I Timôthê 3:1-7
“Tơdrong jang kră wei-lăng lu bơngai lui lăm hnam akŭm, tơdrong jang noh kăl tơpă. Bơngai bu ‘maih jang tơdrong ‘noh sư chă tơdrong jang ‘lơ̆ng tơpă.” (I Timôthê 3:1)
Nơ̆r jet tơchĕng pơwao:
– ‘Bok Pôl pơma hơđăl thoi yơ gah tơdrong hơpơi pơm ‘bok bơtho?
– Lăm chăl arih ‘bok bơtho kăl kơ đei tơdrong kiơ?
– Kon pơlei Kră Yang kăl kơ pơm kiơ wă tơgŭm lu bơngai pơgơ̆r lăm tơdrong lui pŭ iŏk tơdrong jang mă Kră Yang pơjao?
Đơ̆ng rŏng kơ pơma kơ ‘bar khul bơngai drŏnglo păng drŏkăn, ‘bok Pôl đei pơma pơtih gah ‘bar tơdrong jang rơđah lăm khul bơngai lui noh pơm ‘bok bơtho păng tơdrong jang kră hnam yang. Blŭng a, sư pơma gah tơdrong jang ‘bok bơtho, kiơ̆ kơ Pah ‘Nao, lu ‘bok bơtho bơngai bơ̆jang tơm gah ră roi lu tơdrong jang noh wă lei lăi băl đĕch, tă kơ pơma gah tơdrong bơwei, wei lăng khul bơngai lui (Tĭt 1:5-7). Pơma gah ‘bok bơtho. ‘Bok Pôl đei pơma pêng: Mă mônh, sư pơma hơđăl khan bu hơpơi pơm ‘bok bơtho noh minh tơdrong ‘lơ̆ng dêh, wă pơma hơđăl tơdrong ‘nâu, sư pơma khan: “Tơdrong đe bơtho âu trŏ tơpă” (trong 1) wă khan ‘nâu bơih nơ̆r đe bơtho trŏ tơpă”. Hơpơi rŏ kơ jing bơngai bơwei lu bơngai lui ‘noh minh tơdrong ‘lơ̆ng dêh, trŏ kơ pôk tơiung băl. Dang ei, lu bơ̆n ‘bônh kơ huŏng lăm ‘bar tơdrong: Lăng lu bơngai bơ̆jang jơ̆ bơngai jang lăm “Tơdrong ‘lơ̆ng” ‘lơ̆ng hloh, jê̆ Kră Yang hloh kơ lu bơngai jang lăm tơdrong jang ala teh âu. Minh pah, kư̆m đei bơngai pơư kơ lu bơngai jang tơ ala teh âu, hăm jơhngơ̆m “nhen jang kơ Kră Yang” ding mah pơjăm tơdrong wei triu. ‘Bar tơdrong ‘nâu tă kơ ưh kơ trŏ ngăl. ‘Bok Pôl tơbăt kơ lu bơ̆n hơpơi pơm ‘bok bơtho noh hơpơi jang ‘lơ̆ng dêh lăm tơdrong noh, na ưh kơ trŏ mưh pơting hăm tơdrong hơpơi kơ lu tơdrong jang nai.
Mă ‘bar, đơ̆ng trong 2-7, ‘bok Pôl đei tơbăt wă kơ hơpơi tơdrong ‘lơ̆ng noh wă kơ jing minh tơdrong jang ‘lơ̆ng, lei na bơngai bơwei gah bơhngol kăl kơ hơmet chăl arih gah lăm, noh wă khan huay kơ đei kiơ wă pơma, gơh gơ̆t, kĕ ĕnh… tơ’bôh truh tơ gah ‘nguaih, huay kơ et sik dah mă khĕnh hơwĕng, băt song iŏk tơmoi, sư bơngai dim, lu bơngai ưh kơ lui ‘bôh sư minh ‘nu bơngai ‘lơ̆ng… minh tơdrong gĭt kăl dơ̆ng noh jơ̆ hnam dơnŏ, sư iŏk akăn minh ‘nu đĕch, sư pơgơ̆r hnam dơnŏ sư gơh tơpă, kon akăn sư chu yom (trong 2-4) pơgơ̆r hnam dơnŏ jơ̆ pơgơ̆r khul bơngai lui. Tơdrong arih hăm kon akăn thoi lĕ minh ‘bai ‘bok bơtho ‘lơ̆ng bơih.
Mă pêng, “Bơngai bu ‘nao lui sư ưh kơ gơh wei lăng bơngai lui ôh” hli kơ sư pơang akâu kơdih (trong 6-7).
Bơngai pơgơ̆r gah bơhngol Kră Yang kăl kơ hlôh kơ jung, đơ̆ng nơ̆r pơma pơm tơ’bôh ‘lơ̆ng truh tơ tơdrong arih lăm hnam dơnŏ kư̆m thoi arih hơdai hăm bơngai tơpôl tơ ala teh athei arih pơm kơmĭl ‘lơ̆ng. ‘Nĕ kơ pơm kơmĭl kơnê̆. Mă khan lei ră, ‘nâu bơih “minh tơdrong ‘lơ̆ng trŏ kơ hơpơi. Bơngai “‘maih jang pơm ‘bok bơtho” kăl kơ pơhrăm pơtơ̆p pơjuăt kơdih akâu, pơhrăm arih pơm ‘lơ̆ng, mă lu kon pơlei Kră Yang kăl kơ krao khan tơgŭm lu bơngai pơgơ̆r gah bơhngol jang keh tơdrong jang Kră Yang pơjao.
Ơ Kră Yang, apinh Ih tơgŭm inh băt lăng tơdrong lu bơngai pơgơ̆r gah bơhngol wă kiơ̆ trŏ thoi ih lăng. Apinh Ih tơgŭm inh pơtơ̆p pơjuăt kơdih akâu, pơhrăm arih pơm ‘lơ̆ng kiơ̆ nơ̆r Kră Yang bơtho wă kơ chăl arih inh Kră Yang yua. Krao khan yua anăn Kră Yang Yêsu Krist, Amen.
Lu bơ̆n hăm hơpơi wă dah mă oei bơ̆jang tơgŭm wei lăng gah bơhngol bơngai nai ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jôel 4
Kênh Youtube BHKTHN:
