Mathiơ 23:37-39
“Ơ lu bơngai Pơlei Jêrusalem, iĕm pơlôch kơ kiơ lu bơngai ‘Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t boih ră, dang iĕr krao kon sư wă krôp ră, mă-lei iĕm kuă kơ năm.” (Mathiơ 23:37)
Nơ̆r jet tơchĕng pơwao:
– Kră Yang ‘Bok Kei-Dei pơm thoi yơ hăm kon pơlei mă Sư rơih bơih?
– Jơhngơ̆m lu sư ‘măn kơ Kră Yang hăm lu bơngai mă Sư wơh thoi yơ?
– Lu sư đei tơdrong kiơ truh?
– Lu bơ̆n đei pơhrăm iŏk kơ bơ̆n tơdrong kiơ đơ̆ng ‘bai pơhrăm ‘nâu?
Kră Yang Yêsu yua iŏk pơma kơ lu bơngai Jêrusalem tơplih kơ kon pơlei Isơrael. Kră Yang kơ lu sư. Nơ̆r “Jêrusalem” wă khan pơlei hiôk hơđơ̆ng mălei đơ̆ng sơ̆ truh dang ei đei roi, pơlei ‘nâu jing anih pơlei kơkuh kơ rup yang, anih tơblah păng tơdrong yoch, “Kră Yang wơh lu ‘bok khan lê̆ adrol năm tơ lu sư, wă dui lu sư wih brŏk tơ Kră Yang; mă-lei lu sư ưh kơ wă mơ̆ng.” (II Hơ’mon 24:19). Kră Yang Yêsu tơtok tơtăm kơ lu kon pơlei Sư, “Ơ lu bơngai Pơlei Jêrusalem, iĕm pơlôch kơ kiơ lu bơngai ‘Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t boih ră, dang iĕr krao kon sư wă krôp ră, mă-lei iĕm kuă kơ năm.” (trong 37). Lu sư sơngah kơ tơdrong Kră Yang mơnat ăn, tơdrong Kră Yang ‘mêm kơ lu sư, păng tơdrong Kră Yang bơwei lu sư dang iĕr krao kon sư wă krôp ră. Tơdrong lu sư sơngah ưh kơ trŏ kơ đơ̆ng sơ̆ đĕch mălei oei truh tơ dang ei păng tơ anăp ning mônh, “Sư jur tơ teh đak Sư kơdih, mă-lei lu buăl Sư ưh kơ wă sơng iŏk Sư.” (Yôhan 1:11).
Kơplah kon bơngai rơhing chă tơdrong ‘mêm Kră Yang păng gơh kơ’nơp tơ ala pơnăr Kră Yang, thoi nơ̆r ‘bok Đawit krao hơpơi: “Ơ Kră Yang, tơdrong ‘mêm mơnat gĭt pă băt dang yơ! Kon bơngai năm kơ’nơp ala pơnăr Ih.” (Hơriso 36:7), na kon pơlei Kră Yang rai pơhơi kơ tơdrong Kră Yang ‘mêm păng tơdrong Kră Yang mơnat mă ‘măn ăn kơ lu sư. Thoi nơ̆r đei chih lăm II Hơ’mon 36:15-16: “Kră Yang ‘Bok Kei-Dei ‘bok lu sư đei lơ wơ̆t wơh bơngai pơtruh nơ̆r Sư bơtho khan ling lang, yua kơ Sư ‘mêm mơnat kơ kon pơlei pơla Sư păng hnam Sư oei. Mă-lei lu sư hiap lu bơngai đơ̆ng Kră Yang ‘Bok Kei-Dei, ưh kơ wă mơ̆ng pơdê nơ̆r Kră Yang ‘Bok Kei-Dei, pơjăm lu bơngai khan lê̆ adrol Kră Yang ding mah Kră Yang hil mĭl phak kon pơlei Sư, ưh pă gơh hơmet ming liơ.” Lĕch đơ̆ng lăng pơhơi tơdrong ‘mêm păng mơnat ăn đĕch đơ̆ng Kră Yang jing pơm kơ hnam lu sư nhen thoi juơ (trong 39). Đơ̆ng jơ ‘nâu lu sư ưh pă ‘bôh Kră Yang bơih yua kơ lu sư pơlôch Kră Yang, tơ̆p truh năr Kră Yang jur dơ̆ng ning-mônh na tơdrong mơnat Kră Yang gô tơ’bôh ăn kơ đĭ đăng bơngai. Mălei, Kră Yang oei mơnat kơ kon pơlei Sư, truh minh năr ayơ ei, kon pơlei gô khan: “Ư-ang kơ Yêsu đơ̆ng ‘Bok Kei-Dei wơh jur tơ bơ̆n dơ̆ng!” păng lăm năr ‘noh kon pơlei Isơrael gơh klaih, Kră Yang sơng iŏk lu sư.
Bơngai Lui kơ Kră Yang dang ei oei arih lăm chăl Kră Yang mơnat ăn đĕch, wă khan oei lăm tơdrong ‘mêm păng Kră Yang bơwei, oei đei jơ năr tơbral wă kơ gơh đei pŭn hiôk Kră Yang sơng iŏk. lu bơ̆n kăl kơ băt tơdrong ‘mêm Kră Yang ‘măn kơ bơ̆n kơdih wă kơ bơ̆n gơh bơ̆jang kơ Kră Yang tơnăp, arih ưang kơ anăn Kră Yang.
Ơ Kră Yang mă ‘mêm mơnat, inh bơnê kơ Kră Yang yua kơ Ih oei ling lang tơ’bôh tơdrong mơnat păng jơhngơ̆m chơ̆n hơđơ̆ng Ih lăm chăl arih inh. Bơnê kơ Kră Yang yua kơ Ih oei ăn kơ inh oei đei jơ năr tơbral păng gơh sơng iŏk hơmet ming inh. Apinh Ih ăn kơ inh tơnăp yak kiơ̆ hăm Kră Yang ding truh năr tôch. Krao khan yua anăn Kră Yang Yêsu Krist, Amen.
Lu bơ̆n gĭt kăl kơ tơdrong mơnat ăn đĕch păng tơdrong ‘mêm Kră Yang hăm tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Ê-xê-chi-ên 24
Kênh Youtube BHKTHN:
