Klei Aê Diê Blŭ: Y-Mathiơ 5:6-8
Êlan kliăng: “Jăk mơak yơh phung êpa leh anăn mhao kơ klei kpă ênô, kyuadah Aê Diê srăng bi hrăp diñu. Jăk mơak yơh phung thâo pap, kyuadah Aê Diê srăng pap kơ diñu” (Y-Mathiơ 5:6-7).
Klei êmuh ksiêm mĭn: Ya klei Khua Yang Yêsu mtô kơ phung êpa hmao kơ klei kpă ênô leh anăn thâo pap? Ya dŏ phung mâo ai tiê doh srăng mâo? Si drei dôk hdĭp hŏng klei kpă ênô, klei doh jăk leh anăn klei khăp?
Tlâo klei jăk mơak tal êlâo hlăm Klei Mtô Ti Dlông Čư̆ jing tlâo knuih mdê phung ƀuôn sang Ƀuôn Ala Mtao Adiê. Tal sa, êpa mhao kơ klei kpă ênô. “Jăk mơak yơh phung êpa leh anăn mhao kơ klei kpă ênô, kyuadah Aê Diê srăng bi hrăp diñu” (êlan 6). Khua Yang Yêsu lač klei kpă ênô jing klei brei phung ƀuôn sang Aê Diê êpa mhao msĕ si mnơ̆ng ƀơ̆ng huă grăp hruê. Kpă ênô amâo djŏ knŏng gưt kơ klei bhiăn ôh, ƀiădah jing klei hdĭp hlăm klei bi mguôp djŏ hŏng Aê Diê leh anăn hŏng jih jang mnuih. Klei êpa mhao anei kbiă mơ̆ng klei khăp kơ Khua Yang, čiăng bi êdah klei doh jăk Ñu, leh anăn čiăng ƀuh klei kpă ênô Ñu kiă kriê ti lăn ala anei. Tinei, mâo sa klei ƀuăn yuôm bhăn snăk, hlei pô êpa mhao kơ klei kpă ênô amâo srăng luč klei čang hmăng ôh. Aê Diê pô srăng bi hrăp klei êpa mhao anăn hŏng Krist, Ñu jing klei kpă ênô drei, leh anăn hŏng Yang Mngăt Jăk Pô bi ktang drei čiăng kơ drei hdĭp doh jăk. Kyuanăn, tơdah drei êpa mhao kơ klei kpă ênô, Aê Diê srăng bi trei mngăt drei leh anăn brei kơ drei klei hdĭp jăk mơak.
Tal dua, bi êdah klei pap, “Jăk mơak yơh phung thâo pap, kyuadah Aê Diê srăng pap kơ diñu” (êlan 7). Thâo pap jing mâo ai tiê jăk, pap leh anăn pap brei kơ pô amâo năng pap ôh. Klei kpă ênô Aê Diê bi êdah hlăm klei Ñu khăp leh anăn pap kơ lăn ala. Tơdah bi êdah klei pap, drei lŏ mtrang wĭt klei pap Pô pap brei leh kơ drei kluôm ênŭm hlăm Krist. Leh anăn mâo klei ƀuăn mbĭt, hlei pô thâo pap, srăng mă tŭ klei pap Aê Diê brei êbeh dlai hlăm klei jăk mơak.
Tal tlâo, mâo ai tiê doh, “Jăk mơak yơh phung mâo ai tiê doh, kyuadah diñu srăng ƀuh Aê Diê” (êlan 8). Ai tiê doh jing klei myơr pô kluôm ênŭm kơ Khua Yang: Khăp kơ Ñu hĭn kơ jih jang mnơ̆ng leh anăn lui hĕ klei pô čiăng leh anăn klei soh. “Ƀuh Aê Diê” anei jing klei jăk mơak prŏng hĭn: Dôk giăm hŏng Aê Diê ară anei mtam leh anăn dưi ƀuh ƀô̆ mta Ñu klă ênŭm hlăm klei hdĭp ênuk hlŏng lar. Drei amâo dưi yua ai ktang drei pô ôh čiăng mâo ai tiê doh jăk, ƀiădah anei jing bruă Yang Mngăt Jăk pô tơdah drei êpa mhao leh anăn gưt kluôm ênŭm kơ klei myang klei Ñu bi doh.
Tlâo klei jăk mơak anei bi êdah kơ klei bi knar plah wah klei kpă ênô leh anăn klei khăp Aê Diê. Êpa mhao kơ klei kpă ênô atăt drei kơ klei doh jăk. Bi êdah klei pap rơ̆ng kjăp kơ klei kpă ênô drei mâo klei kơup guôm hŏng klei pap. Gĭr djă pioh klei doh hlăm ai tiê răng mgang klei drei khăp kơ Khua Yang mơ̆ng klei bi ktlah hŏng Ñu. Anei jing klei hdĭp Khua Yang Yêsu pia jing klei “jăk mơak”, jing klei hdĭp bi êdah knuih Aê Diê leh anăn klei hdĭp mâo Aê Diê dôk mbĭt êbeh dlai msĕ mơh.
Si ngă drei bi knal leh klei jăk mơak anei?
Wah lač: Ơ Khua Yang, đru kâo dưi bi knal sĭt klei jăk mơak tơdah kâo hdĭp bi êdah klei kpă ênô leh anăn klei khăp Ih leh anăn djă pioh ai tiê doh nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 45
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
