Malakaus 16:1-8
Nqe cim:
“Hnubkaj thaum sawv ntxov, lawv mus txog tom lub ntxa thaum hnub tabtom tawm tuaj. Thaum lawv taug kev mus lawv sib tham hais tias, “Leejtwg yuav pab muab daim txiagzeb uas npog lub rooj ntxas dov tawm?” (Malakaus 16:2-3)
Lus nug xav:
– Cov pojniam xav li cas thaum mus yuav tshuaj tsw qab tuaj pleev tus Tswv lub cev thiab txhawj hais tias leejtwg yuav pab dov daim txiagzeb npog lub qhov ntxa tawm?
– Tej txiagzeb uas qhovmuag tsis pom twg tseem pheej tsuam rawv rau cov neeg tiam thaud thiab tiam no?
– Yuav ua li cas thiaj dov tau daim txiagzeb qhov muag tsis pom ntawd kom muaj lubneej kaj siab nrog tus Tswv uas Sawv Rov Los?
Tomqab uas Tswv Yexus tuag lawm, Yauxej uas nyob hauv nroog Alimathas txawm tuaj thov tus Tswv lub cev thiab coj mus faus rau hauv ib lub qhov ntxa thiab “dov ib daim txiagzeb loj loj los npog lub rooj ntxas cia” (Malakaus 15:46). Hnubkaj thaum sawv ntxov, cov pojniam tseem muaj lub siab xav hais tias tus Tswv tuag lawm, lawv thiaj mus yuav tshuaj tsw qab tuaj pleev tus Tswv lub cev raws li ibtxwm ua; thiab lawv txhawj xeeb tsis paub hais tias leejtwg yuav yog tus pab dov daim txiagzeb uas loj thiab hnyav ntawd tawm mus kom lawv thiaj mus tau rau hauv. Tiamsis thaum mus txog chaw, lawv “tsa qhovmuag saib thiab pom daim txiagzeb twb muab dov rau ib sab lawm” (nqe 4). Thaum mus rau hauv lub qhov ntxa, lawv pom ib tug tub hluas hnav ib lub tsho dawb hais rau lawv hais tias: “Nws tsis nyob ntawm no, nws twb sawv lawm!” (nqe 6).
Daim txiagzeb uas npog tus Tswv lub qhov ntxa twb qhib plho lawm, tiamsis leejtwg uas tseem muaj lub siab xav hais tias tus Tswv tuag lawm, ces daim txiagzeb ntawd tseem tsuam hnyav hauv nws lubneej. Tej daim duab pivtxwv: Daim txiagzeb npog lub qhov ntxa twb tsuam hnyav rau cov pojniam mus txog rau hnub kaj uas Tus Tswv Sawv Rov Los. Daim txiagzeb ntshaw nyiaj thiab poob siab ua rau Yudas mus dai tuag. Daim txiagzeb ntshai tshee hnyo ua rau cov thwjtim khiav nkaum thaum pom tus Tswv raug ntsia rau saum ntoo khaublig. Daim txiagzeb ua xyemxyav tsuam rawv ua rau Timthawj Thaumas tsis ntseeg tias tus Tswv sawv los lawm,… Thiab peb niaj hnub nimno los kuj qaij tsis dhau tej txiagzeb uas qhov muag tsis pom tseem tsuam hnyav rau peb lubneej thiab. Puas muaj daim txiagzeb ntshaw nyiaj twg? Puas muaj daim txiagzeb sib khib sib txeeb twg? Puas muaj daim txiagzeb faib pab faib pawg twg? Puas muaj daim txiagzeb ntshaw sab nqaij tawv twg? Puas muaj daim txiagzeb khavtheeb, muab hlob twg? Puas muaj daim txiagzeb tub nkeeg kawm Vajtswv Txojlus twg?… Muaj ntau heev, ntau daim txiagzeb qhov muag tsi pom uas tabtom tswj cov ntseeg lubneej uas raws tus Tswv qab. Leejtwg yuav dov tej txiagzeb ntawd tawm rau peb? Tsis muaj leejtwg li, tsuas yog Tswv Yexus uas Sawv Rov Los lawm xwb. Thaum peb ntseeg hais tias tus Tswv twb sawv rov los, kawg siab kawg ntsws cia siab rau Nws, ces Nws yuav dov tej txiagzeb ntawd tawm hauv peb lubneej mus, thiab tus Tswv uas Sawv Rov Los yuav nyob hauv peb lub siab, pab peb ua neej muaj nqis rau tus Tswv thiab nyob kaj siab lug hauv Nws.
Tswv Yexus twb sawv rov los lawm! Ntawd yog txojkev zoo siab loj kawg nkaus rau cov thwjtim yav thaud thiab rau peb niaj hnub nimno. Cia li cia siab ntsoov thiab tshajtawm txojkev zoo siab hais txog tus Tswv sawv rov los lawm rau sawvdaws paub. Thov kom Tus uas Muaj Sia Nyob nyob rawv hauv peb lub siab kom peb lubneej tsis muaj tej txiagzeb loj loj tsuam hnyav ntxiv lawm, thiab peb ua lubneej tshiab nrog Tswv Yexus uas sawv rov los lawm dhau ntawm txojkev cia siab tsis kawg raws li Vajtswv Txojlus hais tias: “Tiamsis yog peb tuag nrog Yexus Khetos, peb ntseeg hais tias peb yuav muaj txojsia nrog nws nyob ua ke thiab.” (Loos 6:8).
Thov Vajtswv,
Tswv Yexus, nyob hauv txojkev zoo siab nco txog Koj kev Sawv Rov Los, nyuam yaus thov Koj pab nyuam yaus dim ntawm tej txiagzeb qhov muag ntsia tsis pom uas tabtom tsuam hnyav nyuam yaus lubneej. Thov pub rau nyuam yaus niaj hnub ruaj khov tso siab rau Tus uas Muaj Sia Nyob thiab tshajtawm Koj txojkev sawv rov los rau ntau leej paub. Nyuam yaus tuav Tswv Yexus Khetos lub npe thov, Amees.
Puas tseem muaj tej txiagzeb qhov muag tsis pom tseem tsuam hnyav rau peb lubneej?
Nyeem Vajluskub hauv peb lub xyoos Exekees 37
Kênh Youtube BHKTHN:
