Malakaus 12:28-31
Nqe cim:
“Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog. Nqe ob uas tseemceeb hais li no hais tias, hlub koj tej kwvtij zejzog ib yam li koj hlub koj lub cev. Tsis muaj dua lwm nqe uas tseemceeb tshaj ob nqe no lawm” (Malakaus 12:30-31)
Lus nug xav:
– Cov xibhwb uas qhia Vajtswv txoj kevcai nug Tswv Yexus yam dabtsi?
– Tus Tswv los lus teb qhia paub qhov tseemceeb ntawm txojkev hlub li cas?
– Qhov no tseemceeb li cas rau peb cov ntseeg kev ua neej?
Tom qab uas mloog Tswv Yexus thiab cov Xadukais sib tham txog Vajtswv Txojlus (Malakaus 12:18-27), cov xibhwb uas qhia Vajtswv txoj kevcai tuaj nug Tswv Yexus txog nqe kevcai twg yog nqe uas tseemceeb dua sim Nws (nqe 28). Tswv Yexus thiaj sau zog tagnrho txoj kevcai thiab tej uas cov cevlus qhia ua ob nqe kevcai cais tsis tau: Hlub tus Tswv tas siab tiab hlub neeg ib yam li hlub yus tus kheej (nqe 30-31). Nqe lus tus Tswv teb rau cov xibhwb uas qhia Vajtswv txoj kevcai qhia paub txojkev ncaj ncees tsis yog qhov uas coj kevcai ntseeg sab nraud xwb, tiamsis yog lub neej qhia tshwm txojkev hlub.
Tswv Yexus nqua hu peb hlub Vajtswv tagnrho peb tus kheej: kawg siab kawg ntsws, kawg plab kawg plawv thiab kawg dag kawg zog (nqe 30) vim Nws yog “tus Tswv” (nqe 29). Thaum peb hlub tus Tswv lawm, peb yuav xaiv ua tej uas muaj nqis thiab muaj kev sib raug zoo. Hlub tus Tswv ua ntej yog tswj yus kev ua neej mus raws nraim li Nws tus yamntxwv thiab ua li Nws ua.
Tswv Yexus tsis nres ntawm qhov “hlub tus Tswv” tas siab. Txojkev hlub tus Tswv qhia tawm los ntawm qhov hlub tibneeg. Yog li, yuav tsum “hlub koj tej kwvtij zejzog ib yam li koj hlub koj lub cev” (nqe 31). Qhov no muaj lub ntsiab hais tias qhia tawm kev hmov tshua, saib taus thiab txhawj txog lwm tus zoo ib yam yus tus kheej. Txojkev hlub no tsis yog ua rau tsevneeg, phoojywg thiab tej txheebze, tiamsis ua rau cov neeg uas peb tsis tau paub dua, cov neeg uas tsis muaj leejtwg hlub, thiab cov neeg uas peb hlub tsis tau. Peb txojkev hlub lwm tus yog qhov timkhawv ntawm txojkev hlub uas peb hlub Vajtswv (I Yauhas 4:20).
Tswv Yexus hais khov kho: “Tsis muaj dua lwm nqe uas tseemceeb tshaj ob nqe no lawm” (nqe 31). Ob nqe kevcai no yog qhov tseemceeb ntawm txojkev hlub uas cov ntseeg Yexus cheemtsum muaj. Thaum peb hlub Vajtswv thiab hlub neeg zoo ib yam li Tswv Yexus cov lus qhia, peb thiaj yog Nws cov thwjtim thiab yog cov neeg uas nyob hauv qhov pom kev (I Yauhas 2:9). Hlub Vajtswv txhawb kom peb caum txojkev ncaj ncees; hlub neeg yog nqi zog ntawm txojkev ncaj ncees uas peb ua. Tswv Yexus yog tus uas ua tiav ob nqe kevcai tseemceeb no. Nws hlub Vajtswv txaus nkaus, ua neej mloog lus mus txog thaum tuag. Thiab Nws hlub neeg ntiajteb tsis yuav nqi, kam muab Nws txojsia los tuag theej cov neeg txhaum. Cia li ua neeg “hlub Vajtswv, hlub neeg” kom lwm tus paub hais tias peb yog Vajtswv cov menyuam.
Thov Vajtswv,
Vajtswv, thov qhia nyuam yaus nco ntsoov ob nqe kevcai tseemceeb ntawm txojkev hlub uas yog hlub Vajtswv thiab hlub neeg. Thov pab kom nyuam yaus ua neej qhia tshwm txojkev hlub Koj thiab hlub lwm tus raws Koj Txojlus qhia. Nyuam yaus tuav Tswv Yexus lub npe thov, Amees.
Peb kev ua neej puas qhia tshwm ob nqe kevcai no lawm tau?
Nyeem Vajluskub hauv peb lub xyoo: Exekees 46
Kênh Youtube BHKTHN:
