Klei Aê Diê Blŭ: Klei Bi Hriêng 26:6-10
Êlan kliăng: “Hlei pô knang kơ mnuih mluk ba klei hưn kơ arăng jing msĕ si khăt jơ̆ng ñu pô leh anăn mnăm klei bi rai” (Klei Bi Hriêng 26:6)
Klei êmuh ksiêm mĭn: Si jing mnuih mluk? Trăn Klei Aê Diê Blŭ anei mtô ya klei amâo dưi ngă ôh hŏng mnuih mluk? Si drei yua klei mtô anei hlăm bruă Khua Yang?
Dŭm êlan Klei Bi Hriêng anei hưn brei răng đăm đăo leh anăn jao ôh bruă kơ mnuih mluk. “Mnuih mluk” tinei amâo djŏ jing mnuih hriăm ƀiă ôh, mluk ôh ƀiădah jing mnuih amâo huĭ mpŭ kơ Aê Diê, dlăng hơăi mang klei thâo mĭn leh anăn klei mtô (Klei Bi Hriêng 1:7; Klei Mmuñ Hđăp 14:1). Năng ai diñu mâo hră bi mklă gưl dlông ƀiădah amâo mâo ôh klei thâo mĭn mơ̆ng Aê Diê čiăng thâo msir mgaih bruă knuă. Aê Diê iêô mthưr drei brei hdĭp klă mngač hlăm bruă ruah mnuih. Tal sa, đăm jao ôh bruă klam kơ mnuih mluk. Pô čih hră čih: “Hlei pô knang kơ mnuih mluk ba klei hưn kơ arăng jing msĕ si khăt jơ̆ng ñu pô leh anăn mnăm klei bi rai.…” (êlan 6). Tơdah jao bruă kơ mnuih mluk amâo mdê ôh hŏng klei čŏng pô ngă jhat kơ pô. Knang kơ sa čô mnuih mluk mơĭt sa hră yuôm bhăn, hră anei srăng amâo dưi ba djŏ hŏng klei kñăm ôh, atăt kơ hdră kčah srăng rai jih, srăng ngă kơ mnuih ƀuôn sang amâodah phung roh mưč mač kyua mâo leh klei ruah soh čhuai. Ngă snăn srăng čŏng bi hêñ kơ pô. Kyua anăn, phung ƀuôn sang Aê Diê brei ruah phung sĭt suôr leh anăn thâo mĭn ngă bruă Aê Diê jao. Đăm jao ôh bruă yuôm bhăn kơ mnuih amâo hriê kơ prŏng hlăm mngăt amâodah kƀah bruă klam.
Tal dua, brei thâo mnuih mluk ngă soh hŏng klei thâo mĭn. “Klei blŭ bi hriêng hlăm ƀăng êgei phung mluk jing msĕ si jơ̆ng đŏng dlơt awăt amâo thâo êbat ôh” (êlan 7); amâodah “Klei blŭ bi hriêng hlăm ƀăng êgei phung mluk jing msĕ si êruê tlŏ kngan sa čô mnuih kpiê ruă” (êlan 9). Jơ̆ng đŏng dlơt, amâo thâo êbat ôh, êwiên jing jơ̆ng amâo lŏ dưi ngă bruă tŭ dưn ôh; amâodah sa nah êruê tlŏ kngan sa čô mnuih kpiê ruă srăng lŏ dơ̆ng bi êka kyua ñu amâo thâo lŏ hdơr čiăng ksuê̆ êruê anăn ôh. Ăt snăn mơh, klei blŭ bi hriêng hlăm ƀăng êgei mnuih thâo mĭn ba klei bi hlao, ƀiădah hlăm ƀăng êgei mnuih mluk, bi êka leh anăn hơăi mang. Mnuih mluk srăng blŭ thâo, blŭ jăk ƀiădah diñu pô amâo hdĭp hlue si klei mtô anăn ôh. Diñu mtô jăk msĕ si klei bi hriêng ƀiădah lŏ hdĭp soh hŏng klei sĭt nik leh anăn ngă rŭng răng hlăm êpul êya. Phung ƀuôn sang Aê Diê brei thâo răng hlăm bruă ruah mnuih kah mbha Klei Aê Diê Blŭ. Knŏng phung hdĭp hlăm klei huĭ mpŭ kơ Aê Diê kơh srăng kah mbha djŏ klei sĭt nik.
Tal tlâo, mpŭ amâodah yua mnuih mluk ngă luč liê. “Hlei pô mpŭ kơ sa čô mluk, jing msĕ si sa čô kă asăr boh tâo ti klei ksu bhĭr… Hlei pô mưn mnuih mluk leh anăn phung hiu găn gao, jing msĕ si sa čô mnah hna bi êka jih jang mnuih” (êlan 8, 10). Mpŭ amâodah jao bruă kơ mnuih mluk jing dưm pô anăn hlăm anôk huĭ hyưt, hmăi jhat kơ bruă mbĭt. Đăm ruah ôh mnuih knŏng kyua digơ̆ hur har, ƀiădah ruah mnuih kyua digơ̆ mâo klei hdĭp huĭ mpŭ kơ Aê Diê.
Knuih drei hdĭp ngă pô mkăn đăo knang jao mă bruă kơ Aê Diê mơ̆?
Wah lač: Ơ Khua Yang, akâo kơ Ih brei kơ kâo klei thâo mĭn, thâo bi mklă hlăm djăp klei bi mguôp čiăng ñĕ kơ klei ruah soh čhuai. Akâo kơ Khua Yang ƀuah mkra kâo čiăng kơ kâo jing mnuih năng đăo knang, hdĭp hlăm klei sĭt nik leh anăn klei thâo mĭn mơ̆ng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
