Klei Aê Diê Blŭ: I Y-Pêtrôs 5:5-7
Êlan kliăng: “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih” (I Y-Pêtrôs 5:7)
Klei êmuh ksiêm mĭn: Ya klei ngă kơ đa đa phung đăo lŏ kdŭn wĭt kơ tluôn êjai dôk ktuê êlan tui hlue Khua Yang? Si Aê Diê srăng răng kriê phung ƀuôn sang Ñu? Ya klei – klei hriăm anei bi mđĭ ai drei êjai ktuê êlan myang tui hlue Khua Yang?
Phung đăo kơ Krist dôk hdĭp ti lăn ala anei amâo dưi tlaih ôh kơ klei tuôm hŏng klei rŭng răng, klei knap mñai, klei lông dlăng, leh anăn tăp năng jing msĕ si dôk ti tur ƀăng êlam klei luč klei čang hmăng. Jih jang klei anăn jing mnơ̆ng bi gun ngă kơ đa đa phung đăo êmuh kơ digơ̆ pô snei, “Aê Diê ƀuh mơ̆ klei truh kơ kâo?”, mâo mnuih bŏ hŏng klei ênguôt leh anăn lŏ wĭt kơ tluôn mơ̆ng êlan tui hluê Khua Yang.
Ƀiădah brei grăp čô phung đăo drei hdơr Aê Diê srăng răng kriê jih jang klei kơ drei, wăt klei drei krao amâo truh blŭ ôh. Ƀiădah lĕ, čiăng kơ Aê Diê răng kriê, brei drei “hơô klei luă gŭ… bi luă gŭ bĕ drei pô ti gŭ kngan myang Aê Diê” (êlan 5-6). Tơdah drei bi luă gŭ drei pô leh anăn đăo kơ klei myang Aê Diê kiă kriê kluôm dhuôm, tŭ ư kơ Ñu atăt gai kơh drei dưi ha blŭ msĕ si Y-Yôsep lač kơ phung ayŏng ñu snei, “Diih mĭn ngă ƀai kơ kâo, ƀiădah Aê Diê brei klei anăn jing jăk…” (Klei Mphŭn Dơ̆ng 50:20). Aê Diê pô yơh amâo djŏ sa čô pô mkăn ôh “…dưi bi mđĭ diih hlăm ênuk djŏ” (êlan 6).
Drei đăo sĭt nik Aê Diê srăng răng kriê nanao tui si klei Khua ƀĭng kna Y-Pêtrôs mtă leh kyuadah “Ñu amâo hơưi Anak Ñu pô ôh, ƀiădah jao Gơ̆ leh kyua jih jang drei, Ñu amâo srăng brei ôh hĕ kơ drei jih jang mnơ̆ng mbĭt hŏng Gơ̆” (Rôm 8:32). Wăt snăn dưn, phŭn kơ klei drei ka dưi mă tŭ ôh klei Aê Diê răng kriê brei kyuadah drei ka mâo klei đăo kluôm ênŭm čiăng jao jih ôh klei ktrŏ drei kơ Ñu. Kyuanăn, čiăng kơ Aê Diê răng kriê kơ drei, klei brei drei ngă jing “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih” (êlan 7). “Jih jang klei uêñ hnĭng” amâo djŏ ôh knŏng jao kơ Aê Diê ya klei drei amâo dưi ngă, ƀiădah ăt djă pioh kơ drei pô ya klei drei mĭn ai ktang drei pô dưi ngă. Brei grăp čô phung đăo kơ Krist hdơr leh anăn lač hŏng klei jhŏng snei, “Ơ Yêhôwa, Ih srăng čuăn klei êđăp ênang kơ hmei, jih bruă hmei ngă leh, Ih ngă brei leh kơ hmei” (Y-Êsai 26:12).
Klei hriăm anei bi mđĭ ai drei tơdah tuôm hŏng klei knap mñai, klei lông dlăng, hrô kơ klei êdu ai, ƀuah Aê Diê, lui wir klei đăo, brei drei ăt dôk kjăp, knang kơ Aê Diê kluôm dhuôm. Kyuadah Aê Diê jing Pô khăp kơ drei leh anăn srăng brei kơ drei mnơ̆ng jăk hĭn djŏ mmông Ñu. Đăm ruăt duah klei đru mơ̆ng mnuih ôh, ƀiădah hriê bĕ kơ Khua Yang, čuôn kơŭt, hưn jih klei awăt êdu drei kơ Khua Yang leh anăn “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih” (êlan 7).
Si drei srăng bi ktlă anăp hŏng klei knap mñai, klei lông dlăng tơdah thâo Khua Yang srăng răng kriê kơ drei nanao?
Wah lač: Ơ Khua Yang, kâo bi mni kơ Ih kyuadah klei khăp leh anăn klei Ih răng kriê kâo prŏng êdimima. Akâo Ih bi kjăp kâo, brei kâo mâo ai tiê luă gŭ leh anăn thâo gĭr čiăng kơ kâo ăt dôk sĭt suôr êbat tơl tuč êlan wĭt kơ Ƀuôn Jăk măng ai ya klei truh dưn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
