Markôs 12:28-31
“Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng. Na tơdrong juăt mă ‘bar thoi âu: ‘Bơ̆n athei ‘mêm kơ bôl buăl thoi bơ̆n ‘mêm akâu kơdih. Ưh kơ đei tơdrong juăt ayơ mă kăl hloh kơ ‘bar tơdrong juăt âu.” (Markôs 12:30-31)
Nơ̆r jet tơchĕng pơwao:
– Thây bơtho tơdrong juăt apĭnh Kră Yang Yêsu tơdrong kiơ?
– Kră Yang Yêsu tơl tơwih wă tơ’bôh tơdrong ‘mêm kăl hloh thoi yơ?
– Tơdrong gĭt kăl thoi yơ lăm tơdrong arih Khul Bơngai Lui?
Đơ̆ng rŏng kơ mơ̆ng Kră Yang Yêsu păng bơngai Sađusê pơjah lăm sơ̆p hla bơar Nơ̆r ‘Bok Kei-Dei (Markôs 12: 18-27). Đei minh ‘nu thây bơtho tơdrong juăt apĭnh Kră Yang gah tơdrong juăt ayơ kăl hloh wă pơlong lăng Sư (trong 28). Kră Yang Yêsu pơma pơtôm đĭ lăm tơdrong juăt păng tơdrong bơngai pơtruh nơ̆r Kră Yang ‘bar nơ̆r Kră Yang tơtă ưh kơ gơh tơklah băl: athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m păng ‘Bơ̆n athei ‘mêm kơ bôl buăl thoi bơ̆n ‘mêm akâu kơdih (30-31). Nơ̆r Kră Yang tơl tơwih wă tơ’bôh tơdrong ‘lơ̆ng tơpăt ưh kơ sĭ minh tơdrong bơwei tơdrong juăt kiơ̆ kơ tơdrong lui dah chu kiơ̆ tơdrong juăt pơm gah ‘nguaih đĕch, mă-lei kăl kơ đei lăm tơdrong arih ‘mêm mơnat.
Kră Yang Yêsu athei lu bơ̆n ‘mêm kơ ‘Bok Kei-Dei llăm tơdrong ; ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng (trong 30) yua kơ Sư bơih (Kră Yang minh đĕch” (trong 29). Kơplah tơdrong ‘mêm lu bơ̆n ‘mêm kơ Kră Yang tơpă, gô đei jing thoi tơdrong rơih iŏk, gĭt kăl păng tơdrong tơ’bưh lu bơ̆n, ‘mêm kơ Kră Yang adrol hloh noh bơih bơwei tơdrong arih bơ̆n kơdih kơnhăm lăm Kră Yang păng arih kiơ̆ thoi Sư wă.
Kră Yang ưh kơ dơ̆ng ‘bơ̆t anih minh “‘mêm kơ Kră Yang” đĭ jơhngơ̆m, tơdrong ‘mêm kơ Kră Yang tơ’bôh rơđah lăm tơdrong ‘mêm kơ kon bơngai. Yua kơ thoi noh bơih, oei kăl “ ‘mêm kơ bôl buăl thoi bơ̆n ‘mêm akâu kơdih.” (trong 31). Tơdrong âu wă khan tơ’bôh hiơ̆k tơtăm, pơyom păng đơ̆ng lăm jơhngơ̆m ‘mêm kơ bơngai nai thoi lu bơ̆n hơpơi wă kơ bơ̆n kơdih. Tơdrong ‘mêm âu ưh kơ sĭ ‘măn kơ hnam dơnŏ đĕch, bôl buăl păng lu bơngai lăm hnam dơnŏ, mă-lei kăl kơ đĭ hăm bơngai tam mă tơ’bơ̆p, lu bơngai đe hiơt tŭk, phŏ kơnh bơgai mă anat kơ wă ‘mêm, tơpă. Tơdrong ‘mêm lu bơ̆n ‘măn kơ bơngai nai jing pơsĭt ăn tơdrong mă lu bơ̆n ‘mêm kơ Bok Kei-Dei (I Yôhan 4:20).
Kră Yang Yêsu khan tơpăt: “Ưh kơ đei tơdrong juăt ayơ mă kăl hloh kơ ‘bar tơdrong juăt âu.” (trong 31). ‘bar tơdrong âu bơih kăl hloh lăm tơdrong ‘mêm mă khul Bơngai Lui kăl kơ đei. Kơplah ‘mêm kơ ‘Bok Kei-Dei păng ‘mêm kơ bơngai nai thoi nơ̆r Kră Yang Yêsu bơtho, lu bơ̆n bơih jơ̆ng ‘bang Kră Yang păng kon kơ tơdrong hơdah (I Yôhan 2:9). ‘mêm kơ Kră Yang ‘Bok Kei-Dei pơdrŭt lu bơ̆n druh kiơ̆ tơdrong ‘lơ̆ng tơpăt, ‘mêm mơnat kơ đe wă tơ’bôh đei yua đơ̆ng tơdrong ‘lơ̆ng tơpăt lĕch đơ̆ng pơm kiơ̆. Kră Yang Yêsu bơih tơ’bôh tôm ‘bar tơdrong juăt kăl hloh âu, Sư ‘mêm kơ Yang ‘Bă tôm tơdrong, arih chu yom jing mah chu lôch. Păng Sư ‘mêm kơ đĭ đăng kon bơngai mă khan Sư chu lôch ăn akâu Sư kơdih yua kơ lu bơ̆n bơngai yoch, athei arih “‘mêm kơ Kră Yang, ‘mêm kơ bôl buăl” wă kơ đe nai ‘bôh lu bơ̆n bơih jing kon ‘Bok Kei-Dei tơpă.
Kơkuh kơ Ih ơ Kră Yang, apĭnh tơ’blŏk kơ inh ling lang ‘blŏk ‘bar tơdrong kăl hloh lăm tơdrong ‘mêm noh ‘mêm kơ Kră Yang păng ‘mêm mơnat kơ đe, apĭnh tơgŭm inh đei tơdrong arih tơ’bôh pơdah tơdrong đĭ jơhngơ̆m ‘mêm kơ Kră Yang păng ‘mêm mơnat kơ đe kiơ̆ thoi Kră Yang bơtho. krao khan yua anăn Kră Yang Yêsu Krist. Amen.
Tơdrong arih lu bơ̆n hăm tơ’bôh ‘bar tơdrong juăt kăl hloh ‘nâu ưh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsêkiên 46
Kênh Youtube BHKTHN:
