1 Kauleethaus 4:14-21
Nqe cim:
“Kuv sau tsab ntawv no tuaj rau nej tsis yog kuv xav kom nej txajmuag, tiamsis kuv sau tuaj ntuas nej ib yam li kuv ntuas cov menyuam uas kuv hlub” (1 Kauleethaus 4:14)
Lus nug xav:
– Timthawj Paulus sau tej lus qhuab qhia, cem txij thaum pib sau ntawv los txog thaum no, nws muaj cai dabtsi?
– Nws qhuab ntuas cov ntseeg Kauleethaus li cas?
– Peb yuav tsum ua li cas rau cov menyuam ntsujplig?
Timthawj Paulus xaus zog plaub tshooj Vajluskub no hais txog kev faib ua pab ua pawg hauv Pawg ntseeg Kauleethaus, los ntawm lub siab puv npo kev hlub. Nws pib qhia kom lawv totaub lub homphiaj ntuas, cem tsis yog ua kom lawv txajmuag tiamsis yog “qhuab ntuas” (nqe 14, 16). Vim nws yog tus tsim tsa muaj Pawg ntseeg ntawd tom qab kaum yim lub hli ua haujlwm sawv ruaj khov nrog lawv (Tes Haujlwm 18:1–11), tseeb tiag Paulus yog tus nyuaj siab tshaj thaum uas hnov txog Pawg ntseeg tsis sib haumxeeb ntxhov hnyo. Thiab nws kuj yog tus mob siab dua thaum uas cem lawv, yog cov uas nws hu hais tias “cov menyuam uas kuv hlub” (nqe 14).
Timthawj Paulus ntuas nws cov menyuam sab ntsujplig ntawm Kauleethaus hais tias “Nej xyaum ua raws li kuv tus yam ntxwv” (nqe 16). Ua ntej ntawd, hauv 1 Kauleethaus 11:1 nws kuj tau hais tias “Nej xyaum ua raws li kuv tus yam ntxwv, ib yam li kuv xyaum ua raws li Yexus Khetos tus yam ntxwv”. Ntawd yog qhov vimchiv uas nws tsis txajmuag ntuas nws cov menyuam sab ntsujplig cia li xyaum nws tus yam ntxwv. Zoo li Mauxes, uas yog cov Yixalayees ib leej txiv laus, tau ntuas cov Yiaxalayees thiab tiam hluas txuas ntxiv txog Vajtswv tej Kevcai. Timthawj Paulus tsis yog xaus rau ntawm kev ua yam ntxwv xwb, tiamsis nws tseem txib Timautes, tus uas nws hu “kuv tus tub uas kuv hlub” tuaj rau ntawm “kuv cov menyuam uas kuv hlub” cia ntuas lawv, “nco txog qhov uas kuv nrog Yexus Khetos koom ib txojsia” (nqe 17). Leej txiv zoo tsis yog ua qauv rau cov menyuam xwb tiamsis yeej qhuab qhia los ntawm tej lus hais thiab tsis yog qhuab qhia ib zaug xwb, timthawj Paulus tseem nrhiav kev qhia dua ntxiv vim ntshai tsam lawv hnov qab tej uas lawv twb kawm lawm.
Dua li ntawd, nyob rau ntawm ob peb nqe kawg, timthawj Paulus hais feemxyuam leej txiv ntawm sab ntsujplig, mas cheem tsum muaj kev qhuab ntuas yus cov menyuam. Tej zaum cov ntseeg Kauleethaus tabtom xav hais tias Paulus tsuas yog hais hem xwb, tsuas yog sau ntawv xwb yeej tsis muaj sijhawm thiab yeej hmov tshua tsis txaus uas yuav tuaj ntsib lawv Pawg ntseeg tim ntsejmuag (nqe 17-21). Tiamsis Paulus zoo li ib leej txiv sawv ruaj khov, siab ntev rau nws cov menyaum, Paulus hais nws yeej yuav tuaj sai saib lawv. Thiab thaum tuaj, yog cheemtsum ces nws yuav nqa “nplawm” mus rau ntawm lawv!
Peb txhua tus puavleej coj tau qee tus neeg los cuag Vajtswv, peb cheemtsum hmov tshua txog cov neeg yog “menyuam sab ntsujplig” tom qab uas lawv ua Kevcai raus dej lawd, thiab tshwjxeeb yog thaum peb pom lawv ua neej yuam kev. Cia kom peb yuav pab tau peb cov kwvtij ntseeg, peb yuav tsum kawm Vajtswv Txojlus, ua neej raws Tswv Yexus tus qauv thiab ua siab ntev tu lawv ntawm lub siab hlub zoo li leej txiv thiab cov menyuam.
Thov Vajtswv,
Vajtswv thov pab nyuam yaus tsis ua neeg khavtheeb, thiab saib taus lwm tus tej lus qhuab nyuam yaus sab ntsujplig. Thiab thov pab nyuam yaus muaj lub siab ntev, siab hlub, hmov tshua txog lwm tus uas nyuam yaus coj tau los cuag Koj li leej txiv thiab cov menyuam. Nyuam yaus tuav Tswv Yexus Khetos lub npe thov, Amees.
Tus uas coj peb los cuag Vajtswv yuav hais dabtsi thaum uas paub peb lub tsabthawj?
Nyeem Vajluskub hauv peb lub xyoos: Daniyees 5
Kênh Youtube BHKTHN:
