Klei Aê Diê Blŭ: I Y-Timôthê 3:1-7
Êlan kliăng: “Klei blŭ anei jing sĭt nik: tơdah sa čô čiăng jing khua pô mtô, ñu čiăng kơ bruă yuôm yơh.” (I Y-Timôthê 3:1)
Klei êmuh ksiêm mĭn: Si Khua ƀĭng kna Y-Pôl bi mklă kơ klei čiăng jing khua pô mtô? Si knuih khua pô mtô brei mâo? Ya klei phung ƀuôn sang Aê Diê ngă čiăng đru kơ pô kiă kriê klei hdĭp mngăt bi leh bruă klam Aê Diê jao?
Leh lač hŏng dua čô jing êkei leh anăn mniê, Khua ƀĭng kna Y-Pôl lač kơ dua bruă klam klă klơ̆ng hlăm Phung Sang Aê Diê jing khua pô mtô leh anăn khua sang yang. Tal êlâo, ñu lač kơ khua pô mtô. Hlue si Hdruôm Hră Klei Bi Mguôp Mrâo, khua pô mtô leh anăn khua mduôn mâo klei mblang giăm msĕ, lač kơ bruă kriê dlăng sơăi kriê dlăng kơ Phung Sang Aê Diê (Y-Tit 1:5-7). Lač kơ khua pô mtô, Khua ƀĭng kna Y-Pôl lač tlâo klei. Tal sa, ñu bi mklă hlei pô čang hmăng jing khua pô mtô jing čang hmăng sa klei jăk siam. Čiăng mñă kơ klei anei, ñu mphŭn hŏng klei bi mklă: “Klei blŭ anei jing sĭt nik” (êlan 1), mblang jing “Anei jing klei blŭ năng đăo knang (êlan 1). Čang hmăng jing mnuih kriê dlăng hlăm klei hdĭp mngăt kơ pô mkăn jing sa klei čang hmăng jăk siam, năng mâo klei mđĭ ai. Hruê anei, drei ênưih lĕ hlăm dua mta klei: Dlăng phung mă bruă kơ Aê Diê jing pô mguôp hlăm “bruă doh jăk”, yuôm bhăn hĭn giăm Khua Yang hĭn kơ mnuih mă bruă hlăm ala ƀuôn. Êngao anăn, ăt mâo mơh phung mđĭ đei kơ bruă ti êngao hŏng knuih “msĕ si ngă kơ Aê Diê” tơl dlăng hơăi mang bruă răng kriê phung biăp. Jih dua klei anei amâo djŏ sơăi ôh. Khua ƀĭng kna Y-Pôl brei drei ƀuh klei čang hmăng ngă khua pô mtô jing klei čang hmăng jăk siam mơ̆ng hjăn bruă anăn, amâo djŏ tơdah bi msĕ hŏng klei čang hmăng mơ̆ng bruă mkăn ôh.
Tal dua, mơ̆ng êlan 2-7, Khua ƀĭng kna Y-Pôl brei ƀuh, čiăng čang hmăng klei jăk siam anăn klă sĭt jing sa bruă jăk siam, snăn phung kriê dlăng hlăm klei hdĭp mngăt kơ pô mkăn brei mâo klei hriăm mjuăt knuih hdĭp hlăm lam, anăn jing amâo mâo ôh ya klei năng ƀuah, djŏ hnơ̆ng, čŏng kriê dlăng…;wăt knuih hdĭp bi êdah ti êngao, anăn jing amâo rañ kpiê ôh amâodah măk ƀai, khăp kơ tue, ênang, mâo phung amâo đăo khăp hơiêng… sa bruă yuôm bhăn mkăn jing gŏ sang, brei jing ung kơ sa čô mô̆, thâo kriê dlăng gŏ sang, mtô anak čô (êlan 2-4). Kriê dlăng gŏ sang jing kriê dlăng sa Phung Sang Aê Diê điêt. Knuih sa čô hdĭp hŏng mô̆ anak jing leh sa klei bi hriăm jăk klă kơ êpul.
Tal tlâo, “sa čô mrâo đăo amâo dưi ôh” kyua adôk mrâo đei kyua anăn ênưih jing mgao (êlan 6-7).
Khua kiă kriê klei hdĭp mngăt jing pô mâo Aê Diê brei mâo lu mta, mơ̆ng knuih hdĭp truh kơ klei dôk dơ̆ng ƀơ̆ng huă ăt msĕ mơh hlăm ala ƀuôn brei thâo bi hmô, amâo ngă klei jhat ôh. Khădah snăn, anei jing “sa bruă jăk”, năng čiăng čang hmăng. Pô “čang hmăng jing khua pô mtô” brei kpĭ mjuăt pô, hriăm knuih hdĭp jăk; mbĭt anăn phung ƀuôn sang Aê Diê ăt brei wah lač kơ pô gĭt gai hlăm mngăt bi leh bruă klam Aê Diê jao.
Drei čang hmăng amâodah dôk mguôp hlăm bruă kriê dlăng klei hdĭp mngăt kơ pô mkăn mơ̆?
Wah lač: Ơ Khua Yang, akâo kơ Ih đru kâo kơ bruă kiă kriê hlăm mngăt hlue si klei Aê Diê čiăng. Akâo kơ Ih đru kâo kpĭ mjuăt kâo pô, hriăm knuih hdĭp msĕ si Klei Aê Diê Blŭ mtô čiăng kơ klei hdĭp kâo mâo Aê Diê yua. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôel 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
