I Timautes 3:8-13
Nqe cim:
“Cov ntseeg uas pab ua Vajtswv tes haujlwm yuav tsum yog cov uas muaj tus cwjpwm zoo thiab sawvdaws hwm; lawv tsis ntau ncauj, tsis quav yeeb quav tshuaj, tsis quav cawv thiab tsis ntshaw nyiaj. Lawv yuav tsum yog cov uas muaj lub siab ncaj ncees, muab siab npuab Txojlus tseeb uas Vajtswv tau qhia rau sawvdaws lawm.” (I Timautes 3:8-9)
Lus nug xav:
– Timthawj Paulus hais txog tej cwjpwm twg uas cov pab ua Vajtswv haujlwm yuav tsum muaj?
– Cov pab ua Vajtswv haujlwm uas ncaj ncees ua haujlwm nrog tus cwjpwm zoo yuav tau txais nqi zog dabtsi?
Pib ntawm nqe 8, Timthawj Paulus siv lo lus “kuj ib yam nkaus” (HMOWSV) los qhia txog kev sib txuas ntawm tus thawj saib xyuas cov ntseeg thiab cov pab ua Vajtswv haujlwm tus cwjpwm. “Cov uas pab ua haujlwm” hauv lus Kilis muaj lub ntsiab lus yog “tus tubtxib”. Hauv kev tsa cov pab ua Vajtswv haujlwm thawj zaug raws li Tes Haujlwm 6:1-6, lawv lub luag haujlwm yog pab, lossis ua “tubtxib”, tu cov neeg txomnyem thiab ua kom muaj kev sib raug zoo ntawm cov ntseeg. Tiamsis, nqe Vajluskub hnub no muab peb yam ntxiv rau peb cim nco.
Qhov xubthawj, nyob hauv Tes Haujlwm 6 qhia meej txog tes haujlwm ntawm cov pab ua Vajtswv haujlwm, tiamsis nyob ntawm no, qhov uas Timthawj Paulus txhawj xeeb yog hais txog tus cwjpwm coj zoo. Nws hais txog plaub yam uas tus pab ua Vajtswv haujlwm “yuav tsum”: muaj tus cwjpwm zoo thiab sawvdaws hwm, muaj lub siab ncaj ncees, muab siab npuab Txojlus tseeb uas Vajtswv tau qhia rau sawvdaws lawm, raug sim lawm, tswj tau nws tsevneeg (nqe 8, 9, 10, 12); thiab peb yam “tsis txhob”: tsis ntau ncauj, tsis quav yeeb quav tshuaj, tsis quav cawv thiab tsis ntshaw nyiaj (nqe 8).
Yam ob, lub neej txijnkawm ntawm “cov pab ua Vajtswv haujlwm” tau hais nruj heev. Timthawj Paulus qhia tias cov pab ua Vajtswv haujlwm yuav tsum ua ncaj ncees hauv kev txijnkawm, mob siab txhawb nqa tus txijnkawm lub neej thiab paub qhia cov menyuam (nqe 11-12). Yooj yim heev rau cov pab ua Vajtswv haujlwm thiab cov neeg koom tes siv tas nrho lub sijhawm, dag zog rau kev ua haujlwm hauv Pawg Ntseeg, uas tsis nco qab txog pojniam thiab menyuam lub neej sab ntsujplig, sab nqaij tawv thiab lawv tej kev xav. Thaum kawg ua rau cov menyuam poob siab, iab siab rau tus Tswv thiab tej zaum poob sab ntsujplig; hos kev txijnkawm ces ntxhov siab, tsis sib haum, ob niam txiv tsuas nyob ua ke ntawm lub npe xwb, tsis muaj luag, tsis sib qhia lossis tsis sib txhawb zog lawm!
Yam peb, tus pab ua Vajtswv haujlwm, lossis tus Tswv “tus tubtxib”, yuav tsum yog tus “muaj lub siab ncaj ncees, muab siab npuab Txojlus tseeb”, ntawd yog nkag siab txog Vajtswv Txojlus thiab coj raws los ntawm lub siab dawb paug. Niaj hnub nimno, muaj ib txhia neeg ua haujlwm hauv Pawg Ntseeg kub siab rau tes haujlwm, paub txog kev tswjhwm ntau dua paub Vajtswv Txojlus. Tiamsis, cov pab ua Vajtswv haujlwm thaum xubthawj tau tsa los ntawm qhov uas “muab siab rau ntseeg thiab puv npo Vaj Ntsujplig tus Dawbhuv” (Tes Haujlwm 6:5). Kev ntseeg ruaj khov raws li Vajtswv Txojlus, thiab Vaj Ntsujplig qhia yuav tsum yog lub hauv paus coj kev ua Vajtswv haujlwm cov pab ua Vajtswv haujlwm thiab cov neeg koom tes hauv Pawg Ntseeg, tsis yog txojkev txawjntse lossis kev paub tswjhwm.
Tus Tswv cov menyuam tsimnyog thov Vajtswv rau cov pab ua Vajtswv haujlwm thiab cov neeg koom tes hauv Pawg Ntseeg kom ncaj ncees ua haujlwm nrog tus cwjpwm zoo, kom xwv Pawg Ntseeg tau kev txhawb zog, loj hlob, thiab lawv tus kheej yuav tau txais nqi zog uas tus Tswv pub uas yog tau luag hwm thiab hlub, txojkev ntseeg hauv tus Tswv yim hnub yim ruaj khov (nqe 13).
Thov Vajtswv,
Tus Tswv, thov pab kom cov pab ua Vajtswv haujlwm txhua hnub loj hlob hauv kev ntseeg, lub neej coj zoo, ua haum Koj siab hauv lub neej thiab kev txijnkawm kom lawv ua Koj haujlwm tau txais txiaj ntsig. Nyuam yaus tuav Yexus Khetos lub npe thov, Amees.
Peb puas muaj thov Vajtswv rau cov pab ua Vajtswv haujlwm thiab cov neeg koom tes hauv Pawg Ntseeg lawm tau?
Nyeem Vajluskub hauv peb lub xyoos: Amaus 1
Kênh Youtube BHKTHN:
