Markôs 16:1-8
“Lăp ‘năr lĕch til pơgê hrôih, năr mă mônh, lu sư năm tơ bơsat. Lu sư pơma tơduă lu sư: Bu wă pơih kơ bơ̆n ‘măng tơmo đơ̆ng klơ̆p bơsat?” (Markôs 16:2-3)
Nơ̆r jet tơchĕng pơwao:
– Lu bơngai drŏkăn tơchĕng kiơ kơplah lu sư răt pơgang ‘bâu phu wă năm pik tơ akâu Kră Yang păng tơchĕng ưh kơ băt bu wă pơih ‘măng tơmo đơ̆ng klơ̆p bơsat?
– Dôm tơdrong kiơ thoi kơ tơmo tih kơtĭt lơ bơngai adrol sơ̆ kư̆m thoi bơ̆n dang ei mơ̆n?
– Pơm thoi yơ wă kơ pơih lê̆ tơdrong kiơ thoi kơ tơmo tih noh wă kơ arih hiôk hăm Kră Yang iung arih?
Đơ̆ng rŏng kơ Kră Yang lôch, ‘bok Yêsep đơ̆ng pơlei Armơthê apinh iŏk atâu Kră Yang păng năm ‘bu hơmet lăm bơsat păng “tơgrŏl minh pôm tơnglơ̆p tơmo tih klơ̆p ‘măng bơsat” (Markôs 15:46). Lăp ‘năr lĕch tih pơgê hrôih, năr mă mônh lăm giĕng, lu bơngai drŏkăn oei tơchĕng lăm jơhngơ̆m khan Kră Yang lôch bơih na lu sư răt pơgang ‘bâu phu wă pik tơ akâu Kră Yang kiơ̆ kơ tơdrong juăt, păng lu sư tơchĕng ưh kơ băt bu wă tơgrŏl lê̆ tơnglơ̆p tơmo tih păng trăp ăn kơ lu sư gơh mơ̆t lăm bơsat. Mălei lăp truh tơ bơsat, lu sư “hue lăng tơ ‘măng bơsat lu sư ‘bôh ‘măng tơmo tơ pơih bơih” (trong 4). Lu sư mơ̆t lăng lăm bơsat ‘bôh minh ‘nu bơngai tơ dăm hrŭk ao tai kok khan kơ lu sư: “Sư iung arih đơ̆ng lôch bơih, sư ưh pă oei tơ âu” (trong 6).
Tơmo tih klơ̆p ‘măng bơsat Kră Yang tơ pơih bơih, mălei lu đe bu mă oei arih lăm jơhngơ̆m đon tơchĕng khan Kră Yang lôch bơih lei tơmo tih oei kơtĭt tơdrong arih bơngai noh đĕch. Dôm tơdrong tơ’bôh âu: Tơmo tih klơ̆p ‘măng bơsat kơtĭt lu drŏkăn năm til pơgê hrôih năr mă mônh lăm giĕng Kră Yang iung arih. Tơmo tơdrong hưch ham păng tơdrong ưh kơ hơmĕng pơm kơ ‘bok Juđa năm hrek hơlŏng pơlôch akâu kơdih. Tơmo tơdrong hli tơrơ pơm kơ lu bơngai pơhrăm păng Kră Yang kơdâu ôn kơplah ‘bôh Kră Yang đe pơ̆ng pơlôch tơ ‘long pơglang. Tơmo tơdrong ngĭl ngŭl kơtĭt ‘bok Thộm pơm kơ sư ưh kơ lui kơ Kră Yang iung arih.v.v… păng lu bơ̆n dang ei kư̆m ưh kơ weh ôh đơ̆ng dôm tơdrong kiơ thoi kơ tơmo tih oei kơtĭt tơdrong arih lu bơ̆n. Hăm đei tơmo tơdrong hưch ham ayơ ưh? Hăm đei tơmo tơdrong tơklai băl ưh? Hăm đei tơmo tơdrong pơm khul jing tơklah băl ưh? Hăm đei tơmo tơdrong ‘maih pơm kư̆kă gah sĕch akar ưh? Hăm đei tơmo tơdrong pơang ưh? Hăm đei tơmo tơdrong alah kơ pơhrăm nơ̆r Kră Yang ưh? Đei lơ tơdrong thoi kơ tơmo tih oei huơ̆r tơdrong arih bơngai lui kiơ̆ Kră Yang. Bu gô tơgrŏl lê̆ dôm tơdrong thoi kơ tơmo tih noh ăn kơ lu bơ̆n? Ưh kơ đei bu nai ‘nguaih kơ Kră Yang Yêsu iung arih. Kơplah bơ̆n lui kơ Kră Yang iung arih, đĭ jơhngơ̆m gơnang kơ Kră Yang na Sư gô tơgrŏl lê̆ tơmo tih noh lĕch đơ̆ng tơdrong arih bơ̆n, păng Kră Yang iung arih gô mơ̆t pơgơ̆r lăm jơhngơ̆m bơ̆n tơgŭm bơ̆n arih đei yua ăn kơ Kră Yang păng chơt hiôk lăm Sư.
Kră Yang Yêsu iung arih bơih! ‘Noh bơih tơdrong hiôk chơt dêh kơ lu bơngai pơhrăm păng Sư sơ̆ păng lu bơ̆n dang ei. Athei lui mă kơjăp păng ră roi tơdrong hiôk chơt Kră Yang iung arih kơ đĭ đăng bơngai. Apinh ‘Bok arih oei ling lang lăm jơhngơ̆m bơ̆n wă kơ tơdrong arih bơ̆n ưh pă đei dôm tơdrong kiơ thoi kơ tơmo tih kơtĭt bơ̆n dơ̆ng. Păng bơ̆n arih tơdrong arih ‘nao hăm Kră Yang Yêsu iung arih lăm tơdrong hơmĕng ling lang ưh kơ layơ tôch. “Yua kơ bơ̆n dang lôch hơdai Yêsu bơih, na bơ̆n băt tơpă bơ̆n gô arih ‘nao kiơ̆ thoi Sư mơ̆n, ưh pă layơ wă iŏk tơdrong so dơ̆ng” (Rôm 6:8).
Ơ Kră Yang Yêsu, lăm tơdrong hiôk chơt ‘blŏk kơ Kră Yang iung arih. Inh apinh Kră Yang iŏk lê̆ đơ̆ng inh dôm tơdrong kiơ thoi kơ tơmo tih oei pơm kơ inh trăp. Apinh Ih ăn kơ inh lui kơjăp arih ‘nao kiơ̆ thoi ‘Bok arih păng ră roi tơdrong Kră Yang iung arih kơ lơ bơngai. Krao khan yua anăn Kră Yang Yêsu Krist, Amen.
Oei đei tơdrong kiơ thoi kơ tơmo tih oei pơm kơ tơdrong arih bơ̆n trăp ưh?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 37
Kênh Youtube BHKTHN:
