Amaus 5:21-27
Nqe cim:
“Tiamsis cia txojkev ncaj ncees ntws ib yam li dej ntws, thiab cia txojkev tseeb ntws ib yam li tus dej ntws tsis paub nqhuab.” (Amaus 5:24)
Lus nug xav:
– Tus Cevlus Amaus nyob rau tiam twg?
– Tus Tswv muab haujlwm dabtsi rau nws ua?
– Nws cov lus cev tseg tshwmsim muaj tseeb li cas?
– Peb kawm tau zaj kawm dabtsi dhau los ntawm tus Cevlus Amaus zaj lus qhia?
Tus Cevlus Amaus nyob rau tiam tim 8 UY. Tomqab vajntxwv Xalumoos tas simneej, tebchaws Yixalayees raug faib ua ob lub, sab qab teb yog lub tebchaws Yudais uas yog vajntxwv Uxiyas kav, sab qaum teb yog lub tebchaws Yixalayees uas yog vajntxwv Yelaunpau-as II kav. Tus Cevlus Amaus nyob hauv lub zos Tekau-as, uas yog ib lub zos me hauv tebchaws Yudais. Nws txoj haujlwm yog yug yaj thiab tu tej txiv ncuavpias. Nws tsis yog cajces ntawm cov Cevlus lossis cov Povthawj hlob. Thaum Amaus tabtom yug yaj hauv Tekau-as, tebchaws Yudais, ces tus Tswv tau hu nws los ua tus Cevlus. Nws tsis tau kawm lossis npaj txhij thaum tus Tswv hu nws hlo li (Amaus 7:14-15).
Tiam uas tus Cevlus Amaus sawv los cevlus yog lub caij uas muaj kev thajyeeb thiab kev lagluam vammeej heev hauv ob lub tebchaws. Cov thawjcoj hauv tebchaws Yixalayees yim hnub yim muaj nyiaj thiab npluanuj. Nyob sab kev ntseeg, sab nraud lawv yeej tseem coj tej kevcai pehawm zoo heev (nqe 21-23). Tiamsis nyob hauv sab kev ua neej, lawv ua phem heev, lawv quabyuam thiab txeeb cov neeg txomnyem tug (Amaus 2:6-7; 4:1; 5:11-12). Vim li ntawd, tus Tswv thiaj txib tus Cevlus Amaus mus rau lub nroog Npethees, uas yog qhov chaw pehawm tseemceeb ntawm Yixalayees, mus tshajtawm tej lus hnyav kawg nkaus: Tus Tswv ntxub tej tsiaj tua fij, tus Tswv tsis txaus siab rau tej rooj noj rooj haus, tus Tswv tsis txais tej khoom fij, tus Tswv tsis mloog tej nkauj qhuas Nws… (nqe 21-23). Tus Cevlus Amaus tuav tus Tswv lub npe ceebtoom cov thawjcoj tias yuav tsum hloov siab, tso tseg qhov kev tsimtxom cov neeg pluag, ua neej ncaj ncees, ua zoo rau txhua tus tsis xaiv ntsejmuag, thiab txiav txim ncaj ncees rau txhua tus tibneeg (nqe 24). Yog tias lawv tsis hloov siab, tus Tswv yuav cia lawv raug ntes mus ua cev qhev rau lwm lub tebchaws (nqe 27). Lo lus ceebtoom no tau tshwmsim muaj tseeb thaum lawv muaj siab tawv tsis mloog lus. Xyoo 722 UY, lub tebchaws Axilias qaum teb sab hnub tuaj tau tuaj txeeb tebchaws Yixalayees, ntes tagnrho cov thawjcoj mus rau tebchaws Axilias, tsuas tseg cov neeg txomnyem nyob hauv lub tebchaws lawm xwb. Tus Tswv ncaj ncees hauv kev txiav txim, tiamsis Nws kuj coglus tias muaj ib hnub Nws yuav coj Nws haivneeg rov los nyob hauv lawv lub tebchaws dua (Amaus 9:11-15).
Tus Cevlus Amaus zaj lus qhia meej hais tias Vajtswv yog tus uas kav tagnrho tibneeg, Nws yog Tus ncaj ncees, Nws ib txwm ua zoo rau sawvdaws, tsis xaiv leejtwg ntsejmuag; tiamsis Nws kuj yog tus uas hlub tshua thiab ua zoo rau tibneeg. Peb yog Vajtswv cov menyuam, peb kuj yuav tsum ua lubneej qhia tshwm peb Leej Txiv tus mojyam uas zoo. Thov tus Tswv pab kom peb ua lubneej ncaj ncees raws li tus Tswv Txojlus qhia hauv Vajluskub, thiab ua lubneej sib hlub ib yam li tus Tswv hlub peb. Thov kom peb lubneej ua rau tus Tswv lub npe tau koob meej.
Thov Vajtswv,
Leej Txiv uas muaj kev hlub tshua, thov pab nyuam yaus muaj lub siab nqhis nqhawv nyeem thiab kawm Koj Txojlus txhua hnub, cia Koj Txojlus ntuas thiab txhim kho nyuam yaus thaum nyuam yaus ua txhaum. Thov pab nyuam yaus qhia tshwm Koj txojkev ncaj ncees thiab hlub tshua rau txhua tus dhau ntawm nyuam yaus lubneej txhua hnub. Nyuam yaus tuav Yexus Khetos lub npe thov, Amees.
Peb puas tau ua lubneej ncaj ncees thiab sib hlub raws li Vajtswv Txojlus qhia lawm tau?
Nyeem Vajluskub hauv peb lub xyoos: Exekees 2-3
Kênh Youtube BHKTHN:
