Klei Aê Diê Blŭ: Y-Mathiơ 27:1-10
Êlan kliăng: “Ñu dlăm hĕ prăk anăn hlăm Sang Kkuh Mpŭ, leh anăn ñu kbiă nao ruôt kkuê ñu pô.” (Y-Mathiơ 27:5)
Klei êmuh ksiêm mĭn: Leh čhĭ Khua Yang, ya klei Y-Yuđas ngă leh? Ya ngă Khua Yang Yêsu lač êlâo kơ Y-Yuđas jing anak kơ klei rai luč? Ya klei mñă kơ drei mơ̆ng klei yăl dliê kơ Y-Yuđas?
Y-Yuđas Iskariôt čhĭ leh KhuaYang hŏng ênoh tlâo pluh asăr prăk. Tơdah leh ksiêm dlăng leh anăn thâo kơ phung khua ngă yang prŏng leh anăn phung khua mduôn kă leh anăn atăt jao Khua Yang kơ khua čar Y-Pilat akâo brei bi mdjiê Khua Yang, kyuadah tui si klei bhiăn, phung khua phat kđi Israel amâo mâo klei dưi phat kđi bi mdjiê mnuih ôh, Y-Yuđas hƀlŏk kơ klei soh kyuanăn ñu lŏ wĭt kơ phung khua ngă yang prŏng leh anăn phung khua mduôn “leh anăn lač, “Kâo ngă soh leh jao brei kơ diih êrah Pô amâo soh ôh!””, ƀiădah ñu knŏng mă tŭ sa klei wĭt lač khăng êăt, “Ya yuôm klei anăn kơ hmei? Klei anăn bruă ih.” (êlan 4).
Êlâo kơ tŭ klei knap mñai, Khua Yang Yêsu blŭ hŏng Ama Ñu msĕ snei, Y-Yuđas Iskariôt jing “anak kơ klei luč” (Y-Yôhan 17:12); leh anăn mơ̆ng mphŭn Ñu lač leh mơh hŏng phung ƀĭng kna kơ Y-Yuđas msĕ snei “sa čô hlăm phung diih jing yang jhat!” (Y-Yôhan 6:70). Ya ngă? Trăn Klei Aê Diê hruê anei brei kơ drei klei wĭt lač. Y-Yuđas Iskariôt hƀlŏk ƀiădah ñu amâo hdơr ôh Klei Blŭ Khua Yang mtô ktuê jih tlâo thŭn êgao, ƀiădah ñu knŏng hdơr kơ klei mjuă ênoh tơdah mă tŭ tlâo pluh asăr prăk čiăng lhiăr kơ Khua Yang! Ñu amâo hưn klei soh hŏng Khua Yang ôh ƀiădah nao hưn klei soh hŏng jing phung khua knơ̆ng klei đăo. Ăt jing sa čô khua ƀĭng kna Khua Yang ƀiădah Y-Yuđas amâo kmhal kơ klei soh “ênguôt snăk hia mtam” msĕ si khua ƀĭng kna Y-Pêtrôs ôh, ƀiădah ñu knŏng blŭ klei ăl krêñ leh anăn dlăm bi wĭt hĕ ênoh prăk ñu mă leh. Y-Yuđas kbiă đuĕ mơ̆ng sang kkuh mpŭ ƀiădah amâo lŏ wĭt kơ Khua Yang ôh ñu dôk rŭng hjăn păn ñu pô kyuanăn yơh ñu lĕ hlăm klei luč klei čang hmăng. Ti knhal tuč, ñu ruah klei djiê čiăng tlaih đuĕ mơ̆ng jih klei rŭng răng hlăm ai tiê, ƀiădah ñu amâo mĭn ôh tơdah asei mlei yuôl plah wah adiê leh anăn lăn hŏng sa aruăt klei, bi mngăt ñu ti anôk srăng nao?
Hruê anei, tơdah răk dlăng jih hdruôm hră Klei Mrâo Mrang Jăk, năng ai drei srăng ƀuah Y-Yuđas. Ƀiădah lĕ, akâo Khua Yang brei grăp čô drei lŏ dlăng wĭt sĭt êmĭt kơ drei pô hlăm yan bi hdơr klei Khua Yang tŭ Klei Knap Mñai thŭn anei. Lu blư̆ drei ăt khăp čiăng nao hŏng phung mnuih, boh nik hŏng phung mâo kơhưm klei dưi, hrô kơ nao kơ Khua Yang. Lu blư̆ tơdah ngă soh drei knŏng hƀlŏk ƀiădah amâo mâo tuôm kmhal ôh kyuanăn yơh ăt lŏ ngă soh nanao. Lu blư̆ hdơr klei blŭ jăk siam lăn ala leh anăn bi kah mbha hdơ̆ng drei hĭn kơ hdơr Klei Aê Diê Blŭ mtô. Lu blư̆ drei čuăn kơ klei hdĭp drei tui si klei mĭn drei pô hrô kơ êran nao kơ Khua Yang leh anăn jao klei hdĭp drei kơ Ñu. Anak mnuih knŏng wĭt lač kơ drei hŏng klei amâo mđing uêñ ôh, knŏng hjăn Khua Yang yơh dưi brei kơ drei êlan hdră čiăng dưi mă tŭ klei pap brei klei soh. Akâo Khua Yang brei drei lŏ wĭt kơ Ñu hruê anei mtam.
Si ngă drei ƀuh drei pô mâo ya anôk adôk msĕ si Y-Yuđas Iskariôt mơ̆? Ya klei drei čuăn ngă hlăm yan bi hdơr klei Khua Yang tŭ Klei Knap Mñai thŭn anei?
Wah lač: Ơ Khua Yang, klei yăl dliê kơ Y-Yuđas brei kâo thâo kral klei awăt êdu kâo pô yơh, lu blư̆ kâo čuăn ruah klei soh wê, êran tui hlue anak mnuih hrô kơ klei gưt asăp kơ Khua Yang. Akâo Khua Yang pap brei kơ kâo, bi doh ai tiê kâo mơ̆ng jih klei tluh čiăng, klei ai ngăm, leh anăn klei khăng ai tiê, čiăng kơ kâo thâo kmhal lŏ wĭt kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
