Kalatias 5:16-18
Nqe cim:
“Kuv qhia rau nej li no: nej yuav tsum cia Vaj Ntsujplig kav nej lub neej, nej tsis txhob cia nej lub siab kav nej ib zaug li.” (Kalatias 5:16)
Phau Txhais Tshiab HMOWSV
“Kuv hais tias, cia li ua lub neej raws li Vaj Ntsuj Plig, tsis txhob ua raws li lub cev nqaij tawv ntshaw.”
Lus nug xav:
– Timthawj Paulus piav licas txog kev tsov rog tsis tseg ntawm Vaj Ntsujplig thiab lub cev nqaij tawv?
– Vajtswv haivneeg yuav tsum mus raws Vaj Ntsujplig hauv txojkev ncaj ncees thiab txojkev hlub licas?
– Peb ua lub neej licas thaum peb mus raws Vaj Ntsujplig coj?
Mus raws Vaj Ntsujplig yog ua lub neej raws li Vaj Ntsujplig txojkev coj qhia. Vajluskub yog Vajtswv Txojlus uas los ntawm Vaj Ntsujplig tshoov siab (II Timautes 3:16) thiab txaus ntseeg heev, tsimnyog rau Vajtswv haivneeg kawm thiab ua raws. Vaj Ntsujplig qhia txog Tswv Yexus kom tibneeg txais yuav Nws ua tus Cawmseej thiab ua lub neej raws li Nws tus qauv.
Hauv cov nqe Vajluskub no, Timthawj Paulus piav txog txojkev tsov rog tsis tseg ntawm ntawm lub cev nqaij tawv thiab Vaj Ntsujplig. “Lub cev nqaij tawv” piv txog peb lub siab qub (Kalatias 5:19-21), yog lub siab coj tus mojyam uas thawb peb mus tuag hauv txojkev txhaum. Tiamsis, Vaj Ntsujplig coj peb mus rau txojkev hlub, qhov tseeb, kev ncaj ncees thiab lub siab hlub tshua. Thaum peb mus raws Vaj Ntsujplig, Nws pub hwjchim kom peb tawmtsam yeej tej kev xav coj mus rau txojkev tsis ncaj ncees, kev chim, kev sib faib thiab ua rau lwm tus mob siab.
Vajtswv haivneeg yuav tsum mus raws Vaj Ntsujplig hauv txojkev ncaj ncees thiab txojkev hlub. Txojkev hlub thiab txojkev ncaj ncees yog ob yam uas neeg ntiajteb pheej muab cais tawm, tiamsis hauv Vajtswv lub Tebchaws, ob yam no tsis txawj sib nrug li. Vaj Ntsujplig ua kom ob yam ntawd sib haum txhij txhua. Nws pub lub hwjchim kom peb hlub tshua tibneeg tiamsis kuj pub peb sawv khov kho tiv thaiv qhov tseeb thiab qhov ncaj ncees. Vaj Ntsujplig txojkev coj qhia tsis yog ua rau peb mloog txoj kevcai zoo li tej neeg hlau (robot) lossis mloog vim ntshai xwb, tiamsis yog qhov kev mloog lus los ntawm ib lub siab uas tau hloov dua tshiab lawm. Thaum Timthawj Paulus hais tias leejtwg tau Vaj Ntsujplig coj ces “txoj kevcai yeej tsis muaj hwjchim kav…lawm”, nws xav qhia hais tias tus ntseeg yuav tsum muaj lub neej siab dua qhov uas coj txoj kevcai sab nraud, thiaj ua tau lub neej qhia tshwm Vajtswv tus mojyam dhau ntawm Vaj Ntsujplig tes haujlwm hauv nws haivneeg.
Tej lub sijhawm uas chim, sib ceg lossis pom qhov tsis ncaj ncees, Vaj Ntsujplig nqua hu peb nyob tos, thov Vajtswv thiab ua txhua yam los ntawm lub tswvyim, tsis txhob ua raws peb lub siab luv. Nws nqua hu peb nqis tes ua haujlwm nrog lub siab hlub tshua txawm yog peb yuav raug poob yam ub yam no rau luag. Kev ncaj ncees uas ua los ntawm Vaj Ntsujplig lub hwjchim niaj hnub ua rau muaj txojkev ncaj, dawbhuv tiamsis yeej hlub tshua, muaj lub siab tawv tiamsis yeej mos muag. Lub neej uas tau Vaj Ntsujplig coj yuav qhia tshwm puv npo Nws cov txiv: Txojkev hlub, kev thajyeeb, siab ntev, siab zoo, paub tswj tus kheej, thiab lwm yam… Thaum peb nyob hauv Vaj Ntsujplig txojkev tswj hwm, peb lub neej yuav qhia tshwm txojkev hlub, kev ncaj ncees thiab qhov zoo ntawm Vajtswv rau lub ntiajteb uas tabtom cheemtsum tej ntawd kawg nkaus. Thov kom peb niaj hnub mus raws Vaj Ntsujplig coj, kom tau Nws nyob nrog nraim coj qhia, qhuab ntuas, pub hwjchim thiab hloov peb yim hnub yim zoo li tus Tswv heev ntxiv.
Thov Vajtswv,
Vaj Ntsujplig, thov pub nyuam yaus muaj lub tswvyim meej pem thiab lub hwjchim kov yeej lub cev nqaij tawv tus mojyam, ua lub neej raws li Tswv Yexus tus qauv, mus raws Vaj Ntsujplig hauv txojkev ncaj ncees thiab txojkev hlub, ua kom Koj lub Npe tau koobmeej. Nyuam yaus tuav Tswv Yexus Khetos lub npe thov, Amees.
Peb puas mus raws Vaj Ntsujplig hauv txojkev hlub thiab txojkev ncaj ncees lawm tau?
Nyeem Vajluskub hauv peb lub xyoos Yaunas 1-2
Kênh Youtube BHKTHN:
