Klei Aê Diê Blŭ: I Kôrantô 3:1-8
Êlan kliăng: “Kâo pla leh, Y-Apôlôs krih êa leh, ƀiădah Aê Diê brei čăt hriê kơ prŏng” (I Kôrantô 3:6)
Klei êmuh ksiêm mĭn: Ya klei Khua ƀĭng kna Y-Pôl čiăng lač tơdah ñu lač ñu leh anăn Y-Apôlôs “jing knŏng dĭng buăl”? Ñu mă klei bi hmô hŏng klei pla leh anăn krih êa čiăng mblang kơ ya klei? Si knuih drei khăng mâo hŏng phung mă bruă kơ Khua Yang mbĭt hŏng drei?
Hlăm kdrêč tal êlâo, Khua ƀĭng kna Y-Pôl brei drei ƀuh klei mĭn mnuih tui si kđeh, ka hriê kơ prŏng hlăm klei hdĭp myang ôh jing bi nač, bi mneh msao. Diñu ruah tui hlue leh anăn huĭ mpŭ kơ sa čô khua gĭt gai, ngă klei bi kah mbha phung (êlan 1-4). Kyuanăn, ñu bi wir digơ̆ kơ klei djŏ, kơ klei hriê kơ prŏng hĭn, anăn jing klei mĭn sa čô dĭng buăl (êlan 5), tơdah hưn kơ ñu jing “dĭng buăl”, Khua ƀĭng kna Y-Pôl amâo lač kơ “bruă” ñu klam ôh, ƀiădah bi êdah kơ klei ñu leh anăn Y-Apôlôs mă bruă kơ Khua Yang leh anăn kơ phung ayŏng adei msĕ si sa čô dĭng buăl.
Khua ƀĭng kna Y-Pôl mă klei bi hmô hŏng klei pla leh anăn krih êa čiăng mblang brei thâo kơ ñu hŏng Y-Apôlôs amâo mâo klei bi mneh ôh, ƀiădah jing dua čô mă bruă mbĭt hŏng bruă klam mdê mdê: Ñu jing pô pla, Y-Apôlôs jing pô krih êa. Amâodah lač snei, hŏng klei mă bruă jing msĕ si dĭng buăl, Khua ƀĭng kna Y-Pôl leh anăn Y-Apôlôs jing phung bi đru, amâo mâo klei bi mneh ôh hdơ̆ng diñu dua. Ti anăp Aê Diê, ai dleh diñu dua “jing msĕ”, amâo djŏ sa čô mâo klei mpŭ, sa čô tŭ klei mưč ôh. Grăp čô ngă tui si bruă Khua Yang jao, leh anăn “grăp čô srăng mă tŭ klei mưn tui si bruă ñu ngă leh”. Aê Diê amâo mâo ksiêm mkă bruă drei ngă hŏng klei bi msĕ hlei pô ngă lu hĭn, hlei pô ngă ƀiă hĭn, hlei bruă jing yuôm hĭn ôh. Aê Diê amâo mâo bi msĕ bruă pô anei hŏng bruă pô mkăn čiăng brei klei mưn ôh. Klei bi msĕ jing klei mĭn phung lăn ala, kyuadah mơ̆ng klei bi msĕ kbiă hriê klei bi nač.
Klei Khua ƀĭng kna Y-Pôl mpŭ kơ pô mă bruă mbĭt hŏng ñu mâo leh mơ̆ng êlâo kyuadah ñu yap ñu pô leh anăn phung mă bruă mbĭt hŏng ñu “jing knŏng dĭng buăl” đuč. Grăp čô măng ai hlei ñu jing, khua ƀĭng kna, khua pô mtô, pô mtô, amâodah sa čô bi đru đăo hĕ…jih jang jing “dĭng buăl Khua Yang” sơăi, grăp čô mă sa mta bruă Khua Yang jao. Drei khăng ƀuh ai drei mă bruă jing prŏng hĭn kơ pô mkăn. Ƀiădah Khua ƀĭng kna Y-Pôl lač boh kơ bruă drei ngă tui si Aê Diê pô kluôm dhuôm. Dua blư̆ ñu mñă: “Aê Diê Pô brei čăt hriê kơ prŏng” (êlan 6-7). Tơdah Khua ƀĭng kna Y-Pôl lač, “amâo djŏ ôh pô pla, kăn djŏ pô krih êa rei jing yuôm”, amâo djŏ ôh ñu dôk mtrŭn boh yuôm bruă mnuih ngă hlăm klei hưn klei đăo, mjing phung ƀĭng kna, ƀiădah ñu knŏng mtă brei Phung Sang Aê Diê thâo dlăng djŏ kơ bruă jing “phung dĭng buăl Aê Diê”. Hruê anei, ênguôt snăk mâo lu mnuih hlăm phung drei dlăng kơ phung mă bruă mkăn jing msĕ si phung dôk bi lông hŏng pô, mơ̆ng anăn mâo klei bi keh nač, bi kah mbha phung. Mơ̆ng klei dlăng djŏ kơ bruă pô dê, bruă pô mkăn, leh anăn bruă Khua Yang yơh đru drei amâo mâo bi mneh msao, amâo dlăng kơ pô mă bruă mbĭt hŏng drei jing mnuih bi kdơ̆ng ôh, ƀiădah bi mpŭ hdơ̆ng drei jing msĕ si mnuih mă bruă mbĭt.
Si klei hriăm hruê anei đru drei lŏ mkra hĕ knuih leh anăn klei mĭn čhuai drei?
Wah lač: Ơ Khua Yang, đru kâo hdơr nanao kơ kâo leh anăn jih jang phung ayŏng amai adei mkăn hlăm Phung Sang Aê Diê jing phung dôk mdơ̆ng Ƀuôn Ala Mtao Ih sơăi. Đru kâo thâo mpŭ leh anăn thâo bi đru čiăng bi mđĭ Phung Sang Aê Diê Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
