I Timôthê 5:3-16
“Bơngai lui bơ̆n mă drŏ-nglo, mă drŏ-kăn, bu mă đei bơngai adro lăm kơtum sư, sư athei ‘me kơdih ưh kơ gơh ăn kơ bơngai lui ‘me ôh. Bơngai lui ‘me pôm lu bơngai adro mă ưh kơ đei bơngai tơgŭm ‘me sư ‘noh đĕch. Thoi noh na jên iĕm mah ‘biơ̆.” (I Timôthê 5:16)
Nơ̆r jet tơchĕng pơwao:
– ‘Bok Pôl bơtho kơ Timôthê kăl kơ pơm kiơ hăm lu bơngai adro?
– Đei dôm khul adro đei pơma lăm âu?
– Lu Bơ̆n păng khul bơngai lui kăl kơ pơm kiơ hăm lu bơngai adro mă kơ ‘bah jum dăr kơ bơ̆n?
Lăm chăl Nơ̆r ‘Bok Kei-Dei năr ‘nâu, ‘bok Pôl tơgŭm kơ Timôthê băt lu bơngai adro păng tơdrong tơm kăl wă tơgŭm, yua kơ jên tơmam khul bơngai lui kăl kơ yua mă trŏ (trong 16) kư̆m thoi wă kơ bơngai mă gơh tơ gŭm ưh kơ jing bơngai wăn rơ hơi na pơm dôm tơdrong jing pơrăm (trong 3)
Đei pêng khul adro đei tơ ‘blŏk lăm âu, khul mă mônh noh lu bơngai adro mă đei kon sâu (trong 4, 8, 16), tơdrong hiơ̆k rong ‘noh mơ̆ng kơ lu kon sâu lăm hnam. Tơdrong ‘nâu “Sư athei ‘me kơ dih ưh kơ gơh ăn bơngai lui ‘me ôh” (trong 16) tơdrong thoi noh pơm tơ ‘bôh “pơm tơ wih”, “pơm tơdrong ‘lơ̆ng”, “wei lăng”, “Kră Yang ‘Bok Kei-Dei lăp đon” (trong 4, 8). Kon sâu ayơ mă ưh kơ hiơ̆k, wei lăng lu bơngai adro lăm hnam dơnŏ bơ̆n đe lăng pơm tơdrong thoi noh “Ưh kơ lui bơih” (trong 8)
Khul bơngai adro mă ‘bar noh “lu bơngai adro mă sư oei moh” (trong 11-15). Hăm lu bơngai thoi ‘nâu, dah khul bơngai lui tơgŭm, lu sư jing “oei ngôi đĕch” ‘bônh kơ pơ hlŭ “nŏng kơ chă ngôi hnam âu hnam to”, “chă pơma plĕch kơ đe”, “pơma tơdrong ưh kơ trŏ kơ pơma”, păng đe pơhlŭ “lu sư achăng lê̆ ‘Bok Krist” ‘noh tih dêh, kơ lih kơ thoi noh, wă kơ lu sư huay kơ jing bơngai “huay pă che bơle kơ bơ̆n dơ̆ng”, ưh pă “pơm kơnê̆ kơ tơdrong lui” yua kơ dôm tơdrong hưch ham, lei na nơ̆r ‘bok Pôl bơtho kơ lu sư “iŏk klo na sư tơpŭ kon wei lăng hnam dơnŏ sư kơdih” (trong 14)
Khul bơngai adro mă pêng, ‘bok Pôl pơkă kơ Timôthê kăl kơ hiơ̆k tơgŭm noh “bơngai adro mă ưh kơ đei bu ‘me sa sư” (trong 3, 5, 9-19, 16). ‘Nâu bơih lu bơngai kră sơnăm lơ bơih ưh đei bơngai ‘me sư. Yua kơ teh đak chăl sơ̆ ưh kơ đei tơdrong pơjing khul tơpôl hiơ̆k kơ tơdrong arih lăm teh đak, thoi noh lu bơngai adro kră anat dêh lăm tơdrong chă bơngai ‘me sa, thoi noh khul bơngai lui kăl kơ hiơ̆k “tơgŭm lu sư” (trong 16).
Đơ̆ng chăl pah so sơ̆, ‘me rong lu bơngai adro noh bơih đei pơma hơnơ̆ng (Jô̆ Bơngai 14:29; Hơriso 94:6; Malachi 3:5) Kră Yang Yêsu đei jô̆ Sư kơ dih hăm lu bơngai pơmat: “Na Inh bơngai mă pơm Pơtao iĕm gô khan kơ iĕm thoi âu: ‘Inh khan kơ iĕm tơpă, yua kơ iĕm băt tơgŭm mơnat kơ lu ‘nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.” (Mathiơ 25:40). Đơ̆ng noh tơdrong hiơ̆k wei lăng lu bơngai adro pơmat kơ ‘bah noh tơdrong bơngai lui hiơ̆k pŭ iŏk, rim ‘nu kơ bơ̆n kư̆m thoi khul bơngai lui Kră Yang kăl kơ hiơ̆k tơgŭm lu bơngai pơmat lăm hnam dơnŏ, ‘nhŏng ih lu bơngai adro kră, lu bơngai adro lăm khul bơngai lui wă tơgŭm lu sư mă tơpă, tơgŭm tơ uing đon lui kư̆m thoi tơdrong arih lu sư dă ‘biơ̆ kơ pơmat
Ơ Kră Yang, apinh Ih tơgŭm inh pơih jơhngơ̆m sơ lang tơpang ti inh wă tơgŭm lu bơngai đei tơdrong kăl lu bơngai kơ ‘bah kơ ‘bôch, lu bơngai adro ưh kơ đei bơngai ‘me rong mă oei jum dăr kơ inh wă tơgŭm pơlung kơ ‘nhŏng mŏ oh inh lăm tơdrong arih. Krao khan yua Anăn Kră Yang Yêsu Krist, Amen.
Đei dôm ‘măng bơih bơ̆n hiơ̆k tơgŭm kơ lu bơngai adro kơ ‘bah kơ ‘bôch mă oei jum dăr kơ bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Đaniel 2
Kênh Youtube BHKTHN:
