I Timôthê 5:1-2
“Ih khă lu bơngai kră mă ‘lơ̆ng, ih athei pơma lung sư yua kơ sư kră hloh kơ ih; păng ih lăng sư thoi lĕ kơ ‘bă ih. Ih lăng lu bơngai drŏ-nglo ‘lơ̆p kơ ih kư̆m thoi oh ih mơ̆n. Ih lăng lu yă kră thoi mĕ ih păng ih lăng lu drŏ-kăn ‘lơ̆p kơ ih kư̆m thoi oh ih mơ̆n, ih athei pơma dơnuh păng sư mă ‘lơ̆ng đĕch.”
(I Timôthê 5:1-2)
Nơ̆r jet tơchĕng pơwao:
– ‘Bok Pôl sư đei tơlĕch nơ̆r bơtho pơlung ayơ kơ ‘bok Timôthê?
– Lu bơ̆n gô pơm tơdrong tơpă ayơ wă tơ’bôh kơ tơdrong bơ̆n bơtho pơlung noh trŏ tơpă?
Đơ̆ng rŏng kơ sư bơtho tơ’blŏk kơ Timôthê pơ’lơ̆ng athei “kơchăng gah akâu bơ̆n kơdih păng dôm tơdrong bơ̆n bơtho”, “adrin pơm khŏm khŏm” (I Timôthê 4:16), ‘Bok Pôl đei pơma ‘bơm kơ tơdrong jang bơngai wei triu juăt kơ pơm, ‘noh chrih tơ’bôh. Chrih tơ’bôh đei yua tơdah bơngai mă chrih tơ’bôh kơ đe ‘noh “oei pơhrăm iŏk tơdrong lui yom”. Kơplah ‘noh, nơ̆r pơlung huay kơ tơ’bơ̆p tơdrong pơgăn yua kơ tơdrong arih bơ̆n, păng lu bơ̆n kư̆m băt kơnăl thoi âu yua kơ bơ̆n kư̆m bơngai oei “pơtơ̆p pơhrăm”, na lu bơ̆n ưh kơ trŏ kơ bơngai dơ̆ng ‘bơ̆t anih ‘lơ̆ng hloh wă chrih khan kơ bơngai nai.
Wă tơgŭm Timôthê bơngai ‘bok bơtho lăm tơdrong jang ‘nâu, ‘bok Pôl bơtho sư “khă bơngai kră mă ‘lơ̆ng”. Nơ̆r pơma tơ’blŏk, tơgŭm nơ̆r pơma, pơma nơ̆r trăp lĕch đơ̆ng jơhngơ̆m areh blĕk, hil hŭt, dah mă lăng ưh kơ rơa, phŏ đei pơm kơ bơngai ‘noh ưh kơ hiôk, jing pơrăm ưh kơ đei pơyua. Yua kơ thoi noh, tơplih kơ “chrih nơ̆r trăp”, tơdrong mă Timôthê kăl kơ pơm hăm rim ‘nu bơngai ‘noh “bơtho pơlung”, tơ’blŏk hơdar hơdeh, pơyom păng mă hiôk ‘lơ̆ng.
“Bơngai kră hloh” păng “yă kră” (trong 1-2) ‘noh lu bơngai mă pơgơ̆r oei ‘lơ̆p anat dêh kơ wă tơgŭm tơ’bôh. Chăl arih adrol sơ̆ bơtho athei pơyom, pơyom kơ bơngai kră. Dang ei, kư̆m kăl kơ bơwei tơdrong gĭt kăl ‘nâu yua kơ đơ̆ng Kră Yang tơtă athei (Lêwi 19:32). Mă khan lei, trŏ tơdrong jang bơngai wei pơgơ̆r gah bơhngol, ‘bok Timôthê bơngai bơtho kư̆m oei tơgŭm nơ̆r pơma hăm lu bơngai ‘lŏ kră hloh tơdah kăl. Tơdrong mă lei lăi thoi noh mơ̆n, ‘noh hăm bơngai ‘lơ̆p hloh păng bơngai drŏnglo dah drŏkăn kư̆m athei lăng lei lăi (trong 1-2). Phŏ phŏ sư, lu bơ̆n adrin pơ’lơ̆ng hơmet “’bơ̆r hơpiĕt” bơ̆n dah đei pơma tơgŭm lu bơngai kră hloh kơ bơ̆n, na hăm bơngai “’lơ̆p” hăm “drŏkăn”, lu bơngai bơ̆n lăng sư ưh kơ lei lăi dang thoi bơ̆n thoi lu bơngai chăl sơ̆ lăng, na lu bơ̆n pơma nơ̆r trăp. Mălei, “pơlung” tơplih kơ nơ̆r “chrih trăp” oei tơ’bôh trong wă kơ lu bơ̆n yua iŏk kơ rim khul bơngai. Lăng sư thoi “’bă”, “’nhŏng oh”, “mĕ”, “mai oh”, wă khan lăng sư thoi bơngai lăm hnam dơnŏ bơ̆n, ‘mêm mơnat, hiơ̆k tơchĕng kơ lu sư, yua kơ thoi noh dôm lu nơ̆r pơma tơgŭm, bơtho pơlung đơ̆ng lu bơ̆n pơm kơ sư ‘bônh kơ sơng iŏk.
Pơma chrih ưh kơ đei layơ ‘bônh kơ bơ̆jang, mă loi dah bơngai oei ‘lơ̆p pơgơ̆r athei chrih tơ’bôh kơ lơ khul bơngai phara lăm Khul Bơngai Lui. Mălei, băt dôm yơ bơngai gô jing huay kơ pơm yoch păng băt mơlâu dah bơngai ayơ noh mă đei khan tơbăt păng chrih trŏ kơ tơdrong sư pơm. Đơ̆ng noh, weh wer kơ nơ̆r pơma dah trŏ kơ wă pơma noh jing minh tơdrong ưh kơ trŏ, tơdrong kăl sư athei krao apinh Kră Yang ăn tơdrong gơh hơgei, ‘mêm mơnat wă kơ pơma trŏ kơ anih, tơpăt trŏ păng pơyom dih băl.
Ơ Kră Yang, inh bơnê kơ Ih yua kơ Ih băt kơ inh gô jing ‘lơ̆ng hloh dah arih sa hăm bơngai nai, ‘noh bơngai ưh kơ ‘lơ̆ng thoi inh. Apinh Kră Yang tơgŭm inh gơh tơgŭm băl hăm tơdrong ‘mêm păng pơyom wă kơ jing đei yua kơ Kră Yang, krao khan yua anăn Kră Yang Yêsu Krist, Amen.
Dah bu bơtho pơlung hăm nơ̆r pơma ‘lơ̆ng trŏ, pơyom, jơhngơ̆m lu bơ̆n sơng iŏk thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 32
Kênh Youtube BHKTHN:
