I Petus 3:20-22
Nqe cim:
“Nws mus rau saum ntuj ceebtsheej thiab nws zaum ntawm Vajtswv sab xis, nws kav tagnrho cov timtswv saum ntuj thiab cov uas muaj hwjchim huv tibsi.” (I Petus 3:22).
Lus nug xav:
– Timthawj Petus muab daim duab pivtxwv twg los hais txog txojkev cawmdim rau cov neeg uas yog tus Tswv tug?
– Lo lus tshajtawm hauv nqe 22 ua tabpov txog yam dabtsi?
– Los ntawm yam dabtsi peb thiaj kovyeej tagnrho txhua tsamthawj hauv lubneej?
Timthawj Petus tau muab Txoj Kevcai Raus Dej los ua ib tus yam ntxwv “piv txog” kev dim (nqe 21), thiab qhov kev dim ntawd yog qhov uas 8 leej hauv Nau-es tsev neeg tau cawmdim ntawm dej nyab. Dej tau voob tasnrho tibneeg ntiajteb, tiamsis dej kuj tau tsaws Nau-es lub nkoj kom siab thiaj cawm tau tasnrho Nau-es tsev neeg. Yog li ntawd, Nau-es tsev neeg yog daim duab pivtxwv txog txojkev cawmdim hauv Tswv Yexus, Tus uas tiv thaiv cov ntseeg kom nyob tsis txhawj tabmeeg Vajtswv txojkev txiav txim.
Txoj Kevcai Raus Dej tsuas yog daim duab pivtxwv txog txojkev cawmdim xwb tiamsis “txoj kevcai ntawd tsis tau hais tias yuav ntxuav… lub cev kom huv” (nqe 21), tsis muaj peevxwm pab ntxuav tej kev txhaum thiab pab kom peb tau cawm dim. Txoj Kevcai Raus Dej yog “tej lus cog tseg rau Vajtswv tias muaj lub siab dawb paug lawm. Txojkev dim ntawd yog tau ntawm qhov uas Yexus Khetos ciaj sawv rov los” (nqe 21 HMOWSV). Xibhwb John MacArthur tau piav txhais li no: “Yog leejtwg xav tau cawm dim, qhov xubthawj yuav tsum tuaj cuag Vajtswv los ntawm lub siab xav muaj ib nplooj siab zoo, huv si, thiab npaj txhij ua raws li tej uas yuav tsum tau ua kom tau cawmdim uas yog kev hloov siab tshiab thiab kev ntseeg”. Hais tau hais tias, Txoj Kevcai Raus Dej yog ua qhia tshwm kev txiav txim siab ntawm ib tug neeg uas coglus sib txuas nrog Yexus Khetos hauv tus Tswv txojkev tuag thiab sawv rov los (Loos 6:3-4). Nyob rau tiam ntawd, Txoj Kevcai Raus Dej yog kev lees tabmeeg sawvdaws paub hais tias yus yog ib tug hauv cov neeg uas tau hu hais tias cov ntseeg Yexus, yog ib pab neeg uas raug luag ntxub thiab saib tsis taus. Txais Kevcai Raus Dej yog tes haujlwm coglus koom nrog Yexus Khetos nyob ua ke thiab tuag ua ke, yog lo lus thov Vajtswv pub muaj ib nplooj siab dawb paug.
Vim licas Nau-es thiaj tau cawm dim? Chivkeeb 6:8 hais tias: “Tiamsis tus TSWV txaus siab heev rau Nau-es”, txhais tau hais tias vim Nau-es thiab nws tsev neeg tau txais Vajtswv txoj koob hmoov hlub. Yog tsis muaj li ntawd, nws yeej tseem yuav digmuag sab ntsujplig thiab tuag hauv dej ib yam li txhua tus tibneeg uas nyob tiam ntawd. Yog li ntawd, Tswv Yexus txojkev kovyeej uas ci ntsa iab dhau ntawm txojkev txomnyem, kev tuag, thiab kev sawv rov los tau pub rau tibneeg tau txais ib yam uas lawv tus kheej nrhiav tsis tau, ntawd yog txojkev cawmdim.
Nqe 22 tshajtawm hais tias Ntoo Khaublig thiab Tswv Yexus txojkev Sawv Rov Los twb kovyeej tagnrho txhua lub hwjchim uas tsaus ntuj nti, thiab pub txojkev cawmdim mus ibtxhis rau cov neeg uas yog Nws tug. Lo lus tshajtawm no kuj ua tabpov tseg hais tias txawm yog peb nyob hauv tej kev sim siab txomnyem li cas los peb yeej niaj hnub kovyeej vim peb nyob hauv Tswv Yexus, Tus muaj yeej uas ci ntsa iab. Niaj hnub nimno, peb tsis tsuas yog saib Tswv Yexus zoo li ib tug qauv uas kovyeej txojkev txomnyem, kev sim siab, thiab kev tsis ncaj ncees xwb, tiamsis peb kuj tau los koom txhij txhua txojkev muaj yeej ntawd mus ibtxhis thiab.
.
Thov Vajtswv,
Haleluyas qhuas Tswv Yexus vim Koj txojkev kovyeej uas ci ntsa iab saum ntoo khaublig. Thov kom tagnrho nyuam yaus lubneej yuav tseg los pehawm thiab ua Koj tes haujlwm xwb. Nyuam yaus tuav Tswv Yexus Khetos lub npe thov, Amees.
Peb puas txiav txim siab niaj hnub nyob hauv tus Tswv kom tau lubneej muaj yeej?
Nyeem Vajluskub hauv peb lub xyoos: Daniyees 8
Kênh Youtube BHKTHN:
