau ua raws li qhov uas nws nyiam. Zoo ib yam li Adas thiab Evas nkawd, kev txhaum ua rau nkawd paub tias nkawd liab qab thiab txajmuag, ces qhov uas Nau-es qaug cawv kuj ua rau Nau-es muab ris tsho hle tas thiab txajmuag ntsuav.
Thaum pom leej txiv qaug cawv tsis hnav ris tsho, Nau-es cov tub tau coj cwjpwm sib txawv. Has uas yog cov neeg Kana-as txiv, pom leej txiv liabqab; nws tsis pab tiamsis tseem tawm mus piav rau lwm tus, qhia tawm leejtxiv qhov kev txajmuag, thiab ua rau leej txiv hajyam txajmuag ntxiv (nqe 22). Tiamsis ob tug tub uas yog Xees thiab Yafej nkawd nrhiav kev npog txiv qhov kev liabqab (nqe 23). Ob qhov kev ua ntawd coj mus tau ob yam nqi zog sib txawv. Has cajces raug foom tsis zoo, tiamsis Xees thiab Yafej cajces tau koob hmoov (nqe 24-27). Kev txhaum pheej tseg tau nqi zog hnyav heev, tsis yog tamsim ntawd xwb tiamsis tseem ntev mus tom hau ntej.
Qhov uas Nau-es qaug cawv ua rau nws liabqab, raug txajmuag no dhau mus ua rau Has ua txhaum tsis hwm leej txiv, qhia paub tias Vajtswv cawm neeg dim dej nyab tsis yog vim neeg ua tau zoo. Tus Tswv cawm lawv tsis yog lawv zoo txaus tiamsis yog Nws txoj koob hmoov hlub. Thiab lub ntiajteb tom qab uas raug dej nyab kuj tsis tau yog lub ntiajteb uas zoo tagnrho. Nyob qhov ntawd, tibneeg lub siab kuj tseem xav ua li siab nyiam, kuj tseem yuav raug ris lub txim ua txhaum. Yog li peb cia li vamkhom tus Tswv txoj koob hmoov hlub kom peb kovyeej txojkev txhaum thiab nrog tau tus Tswv mus txhua hnub.
Thov Vajtswv,
Vajtswv, nyuam yaus yog neeg txhaum, ua tsis tau zoo, ntau zaus ua raws li siab nyiam, ua yuam kev thiab tau tej nqi zog tsis raws siab xav. Tiamsis ua Koj tsaug qhov uas Koj hlub, zam txim rau nyuam yaus. Thov Koj txojkev koob hmoov hlub pab nyuam yaus kovyeej kev txhaum, thiab tau txais lub neej npluamias hauv Koj. Nyuam yaus tuav Tswv Yexus Khetos lub npe thov, Amees.
Xav txog cov nqi zog uas Nau-es qaug cawv, peb muaj kev txiav txim siab li cas rau kev haus cawv, npias thiab tej tshuaj qaug?
Nyeem Vajluskub hauv peb lub xyoo: Mikhas 7
Kênh Youtube BHKTHN:
