I Lu Pơtao 13:4-10
“’Bok Kei-Dei ưh kơ ăn kơ iĕm tơdrong gleh yua kơ iĕm ưh kơ đei tơdrong yoch hă? Ưh ôh. Sư ưh kơ ăn kơ iĕm tơdrong gleh yua kơ Sư wă kơ iĕm jah tơbral kơdih tơdrong yoch ră. Sư mơnat kơ iĕm tơpă na Sư ăn kơ iĕm oei hiôk khŏm khŏm. Mă-lei iĕm oei pơm yoch hơnơ̆ng đĕch ưh kơ đei tơbral ôh.” (Rôma 2:4)
Nơ̆r jet tơchĕng pơwao:
- ‘Bok Kei-Dei đei pơm tơdrong kiơ hăm pơtao Jêrôbôam kơplah sư đei tơdrong ‘blĕk?
- Nơ̆r krao apinh đơ̆ng pơtao Jêrôbôam tơbăt ăn kơ jơhngơ̆m đon sư thoi yơ?
- Lu bơ̆n kăl kơ pơm thoi yơ hăm tơdrong phak đơ̆ng Kră Yang ‘Bok Kei-Dei?
Kơplah pơtao Jêrôbôam blĕk păng tơhlâu ti sư kơ bơngai pơtruh nơ̆r ‘Bok Kei-Dei ti sư mă pơang akâu kơdih noh jing kro hloi, ưh kơ gơh kơchôt! Păng jơ’noh hloi chơnang soi hơđah hloi păng tơnuh huŏng đĭ tơteh. Jơnoh đei tơdrong hli krưp, pơtao Jêrôbôam đei nơ̆r krao apinh bơngai pơtruh nơ̆r ‘Bok Kei-Dei noh apinh Kră Yang ‘Bok Kei-Dei mơnat ăn păng ăn kơ ti sư jing thoi đêl (trong 4-6). Thoi noh, tơdrong ‘Bok Kei-Dei yua bơngai pơtruh nơ̆r Sư noh gô truh tơpă, ưh kơ đei tơdrong kiơ ngĭl ngŭl.
‘Bơ̆t jơ’noh, Pơtao Jêrôbôam đei wă tơbơ̆p tơdrong truh hơmơt: Tơdrong răm ‘băm kơ teh đak sư yua kơ lu sư kơkuh kơ rup yang, păng ti sư kro ưh kơ gơh kơchôt. Mă lei rŏ kơ sư tơbral kơdih ră mă lei sư tă kơ hiơ̆k bơngơ̆t kơ ti sư păng wă kơ klaih ti sư đĕch. Tơdrong âu tơ’bôh ăn kơ bơ̆n rơđah Pơtao Jêrôbôam ưh kơ tơbral tơpă, sư wă wer kơ tơdrong phak đơ̆ng ‘Bok Kei-Dei đĕch. Tơdrong âu đei tơ’bôh hơđăl đơ̆ng rŏng kơ ti sư klaih sư oei ling lang kơ kuh kơ rup yang đĕch (I Pơtao 13:33-34). Tơdrong mơnat đơ̆ng ‘Bok Kei-Dei oei ăn kơ Jêrôbôam kơplah ‘Bok Kei-Dei pơklaih ti sư, mă lei sư đei tơhiong lê̆ iŏk tơdrong mơnat đơ̆ng Kră Yang păng tơdrong pơm lăi tơdrong ‘lơ̆ng đơ̆ng ‘Bok Kei-Dei.
Kơplah Kră Yang ăn tơdrong hơnat hơnot, tơdrong jĭ jăn, dah tơdrong truh kơ lu bơ̆n, kơnhăm noh wă bơtho tơ’bôh kơ bơ̆n, tơblŏk kơ bơ̆n, mă lei phŏ kơnh lu bơ̆n ‘maih wă kơ weh wer đơ̆ng tơdrong phak đĕch mă lei ưh kơ ‘maih tơbral ‘bơ̆t anăp Kră Yang. Noh bơih tơ’bôh ăn lơ bơngai gô hlôi đơ̆ng dôm tơdrong anat anot noh đơ̆ng rŏng kơnh lu pơm pơlơ̆k đêl tơdrong yoch so lu sư đei pơm sơ̆.
Jơ’nâu, Pơtao Jêrôbôam đei nơ̆r pơtơm pơlung wă ‘maih pơm buŏl juăt hăm bơngai pơtruh nơ̆r ‘Bok Kei-Dei ‘nâu păng krao wơ̆n sư năm tơhnam ‘bok pơtao wă iŏk tơmam hơpah păng sŏng sa pơdơh (trong 7). Mă lei, bơngai pơtruh nơ̆r ‘Bok Kei-Dei âu sơngah, yua kơ Kră Yang ‘Bok Kei-Dei ưh kơ ăn sư sŏng sa tơ anih ‘noh, păng nơ̆r krê hơmơt dêh noh mă khan “Mă ih ăn kơ inh minh puăt dêh char ih, inh kư̆m ưh kơ năm hơdai ih păng inh kư̆m ưh kơ sŏng sa dah nhă đak tơ âu. Yua kơ Kră Yang khan kơ inh: ‘Ih ‘nĕ kơ sŏng sa dah nhă đak păng ih kư̆m ‘nĕ kơ brŏk rok trong đêl ih năm.” (trong 8-9). Tơdrong pơm trŏ thoi nơ̆r ‘Bok Kei-Dei ba ăn kơ bơngai pơtruh nơ̆r ‘Bok Kei-Dei huei kơ pŭ iŏk tơdrong phak đơ̆ng ‘Bok Kei-Dei. Lu bơ̆n kăl kơbăt bơngai ayăt kơbơ̆n gô blah lu bơ̆n hăm tơdrong jơhngơ̆m pran nhen thoi “kiĕk wă arum sa..” (I Pêtrôs 5:8), mă lei lu sư kư̆m đei tơdrong pơhlŭ lu bơ̆n noh jơ̆ pơm buŏl juăt hăm bơ̆n păng ăn kơ bơ̆n dôm tơdrong lơi yua thoi lu bơngai ala teh âu “Tơdrong kư̆ kă jơhngơ̆m kon bơngai ‘maih pơm, tơdrong kư̆ kă mơ̆n măt kon bơngai ‘maih lăng, lơ tơdrong tơpă, mơ’nah đei tơmam yua wă pơang akâu sư kơdih.” (I Yôhan 2:16)
Ơ Kră Yang, Apinh Ih bơwei jơhngơ̆m inh păng tơdrong tơchĕnh inh, ăn kơ inh đei jơ-hngơ̆m tơbral tơdrong yoch kơplah inh đei pơm yoch hăm Ih. Apinh Ih ăn kơ inh krăng kơchăng păng băt nhen kơdôm tơdrong kơnê̆ wă pơrăm inh, Apinh Ih mơnat, dui ba, păng bơwei inh. Yua anăn Kră Yang Yêsu Krist. Amen
Lu bơ̆n phŏ kơnh wă nhen thoi pơtao Jêrôbôam lăm tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 72-73
Kênh Youtube BHKTHN:
https://www.youtube.com/c/bhkthn
