Tơdrong Pơđơ̆k 26:23-28
“‘Bơ̆r pơma ‘lơ̆ng, mă-lei đơ̆ng lăm jơhngơ̆m kơnê̆, Thoi ge gŏ teh đe pik hu gah ‘nguaih.” (Tơdrong Pơđơ̆k 26:23)
Nơ̆r jet tơchĕng pơwao:
– Nơ̆r pơma hơlĕnh đei pơting hăm tơdrong kiơ?
– Jơ-hngơ̆m areh, hơlĕnh tuch luch sư thoi yơ?
– Lu bơ̆n kăl kơ pơm kiơ wă kơ nơ̆r pơma tơpăt, ‘bĕnh tơdrong ‘mêm păng tơiung dih băl?
Ưh kơ trŏ dôm tơmam hơlĕch hơ hlônh khan hu maih ngăl ôh. Phŏ đei ‘lơ̆ng gah ‘nguaih ôn pơklơ̆p lê̆ tơdrong kơnê̆ gah lăm. Pơtao Salômơn bơtho gah lu bơngai yua nơ̆r pơma ‘lơ̆ng wă ôn lê̆ tơdrong kơnê̆ sư pơm pơdah tơdrong krê hơmơt kơ tơdrong chă pơpơm ngôi đĕch păng lĕch đơ̆ng tơdrong hơlĕnh.
Mă minh, nơ̆r pơma hiôk rơngơp gơh ôn pơklơ̆p jơ-hngơ̆m kơnê̆ (trong 23-25). Nơ̆r hơlĕnh pơting hăm gŏ teh đe pik hu gah ‘nguaih rang hơdah mă lei ưh kơ đei gĭt. “’Bơ̆r pơma ‘lơ̆ng, mă-lei đơ̆ng lăm jơhngơ̆m kơnê̆, Thoi ge gŏ teh đe pik hu gah ‘nguaih.” (trong 23). Kư̆m thoi noh, đei bơngai pơma rơngơp dêh mơ̆t lăm đon mă lei đơ̆ng lăm jơ-hngơ̆m kơnê̆, oei răk tơdrong kơnê̆, Kră Yang pơkă kơ lu bơ̆n ‘nĕ kơ lui kơ lu sư. “Tơdah sư pơma ‘ngam ‘nĕ kơ lui kơ sư. Yua kơ sư đei tơpơh tŏ tơdrong kơnê̆ krưp lăm jơhngơ̆m.” (trong 25). Tơplih kơ ‘noh, lu bơ̆n athei kơchăng wă kơ ‘bôh dôm tơdrong hlơp gah lăm, mă lăm bơngai nai dah lăm akâu kơdih. Nơ̆r pơma bơ̆n thei pơma mă tơpăt ‘bơ̆t anăp Kră Yang.
Mă ‘bar jơ-hngơ̆m ơh blĕk ăm sư ôn hlơp tơdrong hil chă pơm pơrŏ, Sư gô lĕch tơ tơpôl ‘bôh (trong 26). Đe gô ôn hlơp tơdrong ơh blĕk gah ‘nguaih chă pơ rŏ đĕch, mă lei lăp minh jơ ayơ noh đĕch. “’Mă sư ôn hlơp tơdrong hil chă pơm pơrŏ, Tơdrong trŏ khĕnh hơwĕng sư gô lĕch tơ tơpôl ‘bôh” (trong 26). ‘Nâu bơih nơ̆r tơblŏk tơdrong ‘lơ̆ng tơpăt ‘Bok Kei-Dei. Sư ưh kơ ăn tơdrong hơlĕnh noh oei đei hơnơ̆ng ôh. Dôm tơdrong ôn hlơp ră mă lei gô lĕch tơ tơpôl ‘bôh, dah lăm chăl hrei âu, dah mă ‘bơ̆t năr Kră Yang sek tơlang ning mônh.
Tuch luch ‘nâu, tơdrong hơlĕnh gô pơrăm bơngai nai pơrăm bơngai pơma hơlĕnh (trong 27-28), “Bu sir sơlŭng sư gô huŏng tơ lăm noh, Bu tơgrŏl tơmo, tơmo gô grŏl kơtĭt plơ̆ sư” (trong 27). Tơdrong hơlĕnh ưh kơ sĭ pơm kơ đe sơ’ngon đĕch ôh, mă lei gô ba truh tơdrong răm kơ bơngai pơm ma hơlĕnh ‘noh. Nơ̆r pơma ‘lơ̆ng pôk atŏk go ba ăn tơdrong chơt hiôk ưh kơ sot ôh ăn kơ bơ̆n mă lei tuch luch kơnh năm tơhiong răm đĕch.
Lăm teh đak âu ngăl ‘maih chă tơdrong gah ‘nguaih hloh kơ gah lăm jơ-hngơ̆m, nơ̆r Kră Yang krao pơtơm lu bơ̆n arih athei mă tơpăt tơpă. Ưh kơ sĭ hăm bơngai nai đĕch mă lei hăm jơ-hngơ̆m bơ̆n kơdih. Athei ling lang pơma mă tơpăt mă khan mơlâu ‘bơ̆t anăp Kră Yang mă lei Sư lăp đon. Kră Yang gô tuh pŭn hiôk kơ bơngai bu arih kiơ̆ tơdrong tơpăt.
Ơ Kră Yang, Apinh Ih lăng lăm jơ-hngơ̆m inh, apinh Ih hŭt lê̆ đĭ dôm tơdrong chă pơpơm păng tơdrong hơlĕnh lăm inh. Apinh Ih pơchrang ăn wă kơ inh băt tơdrong hơlĕnh lăm inh, păng wei inh wă kơ huay tơ’bơ̆p tơdrong pơhlŭ lăm nơ̆r pơma rơngơp ‘lơ̆ng mă lei đơ̆ng lăm jơ-hngơ̆m kơnê̆. Apinh đơ̆ng nơ̆r pơma păng chăl arih băt tơ’bôh tơdrong hơdah păng tơdrong tơpăt Kră Yang.Yua anăn Kră Yang Yêsu Krist, Amen.
Lu bơ̆n đei nơ̆r pơma tơpăt, ‘bĕnh tơdrong ‘mêm, păng tơiung dih băl lăm dôm tơdrong ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 1
Kênh Youtube BHKTHN:
