Yaxayas 58:11
Nqe cim:
“Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li.” (Yaxayas 58:11)
Lus nug xav:
– Tus Cevlus Yaxayas qhia tias tus Tswv coglus li cas rau Nws haiv neeg?
– Lawv yuav tsum ua li cas thiaj txais tau lo lus cogtseg ntawd?
– Peb txais tau lo lus cogtseg no li cas kom muaj kev thajyeeb nyob hauv lub xyoo tshiab?
Nyob hauv phau Yaxayas tshooj 58, Vajtswv tau cem Nws haiv neeg ua lubneej ntsejmuag ncaj siab nkhaus, tsis ncaj ncees thiab tsis muaj kev hlub txawm tias lawv tseem tuav tej kevcai ntseeg. Nqe 11 yog lo lus cogtseg hais tias tus Tswv yuav foom koobmoov txij li sab nqaij tawv mus txog sab ntsujplig rau cov uas paub lees kev txhaum thiab tig rov los ua lubneej ncaj ncees.
Qhov xubthawj, tus Tswv yuav coj Nws cov menyuam kev. Lo lus “coj nej kev mus ibtxhis” qhia txog tus Tswv kev coj tsis tu ncua, Nws niaj hnub taw qhia thiab nrog nraim peb txhua kaujruam ntawm txojkev ntseeg. Tau tus Tswv coj, peb yuav tsis ntshai yuamkev. Thib ob, tus Tswv yuav pub rau peb muaj txaus. Lo lus “pub txhua yam zoo rau nej kom txaus nej siab” txhais tau hais tias pub muaj npluamias txhua yam, peb yuav tau tus Tswv pub muaj txhua yam txawm yuav nyob hauv lub tebchaws uas qhuav nkig nkuav. Ntawm no yog ib qhov kev tabpov ua rau peb muaj kev tso siab lawv tus Tswv qab txawm tsis paub tias yav tom ntej yuav zoo li cas. Thib peb, tus Tswv yuav pub dag zog kom peb kovyeej tej kev nyuaj siab. Lo lus “Kuv yuav pub nej muaj zog thiab noj qab nyob zoo” txhais hais tias ua kom loj siab, pub ntxiv txojsia. Tus Tswv txojkev txhawb zog yuav pab peb hla dhau tej lub caij uas qaug zog, tej txojkev nyuaj siab kom peb mob siab rau txojkev ntseeg ntxiv mus txog thaum kawg. Thib plaub, tus Tswv yuav niaj hnub saib xyuas peb. Lo lus “lub vaj uas muaj dej ywg tsis tseg” yog daim duab hais txog ib lub vaj uas muaj dej txaus, tej ntoo ntsuab xiab thiab txi txiv ntau. Cov neeg uas tau tus Tswv saib xyuas lubneej sab ntsujplig yuav zoo li ib tug dej uas niaj hnub ntws, laj ntxuj ntxiag thiab tsis txawj nqhuab ib zaug li.
Thaum saib mus rau tej teebmeem uas tabtom tshwmsim hauv ntiajteb no, peb tsis paub tias yuav muaj dabtsi tshwmsim hauv 365 hnub tom ntej, tiamsis qhov uas peb paub tseeb yog peb tabtom pehawm tus Vajtswv uas ncaj ncees, Nws tsis hloov li, thiab Nws tej lo lus cogtseg muaj nqis tsimtxiaj mus ib txhis. Peb ntseeg tias thaum peb tas siab ua lubneej ncaj ncees thiab muaj kev hlub, ces tus Tswv yuav nrog nraim peb hauv lub xyoo tshiab no mus txog hnub Nws rov qab los. Peb ntseeg tias tus Tswv yuav pub rau peb muaj zaub mov noj txaus txhua hnub (Mathais 6:11). Peb ntseeg tias Nws yuav niaj hnub pub koob hmoov, pub dag zog tshiab kom peb muaj zog nrog tus Tswv mus. Peb ntseeg hais tias tus Tswv tabtom saib xyuas, txhim kho kom peb lub neej niaj hnub tawg paj txi txiv ntau tuaj, peb lubneej thiaj li muaj nqis thiab ua rau tus Tswv tau koob meej mus ntxiv. Thov tus Tswv pab peb niaj hnub nrhiav tus Tswv dhau ntawm Vajtswv Txojlus, tuav txojkev sib raug zoo nrog tus Tswv, ua lubneej hlub lwm tus, pab lwm tus, kom peb txaus siab hlo, nyob ruaj khov hauv lub xyoo tshiab.
Thov Vajtswv,
Tus Tswv uas muaj hwjchim, nyuam yaus ntseeg tias Koj tabtom kav txhua yam thiab nrog nraim nyuam yaus nyob tamsim no thiab yav tomntej. Thov pab nyuam yaus nrog Koj mus khov kho hauv lub xyoo tshiab no. Nyuam yaus tuav Yexus Khetos lub npe thov, Amees.
Puas tseem muaj yam dabtsi ua rau peb tsis qab siab thaum pib lub xyoo tshiab no thiab?
Nyeem Vajluskub hauv peb xyoos: I Kauleethaus 8
Kênh Youtube BHKTHN:
