Klei Aê Diê Blŭ: I Y-Pêtrôs 5:5
Êlan kliăng: “Msĕ mơh kơ diih jing phung hlăk ai, brei diih gưt kơ phung khua mduôn. Brei jih jang diih hơô klei luă gŭ êjai hdĭp hdơ̆ng diih, kyuadah “Aê Diê bi kdơ̆ng hŏng phung mgao, ƀiădah brei klei pap kơ phung luă gŭ.” (I Y Pêtrôs 5:5)
Klei êmuh ksiêm mĭn: Ya klei Khua ƀĭng kna Y-Pêtrôs mtă kơ phung đăo jing phung hlăk ai? Ya ngă brei jih jang phung đăo hơô klei luă gŭ? Khua ƀĭng kna Y-Pêtrôs mtă klei anei ti anôk ñu kna? Si klei hriăm anei bi hriăm kơ phung hlăk ai wăt kơ phung khua kiă kriê leh anăn mă bruă hlăm Phung Sang Aê Diê?
Khua ƀĭng kna Y-Pêtrôs mtă brei phung hlăk ai gưt kơ phung khua mduôn jing phung kiă kriê klei hdĭp myang. Lu blư̆ phung kiă kriê dlăng hơăi mang kơ phung hlăk ai dôk mda thŭn kyuanăn kƀah klei thâo săng brei kơ digơ̆; leh anăn phung hlăk ai kăn mpŭ leh anăn gưt rei kơ phung kiă kriê. Tinei, Khua ƀĭng kna Y-Pêtrôs amâo mgô̆ phung hlăk ai gưt hơăi mang ôh, ƀiădah ñu mtă kơ jih jang wăt phung kiă kriê leh anăn phung hlăk ai, “brei jih jang diih hơô klei luă gŭ êjai hdĭp hdơ̆ng diih”. Brei phung kiă kriê mă bruă hŏng klei luă gŭ, leh anăn brei phung hlăk bi luă gŭ diñu pô gưt kơ phung kiă kriê. Klei luă gŭ sĭt srăng đru drei măng ai dŭm thŭn drei jing ăt drei srăng hriăm, kăp dôk hmư̆ leh anăn bi pap brei mơh hdơ̆ng drei. Leh anăn klei yuôm hĭn čiăng kơ phung hlăk ai gưt jing klei phung kiă kriê dôk dơ̆ng ƀơ̆ng huă, mă bruă hŏng jih ai tiê leh anăn jing klei bi hmô kơ phung biăp (I Y-Pêtrôs 5:1-4).
Khua ƀĭng kna Y-Pêtrôs mtă klei anei kna ti klei Khua Yang Yêsu mtă êjai Ñu rao jơ̆ng phung ƀĭng kna, klei mtă anăn jing yuôm dôk nanao hlăm ai tiê ñu amâo dưi wơr bĭt ôh. Hŏng phung ƀĭng kna, Khua Yang Yêsu jing Aê Diê leh anăn jing sa čô Nai mơh, ƀiădah hŏng klei luă gŭ Ñu mă sa blah čhiăm hyuă ti kơiêng, tuh êa hlăm sa boh hmăm leh anăn rao jơ̆ng phung ƀĭng kna, rao wăt jơ̆ng Y-Yudas Iskariôt mơh (Y-Yôhan 13:3-5). Khua Yang Yêsu hyuă leh kơiêng hŏng čhiăm klei luă gŭ, leh anăn Ñu bi hriăm drei jing phung tui hlue Ñu ăt bi mă bruă hŏng klei luă gŭ mơh hdơ̆ng drei. Klei Khua Yang Yêsu bi hmô kơ klei luă gŭ yơh mtrŭt phung đăo kơ Ñu mâo klei jhŏng bi êdah klei dôk dơ̆ng ƀơ̆ng huă hŏng klei luă gŭ, mă bruă kơ jih jang mnuih. Êngao kơnăn, Khua ƀĭng kna Y-Pêtrôs hrêč yua Klei Aê Diê Blŭ hlăm Klei Bi Hriêng 3:34 mơh čiăng bi mđĭ ai phung khua mduôn wăt phung hlăk ai. Pô mâo klei hdĭp luă gŭ, dôk jăk, leh anăn gưt asăp srăng mă tŭ klei jăk jĭn Aê Diê brei. Anăn jing klei hdĭp mă bruă, gưt asăp, leh anăn bi mơak kơ Khua Yang.
Phung Sang Aê Diê čiăng snăk phung kiă kriê mă bruă hŏng klei mĭn luă gŭ, bi hmô jăk, dôk hmư̆ leh anăn thâo săng kơ phung hlăk ai. Akâo Khua Yang đru phung kiă kriê yua klei pô tuôm găn leh, klei thâo săng, ai tiê jăk, klei gĭr čiăng bi mđĭ ai, mtrŭt leh anăn bi hriăm phung hlăk ai mă bruă kơ Khua Yang. Jing phung hlăk ai, yua bĕ bi jăk ênuk hlăk ai, klei ktang, klei thâo, klei hur har bi mguôp mbĭt hŏng klei luă gŭ hmư̆ leh anăn gưt asăp. Čiăng snăk jih jang drei sa ai hŏng jih ai tiê mă bruă kơ Khua Yang, ba boh tŭ dưn leh anăn bi guh kơang kơ Aê Diê.
Si drei dôk hơô klei luă gŭ mă bruă kơ Khua Yang?
Wah lač: Ơ Khua Yang Pô bŏ hŏng klei khăp, lač jăk kơ Ih kyuadah klei Khua Yang Yêsu bi hmô leh kơ klei luă gŭ mñă nanao kơ kâo brei hơô klei luă gŭ. Đru grăp čô hmei măng ai dŭm thŭn hmei jing brei hmei ăt mă bruă kơ Ih hŏng jih ai tiê mơh čiăng kơ Phung Sang Aê Diê dưi đĭ hriê kơ prŏng. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
