Klei Aê Diê Blŭ: Y-Markôs 12:28-31
Êlan kliăng: “Brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’ Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh” (Y-Markôs 12:30-31).
Klei êmuh ksiêm mĭn: Ya klei khua čih hră êmuh kơ Khua Yang Yêsu? Klei Khua Yang Yêsu lŏ wĭt lač brei ƀuh ya jing atur kơ klei khăp? Si klei anei jing yuôm kơ klei hdĭp phung đăo kơ Krist?
Leh hmư̆ Khua Yang Yêsu leh anăn phung Sadusi bi mgăl kơ Klei Aê Diê Blŭ (Y-Markôs 12:18-27), mâo sa čô khua čih hră hriê êmuh Khua Yang Yêsu ya klei bhiăn jing tal êlâo hĭn kơ jih jang čiăng lông dlăng Gơ̆ (êlan 28). Khua Yang Yêsu klah čŭn jih jang klei bhiăn leh anăn klei hưn êlâo jing dua mta klei bhiăn amâo dưi bi ktlah ôh: Khăp kơ Aê Diê hŏng jih ai tiê leh anăn khăp kơ pô mkăn msĕ si kơ pô (êlan 30-31). Klei Khua Yang Yêsu lŏ wĭt lač brei ƀuh klei kpă ênô amâo jing knŏng klei djă pioh klei bhiăn klei đăo amâodah gưt kơ klei bhiăn knŏng rup ti êngao ôh, ƀiădah jing klei hdĭp mjing leh mơ̆ng klei khăp.
Khua Yang Yêsu mtă brei drei khăp kơ Aê Diê hŏng jih mnuih drei: hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang (êlan 30) kyuadah Ñu jing “Khua Yang mâo knŏng sa čô” (êlan 29). Tơdah klei drei khăp kơ Aê Diê jing klei khăp sĭt, sĭt nik srăng bi hmăi kơ jih jang klei drei ruah, kơ ênoh leh anăn kơ jih jang klei drei bi mguôp. Khăp kơ Aê Diê êlâo hĭn jing brei klei hdĭp drei khăp mĭn nanao kơ knuih Aê Diê leh anăn hdĭp tui si knuih anăn.
Khua Yang Yêsu amâo mjưh tăp anôk knŏng “khăp Khua Yang Aê Diê” hŏng jh ai tiê ôh. Klei drei khăp kơ Khua Yang bi êdah klă hlăm klei drei khăp kơ mnuih, kyuanăn, brei drei “khăp kơ pô riêng gah” msĕ si kơ drei pô mơh (êlan 31). Klei anei čiăng lač brei drei bi êdah klei uêñ mĭn, klei mpŭ leh anăn klei pap kơ pô mkăn msĕ si drei čiăng arăng ngă kơ drei pô mơh. Klei khăp anei amâo djŏ khăp knŏng kơ gŏ sang, kơ phung mah jiăng leh anăn kơ phung găp djuê ôh, ƀiădah khăp wăt kơ mnuih êgar, mnuih arăng wơr bĭt, leh anăn khăp wăt kơ phung amâo năng khăp msĕ mơh. Boh sĭt gơ̆, klei drei khăp kơ mnuih mkăn srăng jing mnơ̆ng hưn bi sĭt kơ klei drei khăp kơ Aê Diê (I Yôhan 4:20).
Khua Yang Yêsu lač, “Amâo lŏ mâo klei bhiăn prŏng hĭn kơ dua mta anăn ôh” (êlan 31). Dua mta klei bhiăn anei yơh jing atur kơ klei khăp brei phung đăo kơ Yêsu Krist bi mâo hĕ. Tơdah drei khăp kơ Aê Diê leh anăn khăp kơ pô riêng gah msĕ si Khua Yang Yêsu lač leh, sĭt nik drei jing phung ƀĭng kna Ñu leh anăn jing phung anak klei mngač (I Y-Yôhan 2:9). Khăp kơ Aê Diê mtrŭt drei tui duah klei kpă ênô, khăp kơ mnuih brei ƀuh boh klei kpă ênô anăn hŏng bruă ngă. Khua Yang Yêsu pô ngă leh kluôm ênŭm dua mta klei bhiăn yuôm bhăn anei. Ñu khăp kơ Aê Diê Ama kluôm ênŭm, hdĭp hlăm klei gưt asăp tơl djiê. Leh anăn Ñu khăp hơăi mang kơ mnuih, êjai drei ăt jing mnuih soh, Ñu tŭ klei djiê kyua drei. Hdĭp bĕ hŏng klei “khăp kơ Aê Diê leh anăn khăp kơ mnuih” čiăng kơ mnuih mkăn thâo kơ drei jing phung anak Aê Diê.
Klei hdĭp drei bi êdah leh mơ̆ dua mta klei bhiăn yuôm bhăn anei?
Wah lač: Ơ Khua Yang, bi hdơr bĕ kơ kâo hdơr nanao kơ dua mta klei jing atur kơ klei khăp anăn jing: khăp kơ Ih leh anăn khăp kơ mnuih. Đru klei hdĭp kâo thâo bi êdah klei khăp kơ Ih hŏng jih ai tiê leh anăn săn asei kơ mnuih msĕ si klei Ih mtă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 46
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
