Tơdrong jang 1:1-11
“Ơ bơngai Galilê, iĕm lăng ‘bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n.” (Tơdrong jang 1:11)
Nơ̆r jet tơchĕng pơwao:
– Adrol kơ tŏk tơ plĕnh, Kră Yang pơjao kơ lu bơngai pơhrăm păng Sư păng lu bơ̆n tơdrong jang kiơ?
– Kră Yang ăn tơdrong mơsêh ayơ wă kơ bơ̆n năm ră roi gah Kră Yang?
– Kră Yang tŏk tơ plĕnh ăn kơ bơ̆n tơdrong hơmĕng ayơ?
Đơ̆ng rŏng kơ iung arih, Kră Yang oei hơdai hăm lu bơngai pơhrăm păng Sư 40 năr, bơtho lu sư gah Dêh Char ‘Bok Kei-Dei. Adrol kơ tŏk tơ plĕnh, Sư pơkă ‘nĕ kơ lĕch đơ̆ng dêh Jêrusalem, mălei gô Yang Bơhngol ‘Lơ̆ng jur, Sư gô ăn tơdrong mơsêh kơ lu bơngai pơhrăm păng Sư wă năm bơtho tơdrong Kră Yang jơ̆p jang kơ teh đak. Đơ̆ng noh, Kră Yang Yêsu tŏk tơ plĕnh lu bơngai pơhrăm păng Sư nhơ̆m, păng đei hơmơ̆l gom pĕng Sư. ‘Bar ‘nu linh jang ‘lơ̆ng jur, khan kơ lu bơngai pơhrăm păng Sư khan Sư gô jur dơ̆ng kư̆m thoi Sư tŏk mơ̆n.
Phĕt ‘blŏk kơ Kră Yang tŏk tơ plĕnh, Kră Yang đei tơ’blŏk kơ bơ̆n adrin jang tơdrong jang Kră Yang pơjao ding truh năr tơ’bơ̆p Kră Yang, hăm dôm tơdrong jang ‘nao. Mă mônh, pơih blŭng a tơdrong jang ‘nao. Kră Yang pơm keh tơdrong jang Sư tơ ala teh, Sư tŏk tơ plĕnh oei gah ‘ma kơ ‘Bok Kei-Dei wă krao khan tang bơ̆n adrin jang tơdrong jang Kră Yang pơjao, pơm kơdranh gah Kră Yang kơ jơ̆p jang teh đak. Kơplah lu bơngai pơhrăm păng Sư hnhoi Sư tŏk tơ plĕnh, đei ‘bar ‘nu linh jang ‘lơ̆ng khan kơ lu sư, “Iĕm lăng ‘bloh chă kiơ tơ plĕnh”! Kră Yang wă kơ bơ̆n arih hăm tơdrong arih thoi krô hmă pơm kiơ̆ tơdrong jang Kră Yang pơjao, adrin ră roi pơm kơdranh kơ Kră Yang.
Mă ‘bar, pơm kơdranh gah Kră Yang hăm tơdrong mơsêh ‘nao. Kră Yang Yêsu tŏk tơ plĕnh bơih mălei Sư pơkă “Inh oei hơdai hăm lu iĕm ling lang truh năr tôch ning mônh” (Mathiơ 28:20). ‘Noh bơih nơ̆r pơkă Yang Bơhngol ‘Lơ̆ng gô jur, oei hơdai hăm kon pơlei Kră Yang, păng Yang Bơhngol ‘Lơ̆ng kư̆m gô ăn tơdrong mơsêh wă kơ bơ̆n pơm kơdranh gah Kră Yang jơ̆p jang kơ teh đak (trong 8).
Mă pêng, arih hăm tơdrong hơmĕng ‘nao. Bre ‘bar ‘nu linh jang ‘lơ̆ng Kră Yang hrŭk ao kok dơ̆ng jê̆ hăm lu bơngai pơhrăm păng Sư mă oei lăng hnhoi Kră Yang tŏk tơ plĕnh na khan: “Ơ bơngai Galilê, iĕm lăng ‘bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n.” (trong 11). Nơ̆r khan ‘nâu ưh kơ sĭ tơ’blŏk kơ lu bơngai pơhrăm păng Sư wih brŏk wă pơm kơdranh gah Kră Yang đĕch ôh na kư̆m tơ’blŏk kơ đĭ đăng kon Kră Yang hăm tơdrong hơmĕng ‘nao: Kră Yang gô jur dơ̆ng. Lăm tơdrong hơmĕng noh lu bơ̆n đei jơhngơ̆m ‘maih wă pơm kơdranh kơ Kră Yang hăm jơhngơ̆m lăng tơchĕng tơ pơlei ‘lơ̆ng, tơ anih Kră Yang tŏk tơ plĕnh wă hơmet kơ bơ̆n anih oei, păng năr Kră Yang jur bơ̆n gô hơdai Sư mơ̆t tơ anih ‘lơ̆ng rŏ ling lang.
Hơpơi năr ‘blŏk kơ Kră Yang tŏk tơ plĕnh gô ba ăn kơ bơ̆n tơdrong jang ‘nao păng pơchŭt bơ̆n adrin pơm kiơ̆ tơdrong jang Kră Yang pơjao lăm jơ kơplah oei chang gô năr Kră Yang jur dơ̆ng.
Ơ Yang Bơhngol ‘lơ̆ng, apinh Ih bơ̆jang mă pran lăm inh wă kơ inh adrin pơm kơdranh gah Kră Yang kơ lu bơngai oei jum dăr. Apinh Kră Yang tơ’blŏk kơ lơ bơhngol băt tơbral wih brŏk tơ Kră Yang wă kơ năr Kră Yang jur dơ̆ng gô đei lơ bơngai gơh klaih, krao khan yua anăn Kră Yang Yêsu Krist, Amen.
Bơ̆n pơkă hăm Kră Yang tơdrong kiơ lăm năr ‘blŏk kơ Kră Yang tŏk tơ plĕnh lăm sơnăm ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 4
Kênh Youtube BHKTHN:
