Êsai 53:1-6
Đe ‘bet sư rơka yua kơ tơdrong yoch lu bơ̆n. Yua kơ tơdrong kơnê̆ lu bơ̆n na đe pơjĭ sư. Đơ̆ng sư chu đe phak na lu bơ̆n đei hiôk-hian. Sư chu pŭ rơka wă kơ bơ̆n gơh klaih hiôk.”(Êsai 53:5)
Nơ̆r jet tơchĕng pơwao:
– Êsai bơngai pơtruh nơ̆r ‘Bok Kei-Dei bơtho tơbăt kơ bơ̆n bu hlôi pơ̆ng Kră Yang Yêsu tơ ‘long pơglang?
– Bơ̆n dang ei hơtai pơ̆ng Kră Yang tơ ‘long pơglang thoi yơ?
– Bơ̆n pơkă hăm Kră Yang tơdrong kiơ kơplah bơyan ‘blŏk hơdơ̆r kơ Kră Yang chu iŏk Tơdrong Gleh Pơmat?
Đơ̆ng rŏng kơ Juđa Ikariôt tơblơ̆ lê̆ Kră Yang, lu lĭnh đe Rôm chông ba Kră Yang Yêsu tơ ‘bok sek tơlang gah Tơdrong lui păng chông Kră Yang Yêsu tơ ‘bok sek tơ lang gah teh đak đe Juđê, tuch luch sư, ‘bok tih Pi-Lat ưh kơ kĕ krơ̆ng yua kơ lu kon pơlei Juđê nhơnhit athei khŏm pơ̆ng Kră Yang Yêsu tơ ‘long pơglang ngơngei bơih, na jing sư pă băt wă hơmet thoi yơ, jing sư athei lĭnh tôn teh păng pơ̆ng Kră Yang Yêsu tơ ‘long pơglang. Lu Hla Bơar Tơdrong ‘Nao ‘Lơ̆ng chih roi khan kon pơlei khan Kră Yang glăi hăm bơngai pơgơ̆r teh đak na athei ‘bok tih Pilat khŏm ăn lu lĭnh sư pơ̆ng hloi Kră Yang tơ ‘long pơglang. Mă khan lei ră, đei loi kơ tơpơh hrĕng sơnăm adrol kơ ‘noh sơ̆, ‘Bok Ê-sai bơngai pơtruh nơ̆r ‘Bok Kei-Dei hlôi khan lê̆ hơdrol nơ̆r ‘Bok Kei-Dei thoi âu “Đe ‘bet sư rơka yua kơ tơdrong yoch lu bơ̆n. Yua kơ tơdrong kơnê̆ lu bơ̆n na đe pơjĭ sư. Đơ̆ng sư chu đe phak na lu bơ̆n đei hiôk-hian. Sư chu pŭ rơka wă kơ bơ̆n gơh klaih hiôk (Êsai 53:5).
Rim ‘nu bơngai lui athei băt kơnăl ‘noh ưh kơ trŏ kơ pôm lu lĭnh đe Rôm, lu bơngai pơgơ̆r teh đak Juđê dah lu khŭl ‘bok pơgơ̆r tơdrong lui đe Juđê đĕch ôh pơ̆ng Kră Yang Yêsu tơ ‘long pơglang noh, bơ̆n‘nĕ tơpŭ đĭ yoch kơ lu sư noh ôh. Mă bơngai plơ̆ plĕch Kră Yang, mă bơngai pơgơ̆r tơdrong lui đe Juđê, dah lu ‘bok pơgơ̆r char đe Rôm…đĭ đăng lu sư noh lăm tơdrong Kră Yang ‘Bok Kei-Dei pơgơ̆r ngăl, wă kơ ‘Bok Kei-Dei pơkeh tơdrong tơdă Sư dŏng pơklaih kon bơngai. Tơdrong kăl ‘noh, rim ‘nu kơ bơ̆n athei kŭp kơ̆l roi kơ Kră Yang khan: Inh bơih hlôi pơ̆ng Kră Yang Yêsu tơ ‘long pơglang! Đĭ-đăng kơ bơ̆n âu bơngai yoch trŏ kơ lôch ngăl, păng yua kơ yoch bơ̆n noh bơih na Kră Yang Yêsu, Tơ’ngla mă ưh kơ đei yoch khŏm chu pŭ đe pơ̆ng Sư tơ ‘long pơglang! Tơdrong kơnê̆ hơlĕnh pơdăr, pơang kret tơsen, tơdrong bơ̆n ưh kơ ‘mêm mơnat, dôm tơdromg noh dang lĕ kơđĭnh pơ̆ng akâu Kră Yang. Jơhngơ̆m bơ̆n mă hmơ̆n pơm kơnê̆ ‘noh, kuă kơ lui noh, ưh kơ chu pơm kiơ̆ nơ̆r Kră Yang noh, tơdrong arih bơ̆n ‘bơ̆r đak klak ŭnh, chă pơ pơm gah ‘nguaih noh dang lĕ ‘bơ̆r ôr jreo: “Pơ̆ng lê̆ Sư tơ ‘long pơglang bĕ! Pơ̆ng lê̆ Sư tơ ‘long pơglang bĕ!” (Yôhan 19:6). Dah bơ̆n ưh kơ băt kơnăl kơ tơdrong ‘nâu, bơ̆n kơchăng hŏ, kơnh bơ̆n dang lĕ pơ̆ng lê̆ Kră Yang thim minh wơ̆t dơ̆ng!
Lăm bơyan ‘Blŏk hơdơ̆r kơ Kră Yang Yêsu chu iŏk gleh pơmat, apinh Kră Yang ăn kơ bơ̆n băt kŭp kơ̆l ‘bơ̆t jơ̆ng ‘long pơglang Kră Yang noh, bơ̆n roi tơdrong yoch, tơbral đĭ dôm tơdrong bơ̆n yoch glăi, tơ’bôh jơhngơ̆m băt bơnê kơ Kră Yang yua kơ Sư chu lôch wă pŭ đĭ dôm tơdrong yoch bơ̆n. Ưh kơ pôm thoi ei đĕch ôh, Sư kư̆m pŭ iŏk “tơdrong pơmat sơ’ngon mă bơ̆n lăng nhen thoi ‘Bok Kei-Dei phak hơmet Sư “wă kơ bơ̆n gơh đei tơdrong hiôk hơiă hăm ‘Bok Kei-Dei, đei tôm tơdrong hiôk hian lăm jơhngơ̆m.” Yua kơ Sư chu đe teh Sư hăm tơnguĕt noh wă pơklaih jơhngơ̆m bơhngol bơ̆n, yua kơ đơ̆ng tơdrong noh bơih na bơ̆n gơh tơ’bưh pơma dơnuh hiôk’lơ̆ng hăm ‘Bok Kei-Dei, thoi âu: “Ơ ‘Bă lu nhôn mă oei tơ kơpal plĕnh ti!” Tơpă, ưh kơ đei tơdrong pŭn hiôk ayơ atŏ hăm tơdrong bơ̆n gơh tơ’bưh‘lơ̆ng hăm Kră Yang ‘Bok Kei-Dei. Apinh Kră Yang ăn kơ bơ̆n ‘blŏk hơdơ̆r kơ Kră Yang chu iŏk gleh pơmat, bơ̆n ‘blŏk hăm jơhngơ̆m băt bơnê kơ Sư.
Ơ Kră Yang Yêsu, inh tơ̆m kŭl tăng ‘bơ̆t anăp ‘long pơglang Ih, jơhngơ̆m ‘bĕnh kơ tơdrong mơlâu yua kơ inh kơdih đei lơ tơdrong rơdu, kret tơsen, pơm yoch, inh hlôi pơ̆ng Ih tơ ‘long pơglang, pơm kơ Ih jĭ jơhngơ̆m, sơ’ngon yua kơ inh. Apinh Ih mơnat pă jô̆ yo kơ inh, inh khŏm adrin huay pă pơ̆ng Ih hăm kơ đĭnh tơ ‘long pơglang thim pă minh wơ̆t dơ̆ng. Apinh Ih tơgŭm inh arih trŏ lăp hăm tơdrong Ih ‘mêm, chu lôch noh. Inh krao khan yua Anăn Kră Yang Yêsu Krist, Amen!
Bơ̆n hăm băt kơnăl kơ bơ̆n kơdih hlôi pơ̆ng Kră Yang tơ ‘long pơglang đơ̆ng tơdrong bơ̆n arih yoch glăi noh ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 35
Kênh Youtube BHKTHN:
