Klei Aê Diê Blŭ: I Y-Timôthê 3:8-13
Êlan kliăng: “Brei phung khua sang yang msĕ mơh jing năng kơ arăng mpŭ, amâo blŭ dua klei ôh, amâo jing ră kơ kpiê ôh, amâo jing mnuih kčưn kơ prăk ôh. Brei diñu djă pioh klei yuôm hgăm kơ klei đăo hŏng ai tiê kpă êngeh” (I Y-Timôthê 3:8-9)
Klei êmuh ksiêm mĭn: Khua ƀĭng kna Y-Pôl lač kơ si knuih sa čô khua sang yang brei mâo? Ya klei bi mni kơ Khua sang yang sĭt suôr mă bruă hŏng knuih jăk?
Mphŭn pŏk êlan 8, Khua ƀĭng kna Y-Pôl yua boh blŭ “msĕ mơh” brei ƀuh klei mkŏ plah wah knuih jăk mơ̆ng khua pô mtô hŏng khua sang yang. “Khua sang yang” hlăm klei Grĕk jing “dĭng buăl”. Hlăm bruă ruah phung khua sang yang tal êlâo hlue si Bruă Phung Khua Ƀĭng Kna 6:1-6, bruă klam phung khua sang yang jing đru, amâodah jing “dĭng buăl”, čiăng kriê dlăng klei čiăng hlăm kđeh leh anăn klei bi mguôp plah wah phung đăo. Khădah snăn, trăn Klei Aê Diê Blŭ hruê anei brei drei ƀuh tlâo mta klei brei mđing mkăn.
Tal sa, hlăk êjai Bruă Phung Khua Ƀĭng Kna 6 lač klă kơ bruă klam khua sang yang, snăn tinei, klei Khua ƀĭng kna Y-Pôl mđing hĭn jing knuih hdĭp. Ñu lač kơ pă klei sa čô khua sang yang “brei” mâo: Brei phung khua sang yang msĕ mơh jing năng kơ arăng mpŭ, brei diñu djă pioh klei yuôm hgăm kơ klei đăo hŏng ai tiê kpă êngeh, brei arăng lông dlăng diñu êlâo, brei diñu kiă kriê bi jăk phung anak diñu leh anăn sang diñu (êlan 8, 9, 10, 12); leh anăn tlâo klei “amâo dưi ngă”: amâo blŭ dua klei ôh, amâo jing ră kơ kpiê ôh, amâo jing mnuih kčưn kơ prăk ôh (êlan 8).
Tal dua, klei hdĭp ung mô̆ gŏ sang phung “khua sang yang” mâo mñă klă. Khua ƀĭng kna Y-Pôl mtô phung khua sang yang brei dôk sa mô̆, mđing mkŏ mjing klei hdĭp kơ mô̆ leh anăn thâo mtô anak čô (êlan 11-12). Ênưih snăk čiăng kơ phung khua sang yang leh anăn phung mă bruă tuh êyuh jih hruê mmông, ai tiê kơ bruă knuă leh anăn klei bi kƀĭn Phung Sang Aê Diê, ƀiădah lui hĕ klei hdĭp myang, kđeh leh anăn klei mô̆ anak čang hmăng. Boh jhat jing anak čô amâo ư ai, mâo ai tiê phĭ hŏng Aê Diê leh anăn kjham hĭn jing luč hlăm mngăt; bi klei hdĭp ung mô̆ snăn dleh dlan, rŭng răng, ung mô̆ knŏng hdĭp mbĭt bi êdah ti êngao, amâo lŏ mâo klei blŭ tlao, klei bi đru leh anăn klei bi mđĭ ai ôh!
Tal tlâo, khua sang yang, amâodah “dĭng buăl” Khua Yang, brei jing mnuih “djă pioh klei yuôm hgăm kơ klei đăo hŏng ai tiê kpă êngeh”, jing thâo săng kơ klei đăo leh anăn Klei Aê Diê Blŭ, ăt msĕ mơh kriê pioh ñu hŏng ai tiê kpă êngeh. Hruê anei, đa đa phung mă bruă hlăm Phung Sang Aê Diê jih ai tiê hŏng bruă knuă, thâo săng kơ klei mkŏ mjing lu hĭn kơ thâo săng Klei Aê Diê Blŭ. Khădah snăn, phung khua sang yang tal êlâo mâo mkŏ mjing mơ̆ng hnơ̆ng čuăn “bŏ hŏng klei đăo leh anăn Yang Mngăt Jăk” (Bruă Phung Khua Ƀĭng Kna 6:5). Klei đăo kjăp mơ̆ng tur Klei Aê Diê Blŭ, leh anăn Yang Mngăt Jăk brei mâo tur jing atăt gai klei mă bruă Aê Diê kơ phung khua sang yang leh anăn phung mă bruă hlăm Phung Sang Aê Diê, amâo djŏ jing klei thâo amâodah klei thâo mkŏ mjing ôh.
Phung ƀuôn sang Aê Diê brei wah lač kơ phung khua sang yang leh anăn phung mă bruă hlăm Phung Sang Aê Diê sĭt suôr mă bruă hŏng knuih hdĭp jăk čiăng kơ Phung Sang Aê Diê dưi rŭ mdơ̆ng, đĭ kyar, leh anăn diñu pô mâo klei mưn Aê Diê brei jing mâo klei mpŭ leh anăn klei khăp, klei đăo hlăm Khua Yang ƀrư̆ hruê ƀrư̆ kjăp hĭn (êlan 13).
Drei wah lač mơ̆ kơ phung khua sang yang leh anăn phung mă bruă hlăm Phung Sang Aê Diê?
Wah lač: Ơ Khua Yang, akâo kơ Ih đru kơ phung khua sang yang grăp hruê hriê kơ prŏng hlăm klei đăo, knuih hdĭp, bi mơak kơ Aê Diê hlăm klei hdĭp thâo khăp ăt msĕ mơh klei bi dôk ung mô̆ čiăng kơ diñu mă bruă kơ Aê Diê tŭ dưn.Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Amôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
