II Kevcai 15:7-11
Nqe cim:
“Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:7)
Lus nug xav:
– Leejtwg yog tus uas peb cheemtsum hlub tshua?
– Qhov twg yog qhov kev cheemtsum loj uas cov neeg nyob ibncig peb cheemtsum tau pab?
– Peb tabtom qhia tshwm lub siab hlub tshua lwm tus zoo li cas?
Hauv qhov koob hmoov tim 5 uas Tswv Yexus hais yog hais txog “cov uas muaj lub siab hlub lwm tus”, tsis hais txog cov neeg uas tau hlub. Yog li ntawd, tus Tswv xav kom peb qhia rau cov neeg uas tau hu los ua Vajtswv haivneeg lawm yuav tsum hlub cov neeg uas muaj kev cheemtsum. Qhov no muaj nyob hauv Tswv Yexus cov lus qhia los ntawm tus neeg Xamalis siab zoo. Tus neeg uas cheemtsum tau hlub yog tus neeg uas muaj kev xav tau pab txawm tias tus ntawd yog leejtwg. Tus Tswv txoj kevcai qhia: “Thaum nej mus nyob hauv lub tebchaws uas tus Tswv uas yog nej tus Vajtswv muab rau nej, yog nej cov kwvtij Yixalayees uas nyob hauv nej tej nroog ib tug twg txomnyem, nej tsis txhob ua neeg qia dub thiab tsis kam pab tus ntawd. Tiamsis, nej yuav tsum ua neeg siab dawb siab zoo thiab qiv nyiaj rau nws kom txaus li nws xav yuav… Nej yuav tsum zoo siab hlo muab rau nws ntawm lus siab dawb paug… (II Kevcai 15:7-11).
Timthawj Yauhas thiab Yakaunpaus puavleej hais txog txojkev hlub thiab kev ntseeg ntawm tus neeg uas ntseeg Vajtswv yuav tsum qhia tawm los ntawm qhov uas tus neeg ntawd paub hlub thiab pab tej neeg uas txomnyem (I Yauhas 3:17; Yakaunpaus 2:15-16). Cia li thov Vajtswv siv peb lub zog, nyiaj txiag, sijhawm, thiab cia kom Pawg Ntseeg nthuav tes dav mus pab tau cov neeg uas muaj kev cheemtsum pab, thiab cia li qhia tshwm Vajtswv txojkev hlub rau lwm tus paub.
Tiamsis, tsis txhob hnov qab tias tibneeg tseem muaj qhov kev cheemtsum sab ntsujplig thiab, yog li ntawd, peb ua tus neeg uas hlub tshua, peb yuav tsum hmov tshua txog lawv sab ntsujplig thiab. Yog li, tus neeg uas muaj lub siab hlub lwm tus yuav tsum yog tus neeg uas rau siab qhia Txojmoo Zoo, nquag thov Vajtswv pab rau lub tebchaws, Pawg Ntseeg thiab peb tsevneeg sab ntsujplig… Ntau leej yoojyim hlub thaum pom tej kev tsov kev rog, cov menyuam raug tso tseg… tiamsis muaj pestsawg tus ntseeg mob siab thaum pom txhua hnub yus cov phoojywg, txheebze… tas simneej zuj zus es lawv tsis hnov Txojmoo Zoo?
Tswv Yexus qhia tias tus neeg muaj lub siab hlub lwm tus yog tus uas tau koob hmoov (Mathais 5:7). Vajntxwv Xalumoos kuj hais tias: “…tus uas hlub cov pluag kuj tau hmoov zoo” (Pajlug 14:21 – HMOWSV). Yog li, tus neeg uas nqis tes hlub lwm tus nws lub neej sab ntsujplig ua tej haujlwm zoo, thiab txaus siab vim paub tias nws ua haum Vajtswv siab.
Tus neeg uas muaj lub siab hlub lwm tus, txawm yog tsis tau txais lwm tus txojkev hlub los nws yeej yuav tau txais Vajtswv txojkev hlub xwb. Peb twb tau txais Vajtswv txojkev hlub dhau los ntawm txojkev cawm dim, peb yeej yuav tau Vajtswv hlub ntxiv, saib xyuas, tswj tuav txhua hnub, txhua lub hli xyoo nyob hauv ntiajteb no (Phau Ntawv Nkauj 18:25).
Thov Vajtswv,
Vajtswv, thov pub Koj lub siab rau nyuam yaus, kom nyuam yaus muaj lub siab zoo li tus neeg Xamalis siab zoo qhia tshwm Koj txojkev hlub rau lub ntiajteb no. Nyuam yaus tuav Tswv Yexus lub npe thov, Amees.
Peb puas txaus siab qhia tshwm lub siab hlub lwm tus raws li tus neeg Xamalis siab zoo tus qauv?
Nyeem Vajluskub hauv peb lub xyoo: Exekees 43
Kênh Youtube BHKTHN:
