Yôhan 16:7-13
“’Bok Dŏng iĕm ei, anăn Sư Yang Bơhngol ‘Lơ̆ng, Sư ‘noh ‘Bă Inh wă wơh Sư jur oei păng iĕm jang tang Inh. Sư gô bơtho iĕm tôm tơdrong păng Sư gô tơ’blŏk ăn kơ iĕm tôm tơdrong mă Inh bơtho iĕm boih.” (Yôhan 14:26)
Nơ̆r jet tơchĕng pơwao:
- Lăm Sơ̆p hla bơar Nơ̆r ‘Bok Kei-Dei ‘Bok Kei-Dei phak lu bơngai pơm yoch thoi yơ?
- Yang Bơhngol ‘Lơ̆ng tơbăt ăn kơ đĭ đăng bơngai băt kơ tơdrong yoch, tơdrong tơpăt păng tơdrong sek tơlang hăm tơdrong kiơ?
- Lu bơ̆n arih thoi yơ kơplah đei pơhrăm băt gah Yang Bơhngol ‘Lơ̆ng jơ̆ Yang Tơpăt Sĭt?
Lăm Pah So, Kră Yang ‘Bok Kei-Dei ‘lơ̆ng tơpăt lơ wơ̆t Sư đei khan lê̆ hơdrol wă pơrăm bơngai pơm yoch: ‘Bok A-đam păng yă Ê-wơ Kră Yang tơlĕch lê̆ sư đơ̆ng pơgar Ê-đen; ‘bar ‘nu ‘Bok Na-đap păng A-bi-hu lôch hloi kơplah ưh kơ pơm trŏ kơ nơ̆r Kră Yang đei bơtho khan (Lêwi 10:1-2)…’Bok Môis đei pơma Kră Yang đei tơ’bôh tơdrong tơpăt păng ‘lơ̆ng rơgoh Kră Yang: “Thoi noh Môis khan kơ Arôn tơdrong âu: Kră Yang đei khan boih, Inh gô pơdah jơhngơ̆m rơgoh Inh kơ lu đe bu mă oei jê̆ Inh păng Inh đei tơdrong đe pơyom ‘bơ̆t anăp đĭ-đăng kon pơlei. Arôn ngăn hreh.” (Lêwi 10:3). Lăm Pah ‘Nao, kư̆m đei ‘bok Ania păng yă Saphir đei tơdrong pơm glăi na Kră Yang sek tơlang măr sư jơ ‘noh hloi (Tơdrong Jang 5:5). Mălei Yang Bơhngol ‘Lơ̆ng noh jơ̆ Tơ’ngla pơlung, Yang tơpăt sĭt, Sư gô tơ’bôh chrih kơ kon bơngai lăm teh đak hăm tơdrong iơ̆m dim chang gô, ‘bĕnh kơ ‘mêm mơnat. Yang Bơhngol ‘Lơ̆ng ‘noh jơ̆ Yang Tơpăt sĭt, Sư gô pơm lăm dôm tơdrong thoi âu:
Mă mônh, Yang Bơhngol ‘Lơ̆ng đei chrih tơ ‘bôh tơdrong yoch (trong 8). “chrih tơ’bôh” lăm nơ̆r tơm wă khan “jô̆ yoch”, păng đei nơ̆r thoi âu hloi mơ̆n “pơm ăn kơ kon bơngai ‘bôh tơdrong yoch na wă tơbral”. Yang Bơhngol ‘Lơ̆ng pơm ăn lăm jơhngơ̆m kon bơngai tơbral kơplah đei băt mơn tơdrong yoch (Rôm 2:15). Tơdrong ưh kơ trŏ kơ pơm glăi hăm khôi juăt mă lei kư̆m dai tơdrong yoch noh jơ̆ ưh kơ lui kơ Kră Yang Yêsu. “yua kơ lu sư ưh kơ lui kơ Inh”. Yang Bơhngol ‘Lơ̆ng noh jơ̆ Yang chrih tơ’bôh tơdrong yoch na Kră Yang Yêsu athei lu jơ̆ng ‘bang Sư athei chang gô tơdrong mơsêh mơyang Yang Bơhngol ‘Lơ̆ng ‘mơ̆i na gơh năm pơm kơdranh kơ tơdrong Kră Yang (Jơ̆ng ‘bang 1:8)
Mă ‘bar, Yang Bơhngol ‘Lơ̆ng tơbăt ăn kơ đĭ đăng kon bơngai gah tơdrong ‘lơ̆ng tơpăt Kră Yang (trong 10). Tơdrong ‘Lơ̆ng tơpăt jơ̆ đei lăm Nơ̆r Kră Yang Yêsu bơtho kơplah Sư đei arih lăm teh đak âu sơ̆. (Mathiơ 12:18; Luka 23:47). Kơplah Kră Yang brŏk tơ ‘Bă Sư, Yang Bơhngol ‘Lơ̆ng gô jang tang Sư wă tơ’blŏk dơ̆ng đơ̆ng nơ̆r Sư bơtho. Yua kơ Yang Bơhngol ‘Lơ̆ng na lu bơngai lui kơ Kră Yang Yêsu gơh jô̆ ‘lơ̆ng tơpăt: “Lu iĕm mơ’nah pơm thoi noh tơpă mơ̆n sơ̆, mă-lei dang ei ‘Bok Kei-Dei ôp rơgoh tơdrong yoch iĕm boih, iĕm jing kon Sư ‘lơ̆ng tơpăt boih, Sư jô̆ iĕm bơngai ‘lơ̆ng yua kơ Kră Yang Yêsu Krist păng Yang Bơhngol ‘Lơ̆ng ‘Bok Kei-Dei tơgŭm bơ̆n”. (I Kôrintô 6:11)
Mă pêng, Yang Bơhngol ‘Lơ̆ng kư̆m tơgŭm kon bơngai băt kơ tơdrong sek tơlang đơ̆ng ‘Bok Kei-Dei păng tơdrong ‘noh gô truh tơpă. Tơdrong âu tơgŭm kon bơngai bơ̆n đei tơdrong krăng kơchăng, păng tơbral wă kơ hơmet tơdrong arih kơplah năr sek tơlang ei kơnh.
Yang Bơhngol ‘Lơ̆ng noh jơ̆ Yang Tơpăt Sĭt oei lăm jơhngơ̆m lu bơ̆n, tơgŭm bơ̆n arih ‘lơ̆ng tơpăt păng chrih tơ’bôh dôm tơdrong yoch kư̆m thoi tơdrong sek tơlang ning mônh wă kơ lu bơ̆n tơbral, păng arih pơm kơ Kră Yang lăp đon rim năr, đơ̆ng noh bơ̆n athei gơnang kơ tơdrong mơsêh Yang Bơhngol ‘Lơ̆ng wă pơm kơdranh gah tơdrong Kră Yang Yêsu wă kơ lơ bơngai băt kơ Kră Yang, lui kơ Sư na đei tơdrong dŏng pơklaih.
Ơ ‘Bă mă ‘lơ̆ng tơpăt! apinh Ih tơ’blŏk kơ inh wă arih kiơ̆ thoi Nơ̆r Ih đei bơtho păng tơgŭm inh băt kơ Ih jơ̆ Kră Yang ‘lơ̆ng tơpăt păng wă sek tơlang dôm tơdrong mă inh đêl pơm păng dôm nơ̆r mă inh đei pơma. Yua anăn Kră Yang Yêsu Krist, Amen.
Hăm đei tơdrong yoch ayơ mă Yang Bơhngol ‘Lơ̆ng đei tơ’blŏk kơ lu bơ̆n dang ei? Lu bơ̆n wă pơm thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Tơdrong Tơ’bôh 22
Kênh Youtube BHKTHN:
