Mathais 24:15-20
Nqe cim:
“Nej cia li thov Vaujtswv pab kom nej tsis txhob tau khiav lub caij ntuj no lossis Hnub Xanpataus!” (Mathais 24:20)
Lus nug xav:
– Tswv Yexus hais txog leejtwg cov lus?
– Cov neeg uas nyob rau tiam xya xyoo txomnyem cheemtsum ua dabtsi?
– Peb muab Tswv Yexus cov lus qhia siv rau tiam no zoo li cas?
Tswv Yexus hais txog Daniyees tus uas cev Vajtswv lus cov lus hais ntsigtxog xya caum zaus xya hauv Daniyees 9:24-27. Nws xav hais txog ntu sijhawm ntawm cov neeg Yudais, “xya caum zaus xya ntawd yog lub sijhawm uas teem cia rau koj haivneeg thiab lub nroog dawbhuv…” (Daniyees 9:24), Tswv Yexus qhia paub txog qhov xwmtxheej ntawm lub limtiam xya caum ntsigtxog lub tuamtsev hauv nroog Yeluxalees uas yog qhov chaw dawbhuv, “yuav pom luag muab yam uas ‘Phem Kawg Nkaus’ tso rau hauv qhov chaw dawbhuv” (nqe 15), txhais tau hais tias yog thaum pom cov xwm no tshwm sim ces peb paub hais tias yus tabtom nyob rau ntu sijhawm twg hauv xya xyoo txomnyem uas hais hauv Daniyees 9:27: “Tus thawjtswj tebchaws ntawd yuav nrog ntau leej coglus ruaj khov thiab muaj kev sib raug zoo txog xya xyoo. Thaum xyoo xya ntawd mus txog ib nrab, nws yuav ua kom sawvdaws tseg tsis tua tsiaj thiab tsis muab khoom fij rau Vajtswv lawm. Nyob saum lub Tuamtsev qhov chaw uas siab tshaj plaws yuav muaj ib yam txawv txawv uas phem qias kawg nkaus teeb rau saud, thiab yam ntawd yuav nyob saud mus txog thaum tus uas nqa yam ntawd tuaj raug txim raws li Vajtswv tau npaj tseg rau nws lawm”.
Tswv Yexus twb qhia cov neeg uas nyob hauv lub tebchaws Yudais kom cia li khiav mus pem tej roob (nqe 16) vim tej xwm tshwm muaj ntawm xya xyoo txomnyem yuav raug lub nroog Yeluxalees thiab tebchaws Yudais. Leejtwg tabtom nyob saum ru tsev tsis txhob nqis los nqa nws tej khoom, thiab cov uas tabtom nyob tom teb tsis txhob rov los nqa nws lub tsho ntev (nqe 17-18), vim tsis muaj txaus sijhawm, thiab tej ntawd pab tsis kom tibneeg khiav dim xya xyoo txomnyem. Cia li muab txhua yam tseg khiav mus nkaum. Cov uas txomnyem tu siab tshaj nyob tiam xya xyoo txomnyem yog cov pojniam uas suab menyuam hauv plab thiab cov pojniam uas muaj menyuam mos, lawv yuav khiav tsis taus nrawm yog li lawv yuav ntsib kev txomnyem, txaus ntshai heev. Kuj yuav tsum thov Vajtswv pab kom tsis txhob tau khiav rau lub caij ntuj no, vim huab cua txias heev; lossis tshwmsim rau hnub Xanpataus, txoj kevcai tsis pub mus kev deb (Khiavdim 16:29). Yog tshwm muaj xya xyoo txomnyem rau lub sijhawm ntawd, txhua tus neeg yuav khiav tsis yeej.
Tus Tswv cov lus hais txog tej xwm tshwm rau lub sijhawm kawg no yog tej lus hais txog lub nroog Yeluxalees thiab cov neeg Yudais. Txawm yog li ntawd los, nimno nyeem ntu Vajluskub no thiab phau Daniyees, peb txhua tus xav txog tej cim tiam kawg uas peb tabtom nyob no, ua rau peb paub ntshai thiab npaj tus kheej kom txhij. Tswv Yexus hlub peb heev, Nws “ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg” (II Petus 3:9), yog li ntawd, peb yuav tau ua tib zoo saib peb tus kheej thiab lees txim thaum paub tias tiam koob hmoov tseem muaj, tsis txhob ua neeg tawv ncauj, tsis ntseeg thiab ua kev txhaum, vim thaum tiam xya xyoo txomnyem pib ces yuav yog tiam uas tu siab kawg nkaus. Thov Vajtswv qhia peb paub ceevfaj ua neej nyob tos tus Tswv rov qab los.
Thov Vajtswv,
Vajtswv tus uas muaj kev hlub, ua tsaug qhov Koj tsis cia nyuam yaus tas kev cia siab, yog li Koj thiaj muab Koj txojlus los qhia, ceebtoom nyuam yaus, thov Koj pab kom nyuam yaus niaj hnub muab Koj txojlus los tshuaj tus kheej kom paub qhov txhaum thiab tso kev txhaum tseg. Nyuam yaus tuav Tswv Yexus lub npe thov, Amees.
Peb npaj tus kheej zoo li cas nyob tos tus Tswv rov los?
Nyeem Vajluskub hauv peb lub xyoo: Tshwmsim 9
Kênh Youtube BHKTHN:
