Mathiơ 5:6-8
“Pŭn dêh lu bơngai ‘maih pơm ‘lơ̆ng thoi ‘Bok Kei-Dei wă, ‘Bok Kei-Dei gô ăn kơ sư jing ‘lơ̆ng thoi noh. Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n. (Mathiơ 5:6-7)
Nơ̆r jet tơchĕng pơwao:
– Kră Yang Yêsu bơtho tơdrong kiơ gah bơngai ‘mah pơm ‘lơ̆ng păng mơnat kơ đe?
– Bơngai arih ‘lơ̆ng tơpăt gô đei tơdrong kiơ?
– Lu bơ̆n oei arih lăm tơdrong ‘lơ̆ng tơpăt, ‘lơ̆ng rơgoh păng ‘mêm mơnat thoi yơ?
Pêng tơdrong pŭn blŭng a lăm ‘Bai Bơtho Kơpal Kông noh bơih pêng tơdrong kăl kơ đei lăm khul bơngai gah dêh char Kră Yang. Mă mônh, rơhing ‘maih pơm ‘lơ̆ng tơpăt “Pŭn dêh lu bơngai ‘maih pơm ‘lơ̆ng thoi ‘Bok Kei-Dei wă, ‘Bok Kei-Dei gô ăn kơ sư jing ‘lơ̆ng thoi noh!” (trong 6). Kră Yang Yêsu bơtho tơdrong ‘lơ̆ng tơpăt kon pơlei Kră Yang kăl kơ rơhing ‘maih nhen thoi tơmam sa rim năr, tơdrong ‘lơ̆ng tơpăt ưh kơ sĭ bơwei tơdrong juăt mă-lei arih lăm tơdrong tơ’bưh trŏ hăm Kră Yang păng bơngai nai, tơdrong rơhing ‘nâu lĕch đơ̆ng jơhngơ̆m ‘mêm kơ Kră Yang, hơpơi wă kơ đei tơdrong ‘lơ̆ng tơpăt đơ̆ng Kră Yang. Păng rơhing ‘maih wă kơ ‘bôh tơdrong sĭt tơpă Kră Yang pơgơ̆r lăm teh đak. ‘Bơ̆t anih ‘nâu. Đei nơ̆r pơkă ‘lơ̆ng tơpă, bu rơhing ‘maih pơm ‘lơ̆ng tơpăt gô huay kơ hiong tơdrong hơmĕng. Đơ̆ng Kră Yang ‘Bok Kei-Dei ăn tơdrong rơhing noh lĕch yua đơ̆ng Kră Yang Yêsu Krist Sư bơih tơdrong ‘lơ̆ng tơpăt ăn kơ lu bơ̆n păng lĕch đơ̆ng Yang Bơhngol ‘Lơ̆ng, Tơ’ngla ăn kơ lu bơ̆n tơdrong kĕ pran arih ‘lơ̆ng rơgoh. thoi noh, kơplah rơhing ‘maih pơm ‘lơ̆ng na đei Kră Yang ăn kơ lu bơ̆n tôm mah gah bơhngol păng arih đei pŭn hiôk.
Mă ‘bar, tơ’bôh jơhngơ̆m ‘mêm mơnat. “Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n.” (trong 7). ‘mêm mơnat bơih đei jơhngơ̆m băt mơn mơnat, huay kơ jô̆ yo păng kĕ chơ̆n hăm lu bơngai mă ưh kơ trŏ. Tơdrong ‘lơ̆ng tơpăt Kră Yang tơ’bôh lăm tơdrong ‘mêm păng tơdrong mơnat mă Sư ăn kơ kon bơngai. Kơplah tơ’bôh tơdrong ‘mêm mơnat, lu bơ̆n pơdah jơhngơ̆m ‘mêm mơnat đơ̆ng Tơ’ngla mă mơnat ăn bơih tôm tơdrong kơ lu bơ̆n lăm ‘Bok Krist. Păng đei nơ̆r pơkă wang hơdai, bu đei jơhngơ̆m mơnat gô đei mơn tôm mah tơdrong ‘mêm Kră Yang lăm pŭn hiôk.
Mă pêng, đei jơhngơ̆m ‘lơ̆ng rơgoh. “Pŭn dêh lu bơngai jơhngơ̆m ‘lơ̆ng rơgoh, lu sư gô ‘bôh ‘Bok Kei-Dei.” (trong 8). Jơhngơ̆m ‘lơ̆ng rơgoh noh bơih minh tơdrong pơyơ̆r hăm đĭ jơhngơ̆m kơ Kră Yang: ‘mêm kơ Sư hloh kơ tôm tơdrong păng tŭk đĭ tôm hưch ham kret tơsen dah tơdrong yoch.
“‘bôh ‘Bok Kei-Dei” tơm kơ tơdrong pŭn hiôk tih hloh, jê̆ hăm Kră Yang đơ̆ng dang ei păng hơmĕng gơh lăng bôh Sư tôm tơdrong lăm chăl arih ling lang. Lu bơ̆n ưh kơ gơh adrin kơdih wă kơ jing jơhngơ̆m ‘lơ̆ng rơgoh, mă noh bơih tơdrong jang Yang Bơhngol ‘Lơ̆ng kơplah lu bơ̆n rơhing păng chu yom mơ̆ng kơ tơdrong mơsêh Sư chhut rơgoh.
Pêng tơdrong pŭn hiôk âu tơ’bôh tơdrong trŏ ‘lơ̆ng tơpăt păng ‘mêm mơnat ‘Bok Kei-Dei. Rơhing kơ tơdrong ‘lơ̆ng tơpăt tơgŭm lu bơ̆n lăng gah tơdrong ‘lơ̆ng rơgoh. Tơ’bôh jơhngơ̆m mơnat pơsĭt tơdrong ‘lơ̆ng tơpăt lu bơ̆n đei krôp gom đơ̆ng jơhngơ̆m băt mơnat. Adrin wei tơdrong ‘lơ̆ng rơgoh lăm jơhngơ̆m bơwei tơdrong ‘mêm lu bơ̆n ‘măn kơ Kră Yang wă huei kơ tơklah. Âu bơih chăl arih mă Kră Yang Yêsu krao noh bơih “ pŭn” minh chăl arih pơdah lăm ‘Bok Kei-Dei păng ‘bĕnh blai lăm tơdrong Sư oei hơdai.
Kơkuh kơ Ih ơ Kră Yang, apĭnh tơgŭm inh mơn tơpă pŭn hiôk kơplah arih pơdah tơdrong ‘lơ̆ng tơpăt ‘mêm mơnat lăm Ih păng ling lang bơwei jơhngơ̆m ‘lơ̆ng rơgoh krao khan yua anăn Kră Yang Yêsu Krist. Amen.
Lu bơ̆n mơn kơ tơdrong pŭn hiôk âu thoi yơ?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsêkiên 45
Kênh Youtube BHKTHN:
