Klei Aê Diê Blŭ: I Kôrantô 4:14-21
Êlan kliăng: “Kâo amâo čih klei anei čiăng bi hêñ diih ôh, ƀiădah čiăng ƀuah mkra diih msĕ si phung anak kâo khăp” (I Kôrantô 4:14)
Klei êmuh ksiêm mĭn: Hŏng ya bruă klam Khua ƀĭng kna Y-Pôl čih klei bi hriăm, ƀuah mơ̆ng akŏ hră truh ară anei? Si ñu mtă leh kơ phung đăo ti Kôrantô? Ya klei brei drei ngă hŏng phung anak hlăm klei hdĭp mngăt pô?
Khua ƀĭng kna Y-Pôl ruah klei klah čŭn pă kdrêč lač kơ klei bi kah hlăm Phung Sang Aê Diê Kôrantô hŏng sa ai tiê bŏ hŏng klei khăp. Ñu mphŭn hŏng bruă brei kơ digơ̆ thâo săng kơ klei kñăm mơ̆ng klei mñă, ƀuah mâo kdrêč ƀhĭ klĭ leh anăn ktang amâo djŏ čiăng bi hêñ diñu ôh ƀiădah čiăng “ƀuah mkra” (êlan 14, 16). Jing pô mâo klei mĭn mkŏ mjing leh anăn mkŏ mjing Phung Sang Aê Diê Kôrantô leh pluh sa păn mlan (Bruă Phung Khua Ƀĭng Kna 18:1-11), năng ai ñu ênguôt snăk leh hmư̆ Phung Sang Aê Diê mâo klei mtŭk mtŭl. Leh anăn ñu ăt jing pô ruă ai tiê hĭn tơdah ƀuah mkra diñu, phung ñu iêô jing “phung anak kâo khăp” (êlan 14).
Khua ƀĭng kna Y-Pôl mtă kơ phung anak hlăm mngăt ti Kôrantô, brei jing “phung tui kâo” (êlan 16). Êlâo anăn, hlăm I Kôrantô 11:1 ñu lač leh: “Brei diih jing phung tui kâo, msĕ si kâo jing pô tui Krist”. Anăn jing mta phŭn Khua ƀĭng kna Y-Pôl ăt kăn lui leh anăn hêñ leh mtô mtă kơ phung anak hlăm mngăt ñu brei tui hlue klei ñu bi hmô. Msĕ si Y-Môis, ama kơ djuê ana Israel, tuôm dôk gŭ čiăng mñă kơ Israel leh anăn ênuk lŏ čuê kơ klei bhiăn Aê Diê, Khua ƀĭng kna Y-Pôl ăt kăn mdei hlăm bruă dôk bi hmô, ñu lŏ tiŏ nao Y-Timôthê, pô ñu iêô jing “anak kâo khăp” truh hŏng “anak čô kâo khăp” čiăng mñă kơ digơ̆ hdơr “si klei kâo dôk dơ̆ng ƀơ̆ng huă hlăm Krist” (êlan 17). Ama jăk bi hmô kơ phung anak čô ƀiădah ăt kăn dlăng hơăi mang bruă mtô hŏng klei blŭ. Leh anăn amâo djŏ knŏng mtô sa blư̆ ôh, Khua ƀĭng kna Y-Pôl lŏ duah hdră čiăng mñă wĭt kyua hŭi diñu srăng wơr hĕ klei hriăm leh.
Êngao anăn, hlăm bruă klam ama hlăm klei hdĭp mngăt, hlăm dŭm êlan knhal tuč, Khua ƀĭng kna Y-Pôl lač kơ sa klei mkăn ăt čiăng snăk mơ̆ng bruă jing amĭ ama jing kpĭ mjuăt. Msĕ si đa đa phung đăo Kôrantô dôk bi mĭn Khua ƀĭng kna Y-Pôl knŏng yơr kngan čăm djơ djĕ, knŏng čih hră đuč kyua ñu mâo lu bruă leh anăn amâo djăp klei mđing uêñ nao truh hŏng Phung Sang Aê Diê pô ôh (êlan 17-21). Msĕ si sa čô ama kjăp, gĭr hŏng anak, Khua ƀĭng kna Y-Pôl lač ñu srăng hnưm nao čhưn digơ̆. Leh anăn leh truh, tơdah čiăng, snăn ñu srăng “djă giê” truh hŏng digơ̆!
Grăp čô drei mâo sơăi mnuih drei atăt leh kơ Khua Yang, ăt brei drei mđing uêñ truh hŏng “anak hlăm mngăt” anăn leh digơ̆ ngă leh ƀaptem, leh anăn boh nik hlăk drei ƀuh diñu mâo knuih hdĭp soh. Čiăng dưi đru ayŏng adei pô, brei drei hriăm Klei Aê Diê Blŭ, hdĭp hlue si klei Khua Yang bi hmô leh anăn gĭr kriê dlăng hŏng ai tiê bŏ hŏng klei khăp msĕ si ama anak.
Si pô atăt drei nao kơ Khua Yang srăng lač tơdah thâo kơ boh klei hlăm mngăt drei?
Wah lač: Ơ Khua Yang, akâo kơ Ih đru kâo amâo ngă mgao leh anăn dlăng hơaĭ mang tơdah phung mâo klei hdĭp prŏng hlăm mngăt ƀuah mkra. Akâo kơ Ih đru kâo hơĭt ai tiê mđing kơ phung kâo atăt kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniêl 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
